ఐపీఎల్ 2026 సీజన్‌కు ముందు భారీ ట్రేడ్ డీల్స్ పూర్తయ్యాయి. సంజు శాంసన్ రాజస్థాన్ రాయల్స్ నుంచి సీఎస్కేకు, రవీంద్ర జడేజా సీఎస్కే నుంచి రాజస్థాన్‌కు మారారు. అర్జున్ టెండుల్కర్ లక్నోకు, మహ్మద్ షమీ సన్‌రైజర్స్ నుంచి లక్నో సూపర్ జెయింట్స్ ఫ్రాంఛైజీకి వెళ్లాడు. మయాంక్ మార్కండే ముంబైకి, నితీష్ రాణా ఢిల్లీకి చేరాడు. సామ్ కరన్ రాయల్స్‌లో కీలక ఆటగాడిగా మారాడు. అయితే ఈ డీల్‌లో రూ. 4 కోట్ల తక్కువ ధరకు జడ్డూ ఆర్‌ఆర్‌కి వెళ్లాల్సి వచ్చింది.
ఇండియన్ ప్రీమియర్ లీగ్ అభిమానులను టెన్షన్ పెట్టిన బిగ్గెస్ట్ ట్రేడ్ డీల్ ఎట్టకేలకు కంప్లీట్ అయింది. ఎప్పుడో పూర్తవ్వాల్సిన సంజు శాంసన్ – రవీంద్ర జడేజా ట్రేడ్ డీల్ ఐపీఎల్ 2026 రిటెన్షన్ గడువు రోజున ముగిసింది. ఇకపై చెన్నై చిన్న తలా సీఎస్కేలో ఆడడు.. అలాగే రాజస్థాన్ సైలెంట్ కింగ్ సంజు శాంసన్ పింక్ జెర్సీలో కనిపించడు. ఈ విషయాన్ని ఐపీఎల్ అధికారికంగా ప్రకటించింది.
సీఎస్కే – రాజస్థాన్ స్వాప్ డీల్‌తో రవీంద్ర జడేజా పారితోషకంలో మార్పులు చోటుచేసుకున్నాయి. గతంలో సీఎస్కే జడేజాని రూ. 18 కోట్లకు రిటైన్ చేసుకున్నప్పటికీ.. ఇప్పుడు రాజస్థాన్ మాత్రం కేవలం రూ. 14 కోట్లే చెల్లించనుంది. మరోవైపు సంజు శాంసన్ మాత్రం తన ప్రస్తుత రూ.18 కోట్ల ఫీజుతోనే సీఎస్కేకు మారాడు. 177 ఐపీఎల్ మ్యాచ్‌లు ఆడిన శాంసన్ 2022లో రాయల్స్‌ను ఫైనల్స్‌కి తీసుకెళ్లిన కెప్టెన్‌గా గుర్తింపు తెచ్చుకున్నాడు.
మిగతా జట్ల ట్రేడ్ కూడా పూర్తయింది. ముంబై ఇండియన్స్‌కు గత సీజన్లలో ప్రాతినిధ్యం వహించిన అర్జున్ టెండుల్కర్‌ను లక్నో సూపర్ జెయింట్స్ తమ జట్టులోకి తీసుకుంది. సన్‌రైజర్స్ హైదరాబాద్ సీనియర్ పేసర్ మహ్మద్ షమీ కూడా ఈ మార్పుల్లో భాగమై, రిషభ్ పంత్ కెప్టెన్సీలో ఆడనున్నాడు.
ఇతర ట్రేడ్ మార్పుల్లోనూ కీలక మార్పులు కనిపించాయి. కోల్‌కతా నైట్ రైడర్స్‌కు ప్రాతినిధ్యం వహించిన మయాంక్ మార్కండే ఇకపై ముంబై ఇండియన్స్ తరఫున ఆడనున్నాడు. అలాగే, రాజస్థాన్ రాయల్స్ నుంచి నితీష్ రాణాను ఢిల్లీ క్యాపిటల్స్ ట్రేడ్ ద్వారా దక్కించుకుంది. ఈ మార్పులు ఐపీఎల్ 2026 సీజన్‌కు ముందు జట్ల కాంబినేషన్లలో భారీ మార్పులను సూచిస్తున్నాయి.
సామ్ కరన్ కూడా రాయల్స్‌కు కీలక బలంగా మారనున్నాడు. 64 ఐపీఎల్ మ్యాచ్‌లు ఆడిన ఈ ఇంగ్లండ్ ఆల్‌రౌండర్ పంజాబ్ కింగ్స్, సీఎస్కే జట్లలో కీలక పాత్ర పోషించాడు. ఇప్పుడు ట్రేడ్‌తో రాయల్స్‌లో చేరాడు, అతన్ని రూ.2.4 కోట్ల ఫీజుతోనే రాజస్థాన్ రాయల్స్ దక్కించుకుంది.