TG20 : తెలంగాణ టీజీ20 (TG20) లీగ్ తొలి సీజన్లో హైదరాబాద్ ఇ-ఛాంపియన్స్ అద్భుత ప్రదర్శనతో విజేతగా నిలిచి, తమ కలల అరంగేట్రాన్ని ఘనంగా చాటుకుంది. టోర్నమెంట్ అంతటా అత్యంత క్రమశిక్షణ, నిలకడైన ప్రదర్శనను కనబరిచిన హైదరాబాద్ జట్టు, నాకౌట్ దశలో ఒత్తిడిని అధిగమించి తొలి ఛాంపియన్షిప్ ట్రోఫీని ముద్దాడింది.
ఆరెంజ్, పర్పుల్ క్యాప్లతో సమష్టి విజయం
హైదరాబాద్ ఇ-ఛాంపియన్స్ అజేయమైన లీగ్ ప్రదర్శన వెనుక జట్టు సమష్టి కృషి స్పష్టంగా కనిపిస్తుంది. బ్యాటింగ్ లైనప్ను ముందుండి నడిపిన కెప్టెన్ అభిరత్ రెడ్డి అత్యధిక పరుగులు సాధించి ‘ఆరెంజ్ క్యాప్’ కైవసం చేసుకోగా, బౌలింగ్లో అజయ్ దేవ్ గౌడ్ అద్భుత స్పెల్స్తో వికెట్లు తీసి ‘పర్పుల్ క్యాప్’ సాధించాడు. వీరితో పాటు ప్రణవ్ వర్మ, ఎం.ఏ. షణ్ముఖ్, వైష్ణవ్ రెడ్డి, గణేష్ గడుగులు బ్యాటింగ్, బౌలింగ్, ఫీల్డింగ్ విభాగాలలో కీలక సమయాల్లో రాణించి మ్యాచ్ ఫినిషర్లుగా విలువైన సహకారాన్ని అందించారు. మైదానంలో ప్రతి ఒక్క ఆటగాడు బాధ్యతాయుతంగా ఆడుతూ ఒత్తిడిని దరిచేరనీయకుండా ఆత్మవిశ్వాసంతో పోరాడటం వల్లే లీగ్ చరిత్రలో హైదరాబాద్ జట్టు సరికొత్త అధ్యాయాన్ని లిఖించగలిగింది.
మైదానంలో ప్రదర్శనలతో పాటు ఈ ఫ్రాంచైజీ వెనుక ఉన్న వ్యూహాత్మక మద్దతు జట్టు విజయానికి బలమైన పునాది వేసింది. రామోజీ గ్రూప్ మరియు లక్ష్య స్పోర్ట్స్ ఎకోసిస్టమ్ అందించిన ప్రోత్సాహం, దీర్ఘకాలిక ప్రణాళికలు ఆటగాళ్ల ప్రతిభను మెరుగుపరచడంలో కీలక పాత్ర పోషించాయి. క్రీడాకారుల సన్నద్ధత, టీమ్ వర్క్ మరియు మౌలిక వసతులపై పెట్టిన పెట్టుబడి ఎలాంటి ఫలితాలను ఇస్తుందో హైదరాబాద్ ఇ-ఛాంపియన్స్ సాధించిన ఈ టైటిల్ రుజువు చేసింది. కేవలం గెలవడమే కాకుండా, మైదానంలో అత్యుత్తమ క్రీడాస్ఫూర్తిని ప్రదర్శించి ఈ లీగ్ భవిష్యత్ ఎడిషన్లకు హైదరాబాద్ జట్టు ఒక కొత్త ప్రమాణాన్ని నెలకొల్పింది.