IPL 2026: ఐపీఎల్ 2026.. జ‌ట్లు మార‌నున్న ముగ్గురు స్టార్ ఆట‌గాళ్లు?

IPL 2026: ఇండియన్ ప్రీమియర్ లీగ్ 2026 (IPL 2026) ప్రారంభం కావడానికి ఇంకా దాదాపు 8 నెలలు ఉంది. తదుపరి సీజన్‌కు సంబంధించి ఇప్పటి నుంచే కదలిక మొదలైంది. IPL 2026 కోసం ట్రేడ్ విండో గత సీజన్ ముగిసినప్పటి నుంచే ప్రారంభమైంది. అప్పటి నుంచి పెద్ద ఆటగాళ్లు ట్రేడ్ అవుతారనే ఊహాగానాలు జోరందుకున్నాయి. అందుతున్న నివేదికల ప్రకారం.. సంజు శాంసన్ సహా ముగ్గురు భారతీయ ఆటగాళ్ల జట్లు తదుపరి సీజన్‌లో మారే అవకాశం ఉంది.

ట్రేడ్ ద్వారా ముగ్గురు ఆటగాళ్లు జట్లు మారే అవకాశం

సంజు శాంసన్

అందిన నివేదికల ప్రకారం.. చెన్నై సూపర్ కింగ్స్ (CSK), రాజస్థాన్ రాయల్స్ కెప్టెన్, స్టార్ వికెట్ కీపర్-బ్యాట్స్‌మెన్ సంజు శాంసన్‌ను ట్రేడ్ ద్వారా తమ జట్టులోకి తీసుకోవడానికి ఆసక్తి చూపింది. వచ్చే ఏడాది శాంసన్ CSK జట్టులో చేరవచ్చని పలు నివేదికలు పేర్కొంటున్నాయి. MS ధోని తర్వాత CSKకి ఒక అనుభవజ్ఞుడైన, మంచి వికెట్ కీపర్-బ్యాట్స్‌మెన్ అవసరం ఉంది. అందుకే వారు శాంసన్‌ను తమ జట్టులోకి తీసుకోవాలనుకుంటున్నారు. తాజా నివేదికల ప్రకారం శాంసన్ RR కోచ్‌తో సమావేశమయ్యారని, అయితే CSKతో ట్రేడ్ పుకార్లు ఇంకా బలంగానే ఉన్నాయని తెలుస్తోంది.

Also Read: Caste Census Report: ప్ర‌భుత్వానికి కులగణన నివేదికను స‌మ‌ర్పించిన క‌మిటీ!

ఇషాన్ కిషన్

భారత వికెట్ కీపర్-బ్యాట్స్‌మెన్ ఇషాన్ కిషన్ IPL 2025లో సన్‌రైజర్స్ హైదరాబాద్ తరపున ఆడాడు. అతని ప్రదర్శన పర్వాలేదు అనిపించింది (14 మ్యాచ్‌ల్లో 354 పరుగులు). నివేదికల ప్రకారం.. ఇషాన్ వచ్చే సీజన్‌లో ట్రేడ్ ద్వారా కోల్‌కతా నైట్ రైడర్స్ (KKR) జట్టులోకి వెళ్ళే అవకాశం ఉంది. KKRకి ఒక మంచి వికెట్ కీపర్-బ్యాట్స్‌మెన్ అవసరం ఉంది. అందుకే KKR కిషన్‌పై ఆసక్తి చూపుతుంద‌ని వార్త‌లు వ‌స్తున్నాయి.

వెంకటేష్ అయ్యర్

KKR వెంకటేష్ అయ్యర్‌ను రూ. 23.75 కోట్లకు జట్టులోకి తీసుకుంది. కానీ అతను పెద్దగా రాణించలేకపోయాడు. IPL 2025లో అయ్యర్ దాదాపు 21 సగటుతో కేవలం 142 పరుగులు మాత్రమే చేశాడు. KKR జట్టుకు ఒక మంచి భారతీయ వికెట్ కీపర్-బ్యాట్స్‌మెన్ అవసరం ఉండగా హైదరాబాద్‌కు బంతి, బ్యాట్ రెండింటితోనూ సహకరించగల మంచి ఆల్‌రౌండర్ అవసరం. నివేదికల ప్రకారం.. ఇదే కారణంతో KKR అయ్యర్‌ను కిషన్‌తో ట్రేడ్ చేయాలని ఆలోచిస్తోంది.