MS Dhoni: చెన్నై సూపర్ కింగ్స్ జట్టు ప్రస్తుతం అనేక ఇబ్బందులను ఎదుర్కొంటోంది. జట్టులోని పలువురు ఆటగాళ్లు గాయపడి టోర్నమెంట్కు దూరం కాగా మరికొందరు ఫామ్ కోసం వెతుకులాడుతున్నారు. ఈ తరుణంలో జట్టుకు ఒక మంచి వార్త అందుతోంది. జట్టు తదుపరి మ్యాచ్ ముంబై ఇండియన్స్తో ఉంది. దానికి ముందే వచ్చిన ఈ వార్త ఫ్రాంచైజీ అభిమానులకు ఎంతో సంతోషాన్ని ఇస్తోంది. దిగ్గజ వికెట్ కీపర్ బ్యాటర్ ఎంఎస్ ధోనీకి సంబంధించి ఒక పెద్ద అప్డేట్ వెలుగులోకి వచ్చింది.
గాయంతో బాధపడుతున్న ధోనీ
చెన్నై సూపర్ కింగ్స్ స్టార్ ప్లేయర్ ఎంఎస్ ధోనీ ఈ సీజన్లో ఇప్పటివరకు ఒక్క మ్యాచ్ కూడా ఆడలేదు. అతను ‘కాఫ్ ఇంజూరీ’ (కాలి పిక్క గాయం)తో బాధపడుతున్నారు. అతను మైదానంలోకి ఎప్పుడు వస్తాడా అని జట్టు, అభిమానులు ఎంతో ఆసక్తిగా ఎదురుచూస్తున్నారు. ఆ నిరీక్షణ త్వరలోనే ముగిసేలా కనిపిస్తోంది.
ముంబైపై మ్యాచ్తో ధోనీ రీ-ఎంట్రీ!
ఇండియన్ ఎక్స్ప్రెస్ నివేదిక ప్రకారం.. ముంబై ఇండియన్స్తో జరిగే మ్యాచ్లో ధోనీ మైదానంలోకి అడుగుపెట్టే అవకాశం ఉంది. ఏప్రిల్ 23న ముంబైలోని వాంఖడే స్టేడియంలో ఈ మ్యాచ్ జరగనుంది. ఈ మ్యాచ్లో సీఎస్కే విజయం సాధించడం చాలా ముఖ్యం. లేకపోతే ప్లేఆఫ్స్ దారి కష్టమవుతుంది.
Also Read: Kedarnath : నేటి నుండి కేదార్నాథ్ దర్శనం.. తెరుచుకున్న ఆలయ ద్వారాలు..
నెట్స్లో ధోనీ తీవ్ర ప్రాక్టీస్
గాయం నుండి కోలుకుంటున్న ఎంఎస్ ధోనీ ముంబైతో పోరుకు ముందు నెట్స్లో తీవ్రంగా శ్రమిస్తున్నారు. సర్ఫరాజ్ ఖాన్, ఊర్విల్ పటేల్ బ్యాటింగ్ చేస్తున్న సమయంలో సుమారు 40 నిమిషాల పాటు వికెట్ కీపింగ్ ప్రాక్టీస్ చేశారు.
బ్యాటింగ్లోనూ జోరు
ధోనీ గాయం ఇప్పుడు దాదాపు పూర్తిగా నయమైనట్లు కనిపిస్తోంది. నెట్స్లో పూర్తి సామర్థ్యంతో బ్యాటింగ్ చేయడం కూడా ప్రారంభించారు. సీఎస్కే నెట్ సెషన్లో సుమారు గంటసేపు తన బ్యాటింగ్పై కసరత్తు చేశారు.
CSK బౌలర్ల ఎదుర్కొన్న ధోనీ
ధోనీ జట్టు బౌలర్లను ఎదుర్కోవడంతో పాటు త్రో-డౌన్ల ద్వారా కూడా బ్యాటింగ్ ప్రాక్టీస్ చేశారు. ఇవన్నీ చూస్తుంటే ముంబై ఇండియన్స్తో జరిగే మ్యాచ్లో ఆయన బరిలోకి దిగడం ఖాయంగా కనిపిస్తోంది. ఒకవేళ ఆయన ఆడితే అది జట్టుకు అతిపెద్ద సానుకూల అంశం అవుతుంది.