Green Energy Corridor: గ్రీన్ ఎనర్జీ కారిడార్‌కు అనుమతివ్వండి.. కేంద్ర మంత్రిని కోరిన డిప్యూటీ సీఎం!

Green Energy Corridor: తెలంగాణ విద్యుత్ రంగంలో విప్లవాత్మక మార్పులు తీసుకురాగల కీలకమైన ప్రాజెక్టుకు అనుమతులు కోరుతూ డిప్యూటీ సీఎం మల్లు భట్టి విక్రమార్క కేంద్ర విద్యుత్ శాఖ మంత్రి మనోహర్ లాల్ కట్టర్‌ను కలిశారు. గ్రీన్ ఎనర్జీ కారిడార్ (Green Energy Corridor)- దశ 3 (GEC-III) కింద తెలంగాణ ట్రాన్స్‌కో (TSTRANSCO) సమర్పించిన రాష్ట్రాంతర విద్యుత్ ప్రసరణ వ్యవస్థ ప్రతిపాదనలకు త్వరితగతిన ఆమోదం తెలపాలని ఆయన కేంద్ర మంత్రిని కోరారు.

19 గిగావాట్ల గ్రీన్ పవర్ ప్రాజెక్టు

తెలంగాణలో పునరుత్పాదక ఇంధన వనరుల (Renewable Energy) అభివృద్ధి కోసం ఈ ప్రతిపాదనలు రూపొందించబడ్డాయి. మొదటగా, సౌర విద్యుత్ సంస్థ (SECI) రాష్ట్రంలోని ఐదు జిల్లాల్లో మొత్తం 13.5 గిగావాట్ల సామర్థ్యం గల గ్రీన్ పవర్ (RE) జోన్‌లను గుర్తించింది. ఈ జోన్‌ల ద్వారా విండ్, సోలార్, పంప్డ్ స్టోరేజ్ ప్రాజెక్టుల నుండి ఉత్పత్తి అయ్యే విద్యుత్‌ను ఇతర రాష్ట్రాలకు ఎగుమతి చేయాల్సి ఉంటుంది.

తర్వాత SECI, తెలంగాణ రెడ్కో (TGREDCO) అధికారుల మధ్య విస్తృతమైన చర్చలు జరిగాయి. భూమి లభ్యత, పునరుత్పాదక విద్యుత్ సాధ్యతను పరిగణనలోకి తీసుకుని, ఈ RE జోన్‌ల సామర్థ్యం 13.5 గిగావాట్ల నుండి 19 గిగావాట్లకు పెంచబడింది. దీని వల్ల రాష్ట్రంలోని మొత్తం ఎనిమిది జిల్లాలను ఈ కారిడార్ పరిధిలోకి తీసుకురావడం సాధ్యమైంది.

Also Read: Severe Headache : విపరీతమైన తలనొప్పి తరచూ వస్తుందా? ముందు ఇలా చేశాక స్కాన్స్ చేయించుకోండి!

6,895 కోట్ల రూపాయల సమగ్ర ప్రణాళిక

ఈ సవరించిన ప్రణాళికకు అనుగుణంగా తెలంగాణ ట్రాన్స్‌కో మొత్తం 19 గిగావాట్ల విద్యుత్ సామర్థ్యం కలిగిన 8 ట్రాన్స్‌మిషన్ పథకాలతో కూడిన ఒక సమగ్ర ప్రతిపాదనను తయారు చేసింది. ఈ ప్రాజెక్టు అంచనా వ్యయం సుమారు రూ. 6,895 కోట్లుగా నిర్ధారించి, దీనిని కేంద్ర విద్యుత్ ప్రాధికార సంస్థ (CEA)కు సమర్పించింది. ఈ పథకాలకు వీలైనంత త్వరగా అనుమతులు మంజూరు చేయాలని డిప్యూటీ సీఎం భట్టి కేంద్ర మంత్రిని విజ్ఞప్తి చేశారు.

ఈ ప్రాజెక్టుకు అనుమతి లభిస్తే తెలంగాణలో గ్రీన్ పవర్ అభివృద్ధి, గ్రిడ్ ఇంటిగ్రేషన్ కార్యక్రమాలు వేగవంతమవుతాయని భట్టి వివరించారు. పునరుత్పాదక ఇంధన ఉత్పత్తికి, దానిని వినియోగదారులకు చేరవేయడానికి అవసరమైన మౌలిక సదుపాయాలు మెరుగుపడతాయి. తద్వారా రాష్ట్రం పర్యావరణ పరిరక్షణ లక్ష్యాలను సాధించడంలో కీలక పాత్ర పోషిస్తుంది. ఇది తెలంగాణ ఆర్థిక వ్యవస్థకు ముఖ్యంగా విద్యుత్ రంగానికి గొప్ప ప్రోత్సాహాన్ని ఇస్తుందని ప్రభుత్వం ఆశాభావం వ్యక్తం చేస్తోంది.