Champions Trophy 2025: ఈసారి ఐసీసీ ఛాంపియన్స్ ట్రోఫీ (Champions Trophy 2025)కి పాకిస్థాన్ ఆతిథ్యం ఇవ్వనుంది. ఎనిమిదేళ్ల తర్వాత నిర్వహిస్తున్న ఈ టోర్నీలో పాల్గొనేందుకు భారత క్రికెట్ జట్టు పాకిస్థాన్ వెళ్తుందా లేదా? అనే విషయంపై ఇంకా స్పష్టత రాలేదు. భద్రతా కారణాల దృష్ట్యా టీమ్ ఇండియా చాలా కాలంగా పాకిస్థాన్‌లో పర్యటించడం లేదు. అయితే ఈ కాలంలో టీమిండియా పాకిస్తాన్‌లో ఆడాల్సిన అన్ని మ్యాచ్‌లను వేరే దేశంలో హైబ్రిడ్ మోడల్‌లో ఆడింది. ఇలాంటి పరిస్థితుల్లో భద్రతా కారణాల దృష్ట్యా పాకిస్థాన్‌కు ఆతిథ్యం ఇవ్వగలరా లేదా..? హైబ్రిడ్ మోడల్‌లో భారత్‌తో మ్యాచ్‌లు ఆడుతుందా అనే ప్రశ్నలు తలెత్తుతున్నాయి. దీనికి ఐసీసీ సీఈవో స్వయంగా సమాధానం ఇచ్చారు.
ఐసీసీ సీఈవో ఏం చెప్పారు?
ఈ విషయంపై ఐసీసీ సీఈవో జియోఫ్ అల్లార్డైస్ మాట్లాడుతూ.. ప్రస్తుతం పాకిస్థాన్ నుంచి ఛాంపియన్స్ ట్రోఫీని మార్చే ఆలోచన లేదని అన్నారు. టోర్నీలో పాల్గొనేందుకు పాకిస్థాన్‌లో పర్యటించేందుకు ఇప్పటివరకు ఏ జట్టు కూడా విముఖత చూపలేదు. ఇలాంటి పరిస్థితుల్లో ఈ టోర్నీని పాకిస్థాన్ నుంచి మార్చడం సబబు కాదని ఆయ‌న అన్నారు.
Also Read: Zomato : రైల్వేశాఖతో జొమాటో ఒప్పందం.. 100కుపైగా రైల్వే స్టేషన్లలో ఫుడ్ డెలివరీ
భారత జట్టు పాకిస్థాన్ వెళ్తుందా?
ఐసీసీ ఛాంపియన్స్ ట్రోఫీలో పాల్గొనేందుకు టీమ్ ఇండియా పాకిస్థాన్‌కు వెళుతుందా లేదా అనే దానిపై ఇప్పటివరకు బీసీసీఐ లేదా భారత ప్రభుత్వం అధికారికంగా ఎలాంటి ప్రకటన చేయలేదు. ఈ టోర్నీలో టీమ్ ఇండియా హైబ్రిడ్ మోడల్‌లో మాత్రమే పాల్గొంటుందని విశ్వసిస్తున్నప్పటికీ.. దీనిపై ఇప్పటి వరకు ఎలాంటి సమాచారం వెల్లడి కాలేదు.
ఈ టోర్నీలో ఆడేందుకు టీమిండియా పాక్‌లో పర్యటిస్తుందని పాకిస్థాన్ క్రికెట్ బోర్డు విశ్వసిస్తోంది. భారత క్రికెట్ జట్టు మినహా ఈ టోర్నీలో పాల్గొనే అన్ని జట్లు తమ దేశానికి వ‌చ్చి వెళ్లాయ‌ని పీసీబీ చెబుతోంది. ఈ టోర్నీలో ఆడేందుకు భారత్ రాకపోవడానికి బలమైన కారణం లేకపోలేదు.
8 జట్లు పాల్గొంటాయి
ఈ టోర్నీలో భారత్, ఆస్ట్రేలియా, న్యూజిలాండ్‌, ఇంగ్లండ్‌, దక్షిణాఫ్రికా, బంగ్లాదేశ్‌, ఆఫ్ఘనిస్థాన్‌, పాకిస్థాన్ క్రికెట్ జట్లు పాల్గొంటాయి. ఫిబ్రవరి-మార్చి 2025లో ప్రతిపాదించబడిన ఈ టోర్నమెంట్‌లోని అన్ని మ్యాచ్‌లు కరాచీ, రావల్పిండి, లాహోర్‌లలో జరుగుతాయి. భారత జట్టు భద్రతను దృష్టిలో ఉంచుకుని భారత్‌కు సంబంధించిన అన్ని మ్యాచ్‌లను లాహోర్‌లో నిర్వ‌హించ‌నున్నారు.