Vande Bharat Express: సికింద్రాబాద్-తిరుపతి మధ్య వందే భారత్ ఎక్స్‌ప్రెస్.. ఏప్రిల్ 8న ప్రారంభం..?

Vande Bharat Exp

మరో వందే భారత్ ఎక్స్‌ప్రెస్ (Vande Bharat Express) సికింద్రాబాద్-తిరుపతి మధ్య గుంటూరు మీదుగా ప్రారంభం కానుంది. ఏప్రిల్ 8న ప్రారంభమయ్యే అవకాశం ఉంది. ఒకసారి ఈ మార్గం అమల్లోకి వస్తే ఇది చాలా విజయవంతమైన లైన్ అవుతుందని అధికారులు భావిస్తున్నారు. ఈ మార్గంలో వందే భారత్ నడిస్తే సికింద్రాబాద్-గుంటూరు మధ్య ప్రయాణ సమయం చాలా వరకు తగ్గే అవకాశం ఉంది. అలాగే గుంటూరు నుంచి తిరుపతికి ప్రయాణ సమయం కూడా తగ్గుతుంది.

మిర్యాలగూడ మీదుగా బీబీనగర్- నడికుడి మార్గంలో సికింద్రాబాద్-తిరుపతి వందే భారత్ రైలును నడపాలని రైల్వే అధికారులు నిర్ణయించినట్లు తెలుస్తోంది. ఈ రైలును వరంగల్, ఖాజీపేట మార్గంలో నడపాలని రైల్వే అధికారులు భావిస్తున్నప్పటికీ.. ఆ మార్గంలో దూరం ఎక్కువ కానుంది. అందుకే బీబీనగర్- నడికుడి మధ్య నడపాలని నిర్ణయించుకున్నట్లు తెలుస్తోంది. బీబీ నగర్ నుంచి గుంటూరు వెళ్లే మార్గంలో గంటకు 130 కి.మీ వేగంతో ప్రయాణించేలా రైల్వే ట్రాక్ ఏర్పాటు చేసినట్లు అధికారులు వెల్లడించారు.

Also Read: Road Accidents: ఖమ్మంలో ఘోర రోడ్డు ప్రమాదాలు.. ఐదుగురు మృతి

సికింద్రాబాద్-తిరుపతి మధ్య ట్రాఫిక్ సాధారణంగా ఉంటుంది. ఈ మార్గంలో వందే భారత్ రైలు ప్రవేశపెడితే ప్రయాణికులకు సౌకర్యంగా ఉంటుందని అధికారులు భావిస్తున్నారు. దీంతో వందే భారత్ రైలుకు ఆదరణ పెరుగుతుందని అంటున్నారు. ఇటీవల కేంద్ర మంత్రి కిషన్ రెడ్డి కూడా సికింద్రాబాద్-తిరుపతి మధ్య వందేభారత్ రైలు వచ్చే అవకాశం ఉందని చెప్పారు. రైల్వే బోర్డు నుంచి గ్రీన్ సిగ్నల్ లభించిన వెంటనే వందేభారత్ రైలును నడిపేందుకు అధికారులు అన్ని ఏర్పాట్లు చేశారు. అతి త్వరలో ఈ మార్గంలో వందేభారత్ పరుగులు పెట్టనుంది.

ఈ మార్గంలో రైలు గంటకు 130 నుంచి 150 కి.మీ వేగంతో ప్రయాణించేలా ట్రాక్ ను అభివృద్ధి చేసినట్లు తెలుస్తోంది. ఈ మార్గంలో వందే భారత్ రైలు టికెట్ ధర రూ.1150 నుంచి ప్రారంభమవుతుందని సమాచారం. ఈ మార్గంలో సికింద్రాబాద్-తిరుపతి మధ్య నారాయణాద్రి ఎక్స్‌ప్రెస్ కూడా నడుస్తోంది. ఈ రైలు ప్రయాణ సమయం 12 గంటలు. అయితే వందే భారత్ రైలు అందుబాటులోకి వస్తే 6 నుంచి 7 గంటల్లో తిరుపతికి వెళ్లవచ్చని అధికారులు చెబుతున్నారు. అయితే ఈ రైలు ఏ స్టేషన్లలో ఆగుతుందనే దానిపై స్పష్టత లేదు. గుంటూరు, నెల్లూరులో ఆగుతుందని తెలుస్తోంది.