IND vs SA 2nd ODI: సౌతాఫ్రికాతో భారత్ (IND vs SA 2nd ODI)కు జరుగుతున్న రెండో వన్డే మ్యాచ్లో మొదట బ్యాటింగ్ చేసిన టీమిండియా 358 పరుగులు చేసింది. రాయ్పూర్లో జరిగిన ఈ మ్యాచ్లో దక్షిణాఫ్రికా టాస్ గెలిచి టీమ్ ఇండియాను ముందుగా బ్యాటింగ్కు ఆహ్వానించింది. భారత జట్టు తరఫున విరాట్ కోహ్లీ, రుతురాజ్ గైక్వాడ్ శతకాలు సాధించారు.
Also Read: Kohli- Gaikwad Centuries: సౌతాఫ్రికాతో రెండో వన్డే.. శతక్కొట్టిన కోహ్లీ, గైక్వాడ్!!
ఒక దశలో టీమ్ ఇండియాకు 400 పరుగుల స్కోర్ సాధ్యమయ్యేలా కనిపించినప్పటికీ భారత బ్యాట్స్మెన్ చివరి 10 ఓవర్లలో 74 పరుగులు మాత్రమే చేయగలిగారు. రాంచీ వన్డేలో రాణించిన రోహిత్ శర్మ ఈసారి తొందరగా ఔట్ అయ్యాడు. కేవలం 14 పరుగులు మాత్రమే చేశాడు. యశస్వి జైస్వాల్ వరుసగా రెండో మ్యాచ్లో కూడా నిరాశపరిచి 22 పరుగులు చేసి ఔటయ్యాడు. ఆ తర్వాత విరాట్ కోహ్లీ, రుతురాజ్ గైక్వాడ్ ఇన్నింగ్స్ను ముందుకు నడిపించారు. వీరిద్దరూ 195 పరుగుల భారీ భాగస్వామ్యం నెలకొల్పి భారత జట్టును మ్యాచ్లో తిరిగి నిలబెట్టారు.
రుతురాజ్ రికార్డు
మొదటగా రుతురాజ్ గైక్వాడ్ కేవలం 77 బంతుల్లో తన సెంచరీని పూర్తి చేశాడు. వన్డే క్రికెట్లో దక్షిణాఫ్రికాపై భారత బ్యాట్స్మెన్లలో ఇది రెండో అత్యంత వేగవంతమైన సెంచరీ. దక్షిణాఫ్రికాపై అత్యంత వేగవంతమైన భారత వన్డే సెంచరీ రికార్డు యూసుఫ్ పఠాన్ పేరిట ఉంది. అతను 2011లో 68 బంతుల్లోనే శతకం సాధించాడు. విరాట్ కోహ్లీ 102 పరుగులు చేసి ఇది అతని వన్డే కెరీర్లో 53వ, అంతర్జాతీయ కెరీర్లో 84వ శతకంగా నిలిచింది.
ఒక దశలో టీమ్ ఇండియా 40 ఓవర్లలో 4 వికెట్ల నష్టానికి 284 పరుగులు చేసింది. టీమ్ ఇండియా 400 పరుగుల వైపు దూసుకెళ్తున్నట్టు కనిపించింది. కానీ ఈలోగా వాషింగ్టన్ సుందర్ రనౌట్ అయ్యాడు. అయినప్పటికీ కెప్టెన్ కేఎల్ రాహుల్ ఒక వైపు నిలబడి వరుసగా రెండో మ్యాచ్లో వేగవంతమైన అర్ధ సెంచరీ సాధించాడు. రాహుల్ 43 బంతుల్లో 6 ఫోర్లు, 2 సిక్స్లతో సహా అజేయంగా 66 పరుగులు చేశాడు. అయితే చివరి 10 ఓవర్లలో భారత జట్టు కేవలం 74 పరుగులు మాత్రమే చేయగలిగింది. దీంతో స్కోరు 358 పరుగుల వద్ద ఆగిపోయింది. దక్షిణాఫ్రికా బౌలర్లలో లుంగీ ఎన్గిడి మాత్రమే 6 కంటే తక్కువ ఎకానమీ రేటుతో పరుగులు ఇచ్చాడు. అతను 10 ఓవర్లలో 51 పరుగులు ఇచ్చి ఒక వికెట్ తీసుకున్నాడు.