Dawood Ibrahim: రంగంలోకి దావూద్ గ్యాంగ్.. భారత్ వర్సెస్ న్యూజిలాండ్ ఫైనల్ !

Dawood Ibrahim: ఇవాళ (ఆదివారం) దుబాయ్‌ వేదికగా భారత్, న్యూజిలాండ్ మధ్య  ఛాంపియన్స్ ట్రోఫీ ఫైనల్ మ్యాచ్‌ జరగనుంది. ఆతిథ్య దేశమైన పాకిస్థాన్‌కు జట్టును పంపడానికి భారత్ నిరాకరించింది. దీంతో ఈ మ్యాచ్‌ను దుబాయ్‌లో నిర్వహిస్తున్నారు. ఈ కీలకమైన మ్యాచ్‌పై  రూ.5,000 కోట్ల వరకు పందాలు జరిగాయని అంటున్నారు. అండర్ వరల్డ్ డాన్ దావూద్ ఇబ్రహీంకు చెందిన ‘డీ కంపెనీ’ ఈ మ్యాచ్‌లపై పెద్దఎత్తున బెట్టింగ్‌లను నిర్వహిస్తోందని ప్రచారం నడుస్తోంది.  ప్రపంచవ్యాప్తంగా ఉన్న పెద్ద బుకీలు దుబాయ్‌లో(Dawood Ibrahim) రంగంలోకి దిగారని సమాచారం. ఈనేపథ్యంలో భారత్‌లోని ఢిల్లీ పోలీసుల క్రైమ్ బ్రాంచ్ విభాగం ఐదుగురు పెద్ద బుకీలను అరెస్టు చేసింది. వారు ఛాంపియన్స్ ట్రోఫీ సెమీ-ఫైనల్స్‌పై  పందెం కాశారని దర్యాప్తులో తేలింది. అరెస్టయిన వారిలో ముగ్గురికి (మనీష్ సహాని, యోగేష్ కుకేజా, సూరజ్)  దుబాయ్‌‌లోని బెట్టింగ్ మాఫియా నెట్‌వర్క్‌తో సంబంధాలు ఉన్నాయి. వారి నుంచి పోలీసులు రూ.22 లక్షల నగదును స్వాధీనం చేసుకున్నారు. ఈ ముఠాకు ప్రధాన నిర్వాహకుడు మనీష్ సహానీ. బెట్టింగ్‌లో పాల్గొనే వ్యక్తుల గొంతులను అతను రికార్డ్ చేసేవాడు. వారి బ్యాంకు ఖాతాలు, నగదు లావాదేవీలను నిర్వహించేవాడు. ఈ సమాచారాన్ని దుబాయ్ పోలీసులకు భారత్ చేరవేసింది.

Also Read :Weekly Horoscope : వారఫలాలు.. మార్చి 9 నుంచి మార్చి 15 వరకు రాశిఫలాలను తెలుసుకోండి