న్యూజిలాండ్‌తో మూడో వ‌న్డే.. టీమిండియా ల‌క్ష్యం ఎంతంటే?!

India vs New Zealand: భారత్- న్యూజిలాండ్ జట్ల మధ్య ఇండోర్‌లోని హోల్కర్ స్టేడియంలో మూడు వన్డేల సిరీస్‌లో చివరి, నిర్ణయాత్మక పోరు జరుగుతోంది. మూడో వన్డేలో మొదట బ్యాటింగ్ చేసిన న్యూజిలాండ్ 50 ఓవర్లలో 8 వికెట్ల నష్టానికి 337 పరుగులు చేసింది. ఇప్పుడు సిరీస్ కైవసం చేసుకోవాలంటే టీమ్ ఇండియా ముందు 338 పరుగుల భారీ లక్ష్యం ఉంది. ఈ నేపథ్యంలో వన్డేల్లో భారత్ చేసిన అతిపెద్ద విజయవంతమైన రన్ ఛేజ్ ఎంత? అలాగే టీమ్ ఇండియా ఇండోర్‌లో 338 పరుగుల లక్ష్యాన్ని అందుకోగలదా? అనేది ఇప్పుడు పెద్ద ప్ర‌శ్న‌.

ముందుగా చెప్పాలంటే భారత జట్టు వన్డేల్లో 362 పరుగులు చేసి కూడా మ్యాచ్ గెలిచింది. టీమ్ ఇండియా ఈ ఘనతను 2013లో ఆస్ట్రేలియాపై సాధించింది. అప్పట్లో కంగారూలపై కేవలం 43.3 ఓవర్లలోనే 362 పరుగులు చేసి భారత్ విజయం సాధించింది. ఇది కాకుండా ఇంగ్లండ్‌పై కూడా ఛేజింగ్‌లో 356 పరుగులు చేసి టీమ్ ఇండియా గెలిచింది. 2017లో జరిగిన ఆ మ్యాచ్‌లో మరో 11 బంతులు మిగిలి ఉండగానే భారత్ విజయాన్ని అందుకుంది. ఇక వన్డేల్లో ప్రపంచంలోనే అత్యధిక రన్ ఛేజ్ చేసిన రికార్డు దక్షిణాఫ్రికా పేరిట ఉంది. 2006లో దక్షిణాఫ్రికా 438 పరుగులు చేసి చారిత్రాత్మక విజయాన్ని సాధించింది.

Also Read: తనపై తనే కోప్పడ్డ కోహ్లీ.. వీడియో వైర‌ల్‌!

మూడో వన్డేలో సెంచరీలు బాదిన డారిల్ మిచెల్- గ్లెన్ ఫిలిప్స్

ఇండోర్‌లోని హోల్కర్ స్టేడియంలో వన్డేల్లో అత్యధిక స్కోరు సాధించిన జట్టుగా న్యూజిలాండ్ నిలిచింది. హోల్కర్ స్టేడియంలో అత్యధిక పరుగులు చేసిన విదేశీ జట్టు రికార్డు గతంలో కూడా న్యూజిలాండ్ పేరిట (2023లో భారత్‌పై 295 పరుగులు) ఉండేది. కానీ ఇప్పుడు కివీస్ జట్టు తన రికార్డును తానే సవరించుకుంటూ ఇక్కడ 337 పరుగుల భారీ స్కోరును నమోదు చేసి చరిత్ర సృష్టించింది.

న్యూజిలాండ్ తరఫున డారిల్ మిచెల్ మరోసారి శతకంతో మెరిశాడు. ఈసారి మిచెల్ 131 బంతుల్లో 137 పరుగుల ఇన్నింగ్స్ ఆడాడు. అతని బ్యాట్ నుంచి 15 ఫోర్లు, 3 సిక్సర్లు వచ్చాయి. అలాగే గ్లెన్ ఫిలిప్స్ 88 బంతుల్లో 106 పరుగులు సాధించాడు. ఫిలిప్స్ 9 ఫోర్లు, 3 సిక్సర్లు బాదాడు. కెప్టెన్ మైఖేల్ బ్రేస్‌వెల్ 18 బంతుల్లో 28 పరుగులతో అజేయంగా నిలిచాడు. అతను ఒక ఫోర్, మూడు సిక్సర్లు కొట్టాడు.