అహ్మదాబాద్లోని నరేంద్ర మోదీ స్టేడియం వేదికగా జరిగిన ఐసీసీ పురుషుల టీ20 ప్రపంచకప్ 2026 ఫైనల్ మ్యాచ్లో టీమిండియా అద్భుత ప్రదర్శన చేసింది. న్యూజిలాండ్తో జరిగిన తుది పోరులో 96 పరుగుల భారీ తేడాతో ఘన విజయం సాధించి కప్ను కైవసం చేసుకుంది. 2024లో దక్షిణాఫ్రికాను ఓడించి ఛాంపియన్గా నిలిచిన భారత్, ఇప్పుడు వరుసగా రెండోసారి టైటిల్ గెలిచి టీ20 ఫార్మాట్లో తన ఆధిపత్యాన్ని మరోసారి నిరూపించుకుంది.
ఈ ప్రపంచకప్ విజయాన్ని రెట్టింపు చేస్తూ, టీమిండియా కీలక స్పిన్నర్ కుల్దీప్ యాదవ్ తన వ్యక్తిగత జీవితంలో కొత్త అధ్యాయాన్ని ప్రారంభించబోతున్నాడు. తన చిన్ననాటి స్నేహితురాలు వంశికను వివాహం చేసుకోనున్నట్లు కుల్దీప్ ప్రకటించాడు. వీరి వివాహం ఈ నెల 14న ముస్సోరిలో అంగరంగ వైభవంగా జరగనుంది. ఈ ప్రపంచకప్కు ముందే 2025 జూన్ 4న కుల్దీప్, వంశికల నిశ్చితార్థం లక్నోలో జరిగింది.
కుల్దీప్ కాబోయే భార్య వంశిక, కాన్పూర్లోని శ్యామ్ నగర్ నివాసి. ఆమె ఎల్ఐసీలో ఉద్యోగం చేస్తున్నారు. చిన్ననాటి నుంచి మంచి స్నేహితులైన వీరిద్దరి బంధం ప్రేమగా మారింది. వివాహం అనంతరం ఈ నెల 17న లక్నోలోని సెంట్రమ్ హోటల్లో గ్రాండ్ రిసెప్షన్ ఏర్పాటు చేశారు. ఈ వేడుకకు పలువురు క్రికెటర్లు, సినీ ప్రముఖులు, రాజకీయ నాయకులు హాజరుకానున్నట్లు తెలుస్తోంది. కుల్దీప్ తండ్రి రామ్ సింగ్ యాదవ్, ఈ వివాహ వేడుకకు ఉత్తరప్రదేశ్ ముఖ్యమంత్రి యోగి ఆదిత్యనాథ్ను కూడా స్వయంగా ఆహ్వానించారు.
వివాహానికి ఒక రోజు ముందు, మార్చి 13న ముస్సోరిలోని ఓ రిసార్టులో మెహందీ, హల్దీ కార్యక్రమాలను నిర్వహించనున్నారు. వాస్తవానికి వీరి పెళ్లి నవంబర్లో జరగాల్సి ఉన్నప్పటికీ, కుల్దీప్ బిజీ షెడ్యూల్ కారణంగా ప్రపంచకప్ ముగిసిన వెంటనే చేసుకోవాలని ఇరు కుటుంబాలు నిర్ణయించుకున్నాయి.