తెలంగాణ రాజకీయ యవనికపై మరో కొత్త పార్టీ ఆవిర్భవించబోతోంది. రాష్ట్రంలో ప్రస్తుత కాంగ్రెస్ ప్రభుత్వాన్ని దీటుగా ఎదుర్కొనే ప్రత్యామ్నాయ శక్తి లేదని భావిస్తున్న ఎమ్మెల్సీ కవిత, ఆ బాధ్యతను తానే స్వీకరిస్తున్నట్లు ఇప్పటికే ప్రకటించారు. ఈ క్రమంలో శ్రీరామనవమి పర్వదినాన్ని పురస్కరించుకుని రేపు (మార్చి 27న) తన మెట్టినిల్లు అయిన నిజామాబాద్ వేదికగా కొత్త పార్టీపై ఆమె కీలక ప్రకటన చేయనున్నారు. ప్రజా సమస్యలే అజెండాగా, రాబోయే ఎన్నికల్లో నిర్ణయాత్మక పాత్ర పోషించే దిశగా కవిత అడుగులు వేస్తుండటం రాష్ట్ర రాజకీయాల్లో పెను సంచలనంగా మారింది. రేపు మధ్యాహ్నం 3 గంటలకు నిజామాబాద్లోని జాగృతి కార్యాలయంలో నిర్వహించే ప్రెస్ మీట్ ద్వారా పార్టీ పేరు, జెండా మరియు భవిష్యత్ కార్యాచరణను ఆమె వెల్లడించనున్నారు.
నిజామాబాద్ వేదికగా ఆధ్యాత్మిక సందడి
శ్రీరామనవమి సందర్భంగా ప్రతి ఏటా నిజామాబాద్ పార్లమెంట్ పరిధిలోని ప్రముఖ ఆలయాలకు పట్టువస్త్రాలు సమర్పించడం కవిత దంపతులకు ఆనవాయితీగా వస్తోంది. రేపు ఉదయం ఖిల్లా రాంమందిర్లోని శ్రీ రఘునాథ ఆలయంలో జరిగే సీతారాముల కళ్యాణ మహోత్సవంలో కవిత దంపతులు స్వయంగా పాల్గొని పట్టువస్త్రాలు సమర్పిస్తారు. వీటితో పాటు డిచ్పల్లి, బోధన్, ఆర్మూర్, జగిత్యాల మరియు కోరుట్ల నియోజకవర్గాల్లోని ప్రధాన రామాలయాలకు కూడా వారి ప్రతినిధుల ద్వారా పట్టువస్త్రాలను పంపనున్నారు. ఆధ్యాత్మిక కార్యక్రమాల అనంతరం నేరుగా రాజకీయ ప్రకటన చేయనుండటంతో, ఈ పర్యటనకు అత్యంత ప్రాధాన్యత ఏర్పడింది. ముఖ్యంగా నిజామాబాద్ను తన రాజకీయ పునాదిగా మలచుకోవాలన్న వ్యూహం ఇందులో స్పష్టంగా కనిపిస్తోంది.
జాగృతి శ్రేణుల్లో ఉత్సాహం
కవిత కొత్త పార్టీ ప్రకటన చేయనున్న నేపథ్యంలో రాజకీయ వర్గాల్లో అనేక ప్రశ్నలు తలెత్తుతున్నాయి. అసలు పార్టీ పేరు ఏమిటి? ఈ పార్టీ ఏ ఓటు బ్యాంకును చీల్చబోతోంది? మరియు ఏ పార్టీకి నష్టం చేకూరుస్తుంది? అనే అంశాలపై జోరుగా చర్చ జరుగుతోంది. ఇప్పటికే తెలంగాణ జాగృతి శ్రేణులు రాష్ట్రవ్యాప్తంగా పెద్ద ఎత్తున నిజామాబాద్కు తరలివస్తుండటంతో అక్కడ పండుగ వాతావరణం నెలకొంది. శ్రీరామ నవమి రోజే ఈ సంచలన ప్రకటన వెలువడనుండటంతో అటు జాగృతి కార్యకర్తల్లో ఉత్సాహం, ఇటు ప్రత్యర్థి పార్టీల్లో ఉత్కంఠ నెలకొంది. కవిత తీసుకున్న ఈ నిర్ణయం తెలంగాణ రాజకీయ ముఖచిత్రాన్ని ఏ విధంగా మార్చబోతుందో మరికొన్ని గంటల్లో తేలిపోనుంది.