టీమిండియా స్పీడ్‌ స్టార్ ఉమ్రాన్ మాలిక్ తన పవర్ ఫుల్ కమ్ బ్యాక్ కోసం సిద్ధమవుతున్నాడు. 150 కిలోమీటర్ల వేగంతో బౌలింగ్ చేయడం తన సహజమని, భారత జట్టులోకి తిరిగి వస్తానని ధీమా వ్యక్తం చేశాడు. గాయాల నుంచి కోలుకున్న ఉమ్రాన్ వేగంతో వేసే బంతులతో పాటు స్లో బంతులు, యార్కర్లు కూడా ప్రాక్టీస్ చేస్తున్నానని చెప్పాడు. సయ్యద్ ముస్తాక్ అలీ ట్రోఫీలో నిరూపించుకుని త్వరలోనే జట్టులోకి వస్తానని తెలిపాడు.
టీమిండియా స్పీడ్‌స్టార్ ఉమ్రాన్ మాలిక్ బహుశా అందరికీ గుర్తే ఉండుంటాడు. ఐపీఎల్‌లో సన్‌రైజర్స్ హైదరాబాద్ తరఫున ఆడిన ఉమ్రాన్ మాలిక్ తన బౌలింగ్‌తో ప్రత్యర్థులను బెంబేలెత్తించాడు. 150 కిలోమీటర్ వేగంతో బౌలింగ్ చేస్తూ మెరుపు బంతులతో ఐపీఎల్ స్టార్‌గా ఎదిగాడు. ఎంత త్వరగా పేరు తెచ్చుకున్నోడు అంతే త్వరగా కనుమరుగయ్యాడు. సన్‌రైజర్స్ వదిలేసి తర్వాత మళ్లీ ఇప్పటి వరకు ఐపీఎల్‌లో కనిపించలేదు.
గాయాల నుంచి కోలుకున్న ఉమ్రాన్ మాలిక్ పవర్ ఫుల్ కమ్ బ్యాక్ ఇవ్వబోతున్నాడు. టీమిండియా కోసం ఆడాలన్న తన కలను నిజం చేసుకోవడానికి, తాను మళ్లీ పూర్తి జోష్‌తో సిద్ధమవుతున్నానని చెప్పాడు. 150 వేగంతో బౌలింగ్ చేసే వాళ్లే కింగ్స్ అన్న ఉమ్రాన్, ఆ సత్తా తనలోనే ఉందంటూ కాన్ఫిడెంట్‌గా చెప్పుకొచ్చాడు. ఇటీవల ఓ నేషనల్ మీడియాకు ఇంటర్వ్యూ ఇచ్చిన ఉమ్రాన్ మాలిక్ భారత జట్టులోకి తిరిగి వస్తానన్న నమ్మకం వ్యక్తం చేశాడు.
జమ్ము కశ్మీర్ – ఉత్తరప్రదేశ్ మధ్య జరిగిన సయ్యద్ ముస్తాక్ అలీ టోర్నీ మ్యాచ్ తర్వాత ఉమ్రాన్ మాలిక్ కీలక వ్యాఖ్యలు చేశాడు. 150 వేగం సాధారణ ట్రైనింగ్‌తో వచ్చేది కాదని, అది పూర్తిగా నేచురల్ అని చెప్పుకొచ్చాడు. అలా బౌలింగ్ చేయాలంటే గట్స్ ఉండాలన్నాడు. స్లో బంతులు, యార్కర్లు కూడా ప్రాక్టీస్ చేస్తున్నట్లు చెప్పాడు.
“150 వేగం ఉండే బౌలర్లు స్ట్రైక్ బౌలర్లు కాదు, అటాకింగ్ బౌలర్లు. వాళ్లు 4 ఓవర్లలో 30 ఇస్తారు, కానీ వికెట్లు కూడా తీస్తారు. 150 వేగంతో బంతులు వేయడం అంటే అది గట్స్ ఉన్న వాళ్లే చేస్తారు. 137 నుంచి 145కి నేరుగా వెళ్లలేం. 150 కిమీ వేగం అనేది ఒక ఆర్ట్. నేను ఐదేళ్లుగా దీన్ని కొనసాగిస్తున్నా. నేనే భారత్‌లో 150 బౌల్ చేసే బౌలర్‌ని. అందుకే నాకు తిరిగి టీమిండియాలో ఆడతానన్న నమ్మకం ఉంది” అని ఉమ్రాన్ మాలిక్ కాన్ఫిడెంట్‌గా చెప్పాడు.
IPL 2024లో 156.7 కిమీ వేగం నమోదు చేసిన ఉమ్రాన్, తర్వాత వరుస గాయాలబారిన పడ్డాడు. అనారోగ్యంతో బయటకెళ్లినా, తన స్పీడ్‌పై ఎప్పుడూ సందేహ పడలేదంటాడు. స్పీడ్‌కి అదనంగా స్లోయర్ బంతులు, యార్కర్లు కూడా ప్రాక్టీస్ చేస్తున్నానని చెప్పాడు. ఫిట్‌గా ఉంటూ వికెట్లు తీస్తే ఎందుకు ఆడనివ్వరు అంటూ ఉమ్రాన్ మాలిక్ ప్రశ్నించాడు. సయ్యద్ ముస్తాక్ అలీ ట్రోఫీలో ఇప్పటికే రెండు మ్యాచ్‌లలో ఐదు వికెట్లు తీసిన ఉమ్రాన్, తనను తాను నిరూపించుకుని త్వరలోనే భారత జట్టులోకి వస్తానంటూ ధీమా వ్యక్తం చేశాడు.