Suryakumar Yadav: ఆదివారం, మార్చి 8న భారత జట్టు సరికొత్త చరిత్ర సృష్టించింది. ఫైనల్లో న్యూజిలాండ్ను 96 పరుగుల తేడాతో ఓడించి భారత్ మొత్తంగా మూడవసారి టీ20 ప్రపంచ ఛాంపియన్గా నిలిచింది. ఎంఎస్ ధోనీ, రోహిత్ శర్మల తర్వాత టీ20 ప్రపంచకప్ను అందించిన మూడవ భారతీయ కెప్టెన్గా సూర్యకుమార్ యాదవ్ నిలిచారు. ఈ చారిత్రాత్మక విజయం తర్వాత సూర్యకుమార్ యాదవ్ మాట్లాడుతూ.. భారత జట్టు తదుపరి లక్ష్యం ఒలింపిక్స్లో గోల్డ్ మెడల్ గెలవడమేనని ప్రకటించారు.
ఒక ప్రెస్ కాన్ఫరెన్స్లో సూర్యకుమార్ యాదవ్ మాట్లాడుతూ.. ఈ ప్రపంచకప్ విజయం ఎంతో చారిత్రాత్మకమైనదని, అయితే భవిష్యత్తులో ఎదురయ్యే సవాళ్లను ఎదుర్కోవడానికి తాము సిద్ధంగా ఉన్నామని తెలిపారు.
Also Read: Myra : భారతీయ ప్రయాణికుల కోసం సరికొత్త టెక్నాలజీ
ఒలింపిక్ గోల్డ్ గెలవడమే లక్ష్యం
అదే ప్రెస్ కాన్ఫరెన్స్లో కెప్టెన్ సూర్యకుమార్ యాదవ్ ఇలా అన్నారు. ఈ విజయం చాలా ప్రత్యేకం. కానీ మా అతిపెద్ద లక్ష్యం ఒలింపిక్స్. ఒలింపిక్ గోల్డ్ మెడల్ సాధించడంతో పాటు, అదే ఏడాది జరిగే టీ20 ప్రపంచకప్ను కూడా గెలవడమే మా టార్గెట్ అని తెలిపాడు.
క్రికెట్ మొదటిసారిగా 1900 ఒలింపిక్స్లో ఆడారు. అయితే సుమారు 128 సంవత్సరాల తర్వాత 2028 లాస్ ఏంజిల్స్ ఒలింపిక్స్లో క్రికెట్ తిరిగి పునరాగమనం చేయబోతోంది. 2024 టీ20 ప్రపంచకప్ను రోహిత్ శర్మ నాయకత్వంలో గెలిచినప్పటి నుండి భారత టీ20 జట్టు మరింత దూకుడుగా ఆడుతోంది.
3 ఏళ్లలో 3 ఐసీసీ (ICC) ట్రోఫీలు
2013 ఛాంపియన్స్ ట్రోఫీ తర్వాత టీమ్ ఇండియాకు ఐసీసీ ట్రోఫీ దక్కక 11 ఏళ్లు గడిచాయి. ఐసీసీ ట్రోఫీల కోసం భారత్ ఎదురుచూపులు 2024లో ముగిశాయి. అప్పుడు టీ20 ప్రపంచకప్ ఫైనల్లో దక్షిణాఫ్రికాను 7 పరుగుల తేడాతో ఓడించి భారత్ టైటిల్ గెలుచుకుంది. ఆ తర్వాతి ఏడాది (2025) ఛాంపియన్స్ ట్రోఫీ ఫైనల్లో న్యూజిలాండ్ను 4 వికెట్ల తేడాతో ఓడించింది. ఇప్పుడు సూర్యకుమార్ యాదవ్ కెప్టెన్సీలో టీమ్ ఇండియా 2026 టీ20 ప్రపంచకప్ ట్రోఫీని ఎగురవేసింది. ఇక వచ్చే ఏడాది అంటే 2027లో వన్డే (ODI) ప్రపంచకప్ జరగనుంది. దీనికి దక్షిణాఫ్రికా, జింబాబ్వే, నమీబియా దేశాలు ఆతిథ్యం ఇవ్వనున్నాయి.