BCCI: డిసెంబర్లో సంభవించిన దిత్యా తుపాను బాధితులకు సహాయం చేసేందుకు రెండు చారిటీ మ్యాచ్లు ఆడాలని శ్రీలంక క్రికెట్ బోర్డు, భారత క్రికెట్ నియంత్రణ మండలిని (BCCI) కోరింది. అయితే వాణిజ్యపరమైన కారణాల వల్ల బీసీసీఐ ఈ ప్రతిపాదనను తిరస్కరించింది. అయినప్పటికీ ఆగస్టులో జరగాల్సిన భారత జట్టు శ్రీలంక పర్యటన షెడ్యూల్ ప్రకారం యథాతథంగా కొనసాగుతుందని సమాచారం.
ప్రతిపాదనను బీసీసీఐ ఎందుకు తిరస్కరించింది?
శ్రీలంక క్రికెట్ అధ్యక్షుడు శమ్మి సిల్వా విలేకరులతో మాట్లాడుతూ.. డిసెంబర్ 27, 29 తేదీల్లో చారిటీ టీ20 మ్యాచ్లు నిర్వహించాలని భావించినట్లు తెలిపారు. కానీ ఆ సమయంలో వాణిజ్యపరమైన ఒప్పందాలను, ఏర్పాట్లను పూర్తి చేయలేకపోవడం వల్ల ఈ మ్యాచ్లు నిర్వహించడం సాధ్యపడలేదని వివరించారు. ఈ ‘దిత్యా’ తుపాను వల్ల శ్రీలంకలో సుమారు 1.6 బిలియన్ డాలర్ల ఆస్తి నష్టం వాటిల్లడమే కాకుండా 600 మంది ప్రాణాలు కోల్పోయారు.
Also Read: 2026లో భారత్లోకి వస్తున్న 15 కొత్త SUVలు ఇవే!
ఆగస్టులో భారత శ్రీలంక పర్యటన
ఆగస్టులో టీమ్ ఇండియా శ్రీలంక పర్యటనలో ఎలాంటి మార్పు లేదని శమ్మి సిల్వా స్పష్టం చేశారు. ఈ పర్యటనలో భాగంగా
2 టెస్ట్ మ్యాచ్లు- ఇవి ప్రపంచ టెస్ట్ ఛాంపియన్షిప్ (WTC) 2025-27 సైకిల్లో భాగంగా జరుగుతాయి.
2 టీ20 మ్యాచ్లు- టెస్ట్ సిరీస్తో పాటు ఇవి కూడా జరుగుతాయి.
అంతేకాకుండా వచ్చే వారం పాకిస్థాన్తో జరగనున్న 3 టీ20 మ్యాచ్ల ద్వారా వచ్చే ఆదాయాన్ని కూడా తుపాను సహాయ నిధికి విరాళంగా ఇవ్వాలని శ్రీలంక క్రికెట్ నిర్ణయించింది. ఈ మ్యాచ్లు దంబుల్లాలో జరగనున్నాయి.
టీ20 వరల్డ్ కప్ 2026 ఏర్పాట్లు
ఫిబ్రవరి 7 నుంచి ప్రారంభం కానున్న టీ20 వరల్డ్ కప్ 2026కు భారత్తో కలిసి శ్రీలంక ఆతిథ్యం ఇస్తోంది. పాకిస్థాన్ తన అన్ని మ్యాచ్లను శ్రీలంకలోనే ఆడుతుంది. గ్రూప్-బి మ్యాచ్లన్నీ ఇక్కడే జరుగుతాయి. ఒకవేళ పాకిస్థాన్ ఫైనల్కు చేరితే, టైటిల్ పోరు కొలంబోలో నిర్వహించబడుతుంది. ఈ టోర్నీలో మొత్తం 20 జట్లు పాల్గొంటున్నాయి, వీటిని 4 గ్రూపులుగా విభజించారు.