WhatsApp Business Summit : ముంబై వేదికగా జరిగిన మూడవ వార్షిక బిజినెస్ సమ్మిట్లో వాట్సాప్ సంస్థ సరికొత్త విప్లవాత్మక కృత్రిమ మేధస్సు (AI) సాంకేతికతను పరిచయం చేసింది. వ్యాపార సంస్థలు తమ కస్టమర్లతో నిరంతరం సంప్రదింపులు జరుపుతూ, 24/7 కార్యకలాపాలను సాగించేందుకు వీలుగా ‘మెటా బిజినెస్ ఏజెంట్’ (Meta Business Agent) అనే సరికొత్త ఏఐ ఏజెంట్ను అధికారికంగా ప్రకటించింది. ఈ ఏఐ టూల్ ద్వారా ప్రతి చిన్న, పెద్ద వ్యాపార సంస్థ వెనుక ఒక అంతులేని మానవ బృందం ఉన్నట్లుగా, కస్టమర్ అడిగే ప్రశ్నలకు క్షణాల్లో సమాధానాలు లభిస్తాయి. మెటా మేనేజింగ్ డైరెక్టర్ అరుణ్ శ్రీనివాస్ తెలిపిన వివరాల ప్రకారం, ప్రపంచంలోనే సంభాషణాత్మక వ్యాపారానికి (Conversational Business) భారతదేశం అత్యంత వేగంగా వృద్ధి చెందుతున్న మార్కెట్ అని, ఈ ప్రయాణంలో ఏఐ ఏజెంట్ తదుపరి మైలురాయిగా నిలుస్తుందని స్పష్టం చేశారు.
గేమ్ ఛేంజర్గా మారిన ఏఐ ప్లాట్ఫామ్
పెద్ద ఎంటర్ప్రైజ్ సంస్థలు తమ అవసరాలకు అనుగుణంగా ఈ ఏఐ ఏజెంట్ను అనుకూలీకరించుకోవడానికి (Customize) వీలుగా ‘మెటా బిజినెస్ ఏజెంట్ ప్లాట్ఫామ్’ కూడా అందుబాటులోకి వచ్చింది. ఇది షాపిఫై, జెన్డెస్క్ వంటి పాపులర్ బిజినెస్ సిస్టమ్స్తో సులభంగా అనుసంధానం అవుతుంది. కస్టమర్ల ప్రశ్నలకు స్పందించడం, కేటలాగ్ నుండి ప్రొడక్ట్స్ను సిఫార్సు చేయడం, అపాయింట్మెంట్లు బుక్ చేయడంతో పాటు సేల్స్ క్లోజ్ చేయడంలో కూడా ఇది అద్భుతంగా పనిచేస్తుంది. ఈ ఏఐ టూల్ను ముందే స్వీకరించిన స్విగ్గీ (డెలివరీ పార్టనర్ ఆన్బోర్డింగ్ కోసం), మధులికా ఎంటర్ప్రైజెస్ (బ్యూటీ కస్టమర్ల విచారణల కోసం) మరియు కైజెన్ అడ్వెంచర్స్ లాంటి సంస్థలు దీనిపై హర్షం వ్యక్తం చేశాయి. మధులికా ఎంటర్ప్రైజెస్ వ్యవస్థాపకురాలు మాట్లాడుతూ, ఈ ఏఐ వల్ల తమ వ్యాపార కన్వర్షన్ రేట్ 25-30% పెరిగిందని, రోజువారీ పనిభారం సగానికి పైగా తగ్గిందని ప్రశంసించారు.