Mohammed Siraj: చెన్నై సూపర్ కింగ్స్ మాజీ బ్యాటర్ సుబ్రహ్మణ్యం బద్రీనాథ్ అమెరికాతో జరిగిన టీ20 వరల్డ్ కప్ 2026 తొలి మ్యాచ్లో మహమ్మద్ సిరాజ్ ప్రదర్శనపై ప్రశంసలు కురిపిస్తూనే ఒక సరదా వ్యాఖ్య చేశారు. కేవలం రెండు రోజుల క్రితమే జట్టులోకి వచ్చిన సిరాజ్ అప్పటివరకు ‘హైదరాబాదీ బిర్యానీ’ ఆరగిస్తూ ఉన్నాడని, అయినా మైదానంలోకి రాగానే అద్భుతంగా రాణించాడని బద్రీనాథ్ పేర్కొన్నారు.
సిరాజ్ సడన్ ఎంట్రీ
హర్షిత్ రాణా గాయపడటంతో టోర్నమెంట్కు సరిగ్గా రెండు రోజుల ముందు సిరాజ్ను చివరి నిమిషంలో జట్టులోకి తీసుకున్నారు. అగ్రశ్రేణి బౌలర్ జస్ప్రీత్ బుమ్రా అనారోగ్యం కారణంగా అమెరికాతో మ్యాచ్కు దూరం కావడంతో 31 ఏళ్ల సిరాజ్కు ప్లేయింగ్ ఎలెవన్లో చోటు దక్కింది. వచ్చిన అవకాశాన్ని అందిపుచ్చుకున్న సిరాజ్ 4 ఓవర్లలో 3/29 గణాంకాలతో సత్తా చాటాడు. భారత్ 29 పరుగుల తేడాతో విజయం సాధించడంలో కీలక పాత్ర పోషించాడు.
Also Read: వారంలో భారీగా తగ్గిన పసిడి ధరలు
‘రెండు రోజుల క్రితం బిర్యానీ తింటూ’
మ్యాచ్ అనంతరం తన యూట్యూబ్ ఛానెల్లో సిరాజ్ గురించి మాట్లాడుతూ బద్రీనాథ్ ఇలా అన్నారు. మహమ్మద్ సిరాజ్ అద్భుతంగా బౌలింగ్ చేశాడు. కేవలం రెండు రోజుల క్రితం అతను హైదరాబాద్లో బిర్యానీ తింటూ ఉన్నాడు. కానీ వరల్డ్ కప్ మ్యాచ్ కోసం అకస్మాత్తుగా పిలుపు వచ్చినప్పటికీ ఏమాత్రం తడబడకుండా చాలా బాగా బౌలింగ్ చేశాడని పేర్కొన్నాడు.
భారత బ్యాటింగ్పై విమర్శలు
అయితే భారత బ్యాటింగ్ తీరుపై బద్రీనాథ్ అసంతృప్తి వ్యక్తం చేశారు. భారత జట్టుకు కొన్ని భయానక క్షణాలు ఎదురయ్యాయి. సాధారణ అమెరికన్ బౌలింగ్ అటాక్ ముందు 45/4, 77/6 స్కోరుతో కుప్పకూలడం ఆమోదయోగ్యం కాదు. పరిస్థితులను సరిగ్గా అంచనా వేయకపోవడమే ఈ వైఫల్యానికి కారణం. పిచ్పై సీమ్, స్పిన్ ఉన్నప్పుడు బ్యాటర్లు ఆలోచించకుండా షాట్లు ఆడకూడదు. ప్రతి మ్యాచ్లోనూ ఇలా బయటపడలేరు. ఇది జట్టుకు ఒక పెద్ద పాఠం అని ఆయన విశ్లేషించారు.
సూర్య అద్భుత ఇన్నింగ్స్
ముంబైలోని వాంఖడే స్టేడియంలో ఉన్న అభిమానులకు షాక్ ఇస్తూ టీమిండియా 13వ ఓవర్లో 77/6 స్కోరుతో కష్టాల్లో పడింది. ఆ సమయంలో కెప్టెన్ సూర్యకుమార్ యాదవ్ బాధ్యతాయుతంగా ఆడి 49 బంతుల్లో 84* పరుగులు చేసి జట్టు స్కోరును 20 ఓవర్లలో 161/9కి చేర్చాడు. ఈ అద్భుత ఇన్నింగ్స్కు గానూ సూర్యకు ‘ప్లేయర్ ఆఫ్ ది మ్యాచ్’ అవార్డు లభించింది.