తెలంగాణ రాష్ట్రంలో రాబోయే ఐదు రోజుల పాటు విస్తారంగా వర్షాలు (Heavy Rains) కురిసే అవకాశం ఉన్నట్లు భారత వాతావరణ శాఖ (IMD) వెల్లడించింది. రుతుపవనాల ప్రభావంతో రాష్ట్రంలో మోస్తరు నుంచి భారీ వర్షాలు కురుస్తాయని, ఇది వేసవి వేడి నుంచి ప్రజలకు ఉపశమనాన్ని కలిగించనుందని చెబుతున్నారు. ముఖ్యంగా కొన్ని జిల్లాల్లో పిడుగులు, ఈదురు గాలులతో కూడిన వర్షాలు కురిసే అవకాశముండటంతో వాతావరణ శాఖ ఎల్లో అలర్ట్ జారీ చేసింది. ఆదిలాబాద్, మంచిర్యాల, ఖమ్మం, హైదరాబాద్, రంగారెడ్డి తదితర జిల్లాల్లో ప్రజలు అప్రమత్తంగా ఉండాలని సూచించారు.
Pushpa Dialogue : వైసీపీ అంత రాఫ్ఫా..రాఫ్ఫా అంటుంటే..గుడివాడ అమర్‌నాథ్‌ ఎక్కడ..?
ఈదురు గాలులతో కూడిన వర్షాల ప్రభావంతో చెట్లు, విద్యుత్ స్తంభాలు నేలకూలే ప్రమాదం ఉన్నందున ప్రజలు ఓపెన్ ప్రదేశాల్లో ఉండరాదని అధికారులు హెచ్చరిస్తున్నారు. పిడుగుల సమయంలో విద్యుత్ పరికరాల వాడకంలో జాగ్రత్తలు తీసుకోవాలని సూచించారు. హైదరాబాద్ సహా పరిసర ప్రాంతాల్లో వర్షాలు కురిసే అవకాశం ఉండటంతో ట్రాఫిక్ సమస్యలు, లోతట్టు ప్రాంతాల్లో నీరు నిలిచే అవకాశాలను కూడా అధికారులు నిర్లక్షించకూడదని సూచించారు. ఈ నేపథ్యంలో నగరపాలక సంస్థలు, ట్రాఫిక్ శాఖలు అవసరమైన ఏర్పాట్లు చేపట్టేందుకు సన్నద్ధమవుతున్నాయి.
ఈ వర్షాలు వానాకాలం పంటల సాగుకు ఎంతో ఉపయోగపడతాయని వ్యవసాయ నిపుణులు చెబుతున్నారు. గత కొన్ని రోజులుగా రాష్ట్రంలో ఉష్ణోగ్రతలు పెరిగిన నేపథ్యంలో ఈ వర్షాలు భూగర్భ జలాలను రీఛార్జ్ చేయడంలో కూడా కీలకంగా మారనున్నాయి. ఇప్పటికే వర్షాలు కురవకపోవడం వల్ల రైతులు విత్తనాలు వేయడానికి వేచిచూస్తున్నారు. ప్రస్తుతం IMD అంచనాల ప్రకారం వర్షాలు రాష్ట్రవ్యాప్తంగా కురిసే అవకాశంతో వ్యవసాయరంగానికి ఊరట కలగనుంది. వర్షాల వల్ల ఎలాంటి ప్రమాదాలు తలెత్తకుండా ఉండేందుకు ప్రజలంతా అప్రమత్తంగా ఉండాలని అధికారులు సూచిస్తున్నారు.