IND vs SA: భారత్, దక్షిణాఫ్రికాల (IND vs SA) మధ్య జరిగిన 3 మ్యాచ్‌ల వన్డే సిరీస్‌లో తొలి మ్యాచ్ రాంచీలో జరిగింది. ఈ మ్యాచ్‌లో రోహిత్ శర్మతో పాటు విరాట్ కోహ్లీ అద్భుతంగా బ్యాటింగ్ చేశారు. రోహిత్ శర్మ అర్ధ సెంచరీ చేయగా, విరాట్ కోహ్లీ శతకం సాధించాడు. అదనంగా కేఎల్ రాహుల్ కూడా అర్ధ సెంచరీ చేశాడు. దక్షిణాఫ్రికా తరఫున మాథ్యూ బ్రీట్‌జ్కే, మార్కో జాన్సెన్, కార్బిన్ బాష్ అర్ధ సెంచరీలు చేశారు. బౌలింగ్‌లో భారత్ తరఫున హర్షిత్ రాణా, కుల్దీప్ యాదవ్ రాణించారు. ఈ మ్యాచ్‌ను భారత్ 17 పరుగుల తేడాతో గెలుచుకుని, సిరీస్‌లో 1-0 ఆధిక్యం సాధించింది.
భారత్ భారీ స్కోరు
ఓపెనర్‌గా బరిలోకి దిగిన రోహిత్ శర్మ 51 బంతుల్లో 57 పరుగులు చేశాడు. యశస్వి జైస్వాల్ 16 బంతుల్లో 18 పరుగులు చేశాడు. ఇక విరాట్ కోహ్లీ 120 బంతుల్లో 135 పరుగుల అద్భుతమైన ఇన్నింగ్స్ ఆడాడు. అతను 11 ఫోర్లు, 7 సిక్సర్లు కొట్టాడు. రుతురాజ్ గైక్వాడ్ 14 బంతుల్లో 8 పరుగులు చేయగా, కేఎల్ రాహుల్ 56 బంతుల్లో 60 పరుగుల ఇన్నింగ్స్ ఆడాడు. భారత్ 50 ఓవర్లలో 8 వికెట్ల నష్టానికి 349 పరుగులు చేసింది. దక్షిణాఫ్రికా బౌలర్లలో మార్కో జాన్సెన్ 10 ఓవర్లలో 76 పరుగులిచ్చి 2 వికెట్లు తీశాడు. అతనితో పాటు నాండ్రే బర్గర్ 2, కార్బిన్ బాష్ 2, ఓట్నీల్ బార్ట్‌మాన్ కూడా 2 వికెట్లు పడగొట్టారు.
Also Read: Perfume Side Effects: పర్ఫ్యూమ్ వాడుతున్నారా? అయితే ఈ ఎఫెక్ట్స్‌ గురించి తెలుసుకోండి!
దక్షిణాఫ్రికా బ్యాటింగ్ ప్రదర్శన
350 పరుగుల లక్ష్యాన్ని ఛేదించే క్రమంలో దక్షిణాఫ్రికాకు పేలవమైన ఆరంభం లభించింది. ఓపెనర్ ఎయిడెన్ మార్‌క్రమ్ 15 బంతుల్లో 7 పరుగులు చేసి ఔటవగా, రియాన్ రికల్టన్- క్వింటన్ డి కాక్ ఖాతా తెరవకుండానే వెనుదిరిగారు. అయితే ఆ తర్వాత మాథ్యూ బ్రీట్‌జ్కే అద్భుతమైన అర్ధ సెంచరీ సాధించాడు. అతను 80 బంతుల్లో 72 పరుగుల ఇన్నింగ్స్ ఆడాడు. అతనితో పాటు టోనీ డి జోర్జి 39 పరుగులు చేయగా, డెవాల్డ్ బ్రెవిస్ 28 బంతుల్లో 37 పరుగులు చేశాడు. చివర్లో మార్కో జాన్సెన్ 39 బంతుల్లో 70 పరుగులు, బాష్ 51 బంతుల్లో 67 ప‌రుగుల‌తో దూకుడు ఇన్నింగ్స్ ఆడారు.
హర్షిత్, కుల్దీప్ యాదవ్ అద్భుతమైన బౌలింగ్
భారత్ తరఫున హర్షిత్ రాణా రెండో ఓవర్‌లోనే దక్షిణాఫ్రికాకు డి కాక్, రికల్టన్ రూపంలో రెండు పెద్ద షాక్‌లు ఇచ్చాడు. వీరిద్దరూ ఖాతా తెరవలేకపోయారు. ఆ తర్వాత కుల్దీప్ యాదవ్ కూడా చక్కగా బౌలింగ్ చేసి అర్ధ సెంచరీ చేసి అద్భుతంగా బ్యాటింగ్ చేస్తున్న బ్రెవిస్, మార్కో జాన్సెన్‌లను పెవిలియన్ చేర్చాడు. టీమిండియా బౌలింగ్‌లో కుల్దీప్ యాదవ్ 4 వికెట్లు, హర్షిత్ రాణా 3 వికెట్లు, అర్ష్‌దీప్ సింగ్ 2 వికెట్లు తీయ‌గా.. ప్ర‌సిద్ధ్ కృష్ణ ఒక వికెట్ త‌న ఖాతాలో వేసుకున్నాడు.