IND vs PAK: ఆదివారం, ఫిబ్రవరి 15వ తేదీ క్రికెట్ అభిమానులకు ఎంతో ఉత్సాహభరితంగా ఉండబోతోంది. ఈ సూపర్ సండే భారత్- పాకిస్తాన్ మధ్య ఒకటి కాదు, ఏకంగా రెండు మ్యాచ్లు జరగనున్నాయి. అంటే అభిమానులకు రోమాంచితమైన, హోరాహోరీ పోరు డబుల్ డోస్ రూపంలో లభించనుంది. ఫిబ్రవరి 15న ఒకవైపు టీ20 వరల్డ్ కప్ 2026లో భారత్-పాకిస్తాన్ జట్లు తలపడనుండగా, మరోవైపు అదే రోజు భారత్, పాకిస్తాన్ మహిళా జట్లు కూడా ముఖాముఖి తలపడనున్నాయి. భారత్-పాకిస్తాన్ మధ్య జరిగే ఈ రెండు మ్యాచ్ల వేదిక, సమయ వివరాలు ఇప్పుడు తెలుసుకుందాం.
టీ20 వరల్డ్ కప్ 2026లో భారత్ వర్సెస్ పాకిస్తాన్ పోరు
టీ20 వరల్డ్ కప్ 2026లో భాగంగా ఫిబ్రవరి 15న భారత్- పాకిస్తాన్ జట్ల మధ్య పోరు కొలంబోలోని ఆర్. ప్రేమదాస స్టేడియంలో జరగనుంది. ఈ హై-వోల్టేజ్ మ్యాచ్ భారత కాలమానం ప్రకారం సాయంత్రం 7 గంటలకు ప్రారంభమవుతుంది. టాస్ 6:30 గంటలకు వేస్తారు. రెండు జట్లు అద్భుతమైన ఫామ్లో ఉన్నాయి. ఇప్పటివరకు తమ రెండు మ్యాచ్లలోనూ విజయం సాధించాయి. సూర్యకుమార్ యాదవ్ సారథ్యంలోని టీమ్ ఇండియా యూఎస్ఏ, నమీబియాపై విజయం సాధించగా పాకిస్తాన్ నెదర్లాండ్స్, యూఎస్ఏలపై గెలుపొందింది. ఈ నేపథ్యంలో ఈ మ్యాచ్ అత్యంత ఆసక్తికరంగా, ఉత్సాహభరితంగా సాగుతుందని భావిస్తున్నారు.
Also Read: పసిడి ప్రియులకు గుడ్ న్యూస్..భారీగా దిగొచ్చిన బంగారం ధర
ఉమెన్స్ ఆసియా కప్ రైజింగ్ స్టార్స్లో భారత్-పాకిస్తాన్ ఢీ
దీనికంటే ముందుగా ఏసీసీ (ACC) ఉమెన్స్ ఆసియా కప్ రైజింగ్ స్టార్స్ 2026లో భారత్- పాకిస్తాన్ ‘ఎ’ జట్లు తలపడనున్నాయి. ఇండియా-ఎ, పాకిస్తాన్-ఎ మధ్య ఈ మ్యాచ్ థాయిలాండ్ రాజధాని బ్యాంకాక్లోని టెర్డ్థాయ్ క్రికెట్ గ్రౌండ్లో మధ్యాహ్నం 12:30 గంటలకు ప్రారంభమవుతుంది. ఇండియా-ఎ జట్టు తన మొదటి మ్యాచ్లో యూఏఈ చేతిలో ఓడిపోయింది. కాబట్టి పాకిస్తాన్-ఎ జట్టును ఓడించి టోర్నమెంట్లో పుంజుకోవాలని చూస్తోంది. దీంతో ఈ మ్యాచ్ కూడా ఎంతో ఉత్కంఠభరితంగా సాగే అవకాశం ఉంది. క్రికెట్ అభిమానులకు పగలు నుంచి రాత్రి వరకు భారత్-పాకిస్తాన్ మధ్య హై-వోల్టేజ్ మ్యాచ్లను చూసే అవకాశం దక్కనుంది.