స్మార్ట్ ఫోన్లు,లాప్టాప్ లు, టాబ్లెట్ లు ఇలా ప్రతి ఒక్క దాంట్లో ఎయిర్ప్లేన్ మోడ్ లేదా ఫ్లైట్ ఫోన్ అనేది తప్పనిసరిగా ఉంటుంది. ఇది ఆన్ చేసినప్పుడు అన్ని రకాల ప్రసారలను పూర్తిగా ఆఫ్ చేస్తుంది. అంటే ఇంటర్నెట్ ఆఫ్ అవుతుంది. అలాగే ఎటువంటి మెసేజ్లు కానీ ఫోన్ కాల్స్ కానీ రావు. ఈ ఎయిర్ప్లేన్ మోడ్ ని సున్నితమైన నావిగేషన్, కమ్యూనికేషన్ సిస్టమ్‌లకు ఎటువంటి భంగం కలగకుండా ఈ సదుపాయం ప్రత్యేకంగా విమానంలో ఉపయోగించేందుకు రూపొందించారు. అయితే, ఎయిర్ప్లేన్ మోడ్ ని ఆన్ చేయడం ద్వారా మీరు మీ ఫోన్ బ్యాటరీని ఆదా చేసుకోవచ్చని మీకు తెలుసా? అదేంటంటే, ఫోన్ బ్యాటరీ త్వరగా అయిపోతుంటే, ఈ మోడ్‌ని ఆన్ చేయడం ద్వారా మీరు మీ ఫోన్ బ్యాటరీని ఆదా చేసుకోవచ్చట.
అయితే బ్యాటరీని ఆదా చేసేందుకు ఈ మోడ్ ను ఎప్పుడు ఆన్ చేయాలి? మీరు మీ ఫోన్ లో ఎయిర్ప్లేన్ ని ఆన్ చేసినప్పుడు అది అన్ని రేడియో ట్రాన్స్‌మిటర్‌ లను ఆఫ్ చేస్తుంది. మొత్తం మీద ఈ ఫీచర్ మీ ఫోన్ ను బయటి ప్రపంచం నుండి పూర్తిగా వేరు చేస్తుంది. ఎయిర్ప్లేన్ మోడ్ ని ఉపయోగించడం ద్వారా బ్యాటరీ జీవితాన్ని ఆదా చేయడానికి మీరు ఫోన్ ను ఛార్జ్ చేస్తున్నప్పుడు ఈ మోడ్ ని ఆన్ చేయాలి. అప్పుడు ఛార్జింగ్ వేగంగా ఉంటుంది. అలాగే మీ ఫోన్ బ్యాటరీ తక్కువగా ఉన్నప్పుడు ఈ మోడ్ ను ఆన్ చేస్తే ఫోన్ త్వరగా స్విచ్ ఆఫ్ కాదు. ఆన్ చేసినప్పుడు ఎయిర్ప్లేన్ మోడ్ అన్ని వైర్‌లెస్ యాక్టివిటీని ఆఫ్ చేస్తుంది. అప్పుడు మీ ఫోన్ తక్కువ పని చేస్తుంది. అందుకే తక్కువ బ్యాటరీ పవర్ ఖర్చవుతుంది. మీరు ప్రయాణిస్తున్నప్పుడు ఇది చాలా ఉపయోగకరంగా ఉంటుంది.
అలాగే మీరు పని చేస్తున్నప్పుడు, చదువుతున్నప్పుడు లేదా విశ్రాంతి తీసుకుంటున్నప్పుడు మీరు ఎయిర్ప్లేన్ మోడ్‌ని యాక్టివేట్‌ చేసుకోవచ్చు. అదేవిధంగా మొబైల్ నెట్వర్క్ సమస్యలను పరిష్కరించడానికి కూడా ఎయిర్ప్లేన్ మోడ్ ఉపయోగించబడుతుంది. మీ స్మార్ట్ఫోన్ లో నెట్వర్క్ సరిగ్గా లేకుంటే ఒకసారి ఎయిర్ప్లేన్ మోడ్‌ను ఆన్ చేసి, 2 నిమిషాల తర్వాత ఆఫ్ చేయాలి. దీని సహాయంతో మీరు మీ ఫోన్ లోని నెట్వర్క్ ను పరిష్కరించవచ్చు. ఎలక్ట్రోమాగ్నెటిక్ రేడియేషన్ ప్రమాదం ఎక్కువగా ఉన్న ప్రదేశాలలో స్మార్ట్ఫోన్ ఎయిర్ప్లేన్ మోడ్ చాలా ఉపయోగకరంగా ఉంటుంది. అందుకే మీరు అలాంటి ప్రమాదం ఉన్న ప్రదేశంలో ఉంటే, ఎయిర్ప్లేన్ మోడ్‌ను ఆన్ చేయడం మంచిది. మొబైల్ ఫోన్లు విడుదల చేసే రేడియేషన్ ఆరోగ్యంపై తీవ్ర ప్రభావం చూపుతున్న సంగతి తెలిసిందే. అయితే అవసరం లేనప్పుడు ఫోన్ ను ఫ్లైట్ మోడ్ లో ఉంచడం ద్వారా ఈ రేడియేషన్ ను చాలా వరకు తగ్గించుకోవచ్చని టెక్ నిపుణులు చెబుతున్నారు.