బాధ‌లోనూ జ‌ట్టులో చేర‌నున్న రింకూ సింగ్‌!

Rinku Singh: టీ20 ప్రపంచకప్ 2026 మధ్యలో టీమ్ ఇండియా స్టార్ బ్యాటర్ రింకూ సింగ్‌కు శుక్రవారం, ఫిబ్రవరి 27న అత్యంత విషాదకరమైన వార్త ఎదురైంది. కొంతకాలంగా లివర్ క్యాన్సర్‌తో పోరాడుతున్న ఆయన తండ్రి ఖాన్‌చంద్ర సింగ్ తుదిశ్వాస విడిచారు. తండ్రిని కోల్పోవడం ఏ కొడుకైనా తట్టుకోలేని విషయం. కానీ ఇలాంటి కఠిన పరిస్థితుల్లో కూడా రింకూ తన కుటుంబ బాధ్యతలను, దేశం పట్ల తన కర్తవ్యాన్ని సమన్వయం చేసుకుంటూ ధైర్యానికి నిదర్శనంగా నిలిచారు.

తండ్రి అంత్యక్రియలు పూర్తి చేసిన తర్వాత రింకూ మళ్ళీ టీమ్ ఇండియాతో చేరడానికి సిద్ధమయ్యారు. వెస్టిండీస్‌తో జరగబోయే కీలకమైన సూపర్-8 పోరుకు ముందు ఆయన జట్టుతో కలుస్తారు. ఈ విషయాన్ని బీసీసీఐ (BCCI) కార్యదర్శి దేవాజిత్ సైకియా స్వయంగా ధృవీకరించారు.

వెస్టిండీస్ మ్యాచ్‌కు ముందు జట్టుతో కలవనున్న రింకూ సింగ్

ఐఏఎన్ఎస్ (IANS) నివేదిక ప్రకారం.. రింకూ సింగ్ శనివారం కోల్‌కతాలో టీమ్ ఇండియాతో కలుస్తారని బీసీసీఐ కార్యదర్శి దేవాజిత్ సైకియా తెలిపారు. తండ్రి మరణం తర్వాత ఇంటికి వెళ్లిన రింకూ వెస్టిండీస్‌తో మ్యాచ్‌ కోసం తిరిగి జట్టులో చేరుతున్నారు. ఖాన్‌చంద్ర సింగ్ లివర్ క్యాన్సర్‌తో కన్నుమూశారు. ఆయన ఆరోగ్యం విషమించడంతో ఫిబ్రవరి 21న గ్రేటర్ నోయిడాలోని యథార్థ్ ఆసుపత్రిలో చేర్పించారు. అక్కడ ఆయన వెంటిలేటర్ పైన చికిత్స పొందారు.

శుక్రవారం తెల్లవారుజామున ఆయన తుదిశ్వాస విడిచారు. అంత్యక్రియల్లో పాల్గొనేందుకు రింకూ ఉదయం 5 గంటలకు చెన్నై నుండి ఢిల్లీకి బయలుదేరారు. అంతకుముందు కూడా తండ్రి ఆరోగ్యం విషమించినప్పుడు రింకూ ఆయన వద్దే ఉన్నారు. ఆ తర్వాత జింబాబ్వేతో మ్యాచ్‌కు ముందు చెన్నైలోని ఎంఏ చిదంబరం స్టేడియంలో జట్టుతో కలిసినా, ప్లేయింగ్ ఎలెవన్‌లో అవకాశం దక్కలేదు. ఆ మ్యాచ్‌లో సంజూ శాంసన్, అభిషేక్ శర్మ ఓపెనింగ్ చేశారు.

Also Read: ఐపీఎల్ 2026.. మార్చి 29న తొలి మ్యాచ్‌?!

భారత్‌కు ‘డూ ఆర్ డై’ మ్యాచ్

టీ20 ప్రపంచకప్ 2026 సూపర్-8లో భాగంగా డిఫెండింగ్ ఛాంపియన్ టీమ్ ఇండియా ఆదివారం, మార్చి 1న వెస్టిండీస్‌తో ‘డూ ఆర్ డై’ (గెలిస్తేనే సెమీస్) పోరులో తలపడనుంది. ఈ మ్యాచ్‌లో గెలిచిన జట్టు నేరుగా సెమీఫైనల్స్‌కు చేరుకుంటుంది. సూపర్-8లో గ్రూప్-1 నుండి దక్షిణాఫ్రికా ఇప్పటికే సెమీస్ బెర్త్ ఖాయం చేసుకోగా, జింబాబ్వే టోర్నీ నుండి నిష్క్రమించింది. ఇప్పుడు రెండో సెమీఫైనలిస్ట్ ఎవరో ఈ భారత్-వెస్టిండీస్ మ్యాచ్ ఫలితంతో తేలనుంది.

ఈ ప్రపంచకప్‌లో రింకూ సింగ్ ఇప్పటివరకు ఆశించిన స్థాయిలో రాణించలేకపోయాడు. ఆడిన 5 ఇన్నింగ్స్‌ల్లో కేవలం 24 పరుగులు మాత్రమే చేశాడు (దక్షిణాఫ్రికాతో మ్యాచ్‌లో డకౌట్ అయ్యారు). జింబాబ్వేతో జరిగిన గత మ్యాచ్‌లో రింకూ స్థానంలో సంజూ శాంసన్‌కు అవకాశం దక్కింది. ఇప్పుడు వెస్టిండీస్‌తో జరిగే నిర్ణయాత్మక మ్యాచ్‌లో రింకూకు ప్లేయింగ్ XIలో చోటు దక్కుతుందా లేదా అనేది వేచి చూడాలి.