T20 World Cup 2026 Final : T20 2026 ఫైనల్ కు చేరింది. ఈ మెగా టోర్నీలో టీమ్ ఇండియా ఆటగాడు అభిషేక్ శర్మ ప్రదర్శన అభిమానులను తీవ్ర నిరాశకు గురి చేస్తోంది. ఇప్పటివరకు ఆడిన 7 ఇన్నింగ్స్ల్లో కేవలం 89 పరుగులు మాత్రమే చేయడం, అందులో మూడు సార్లు డకౌట్ కావడం అతని ఆత్మవిశ్వాసాన్ని దెబ్బతీసింది. ఐపీఎల్లో సిక్సర్ల వర్షం కురిపించిన ఈ లెఫ్ట్ హ్యాండ్ బ్యాటర్, అంతర్జాతీయ వేదికపై బౌన్సీ ట్రాక్లపై తడబడుతున్నట్లు కనిపిస్తోంది. ముఖ్యంగా కీలకమైన పవర్ ప్లే ఓవర్లలో దూకుడుగా ఆడే క్రమంలో వికెట్ పారేసుకోవడం టీమ్ స్కోరుపై ప్రభావం చూపుతోంది. నేటి ఫైనల్లో న్యూజిలాండ్ బౌలర్ల స్వింగ్ను ఎదుర్కొని నిలబడటం అభిషేక్కు చావోరేవో తేల్చుకోవాల్సిన పరీక్షగా మారింది.
ఫైనల్ వంటి హై-ప్రెషర్ మ్యాచ్కు ముందు హెడ్ కోచ్ గౌతమ్ గంభీర్ స్వయంగా రంగంలోకి దిగడం విశేషం. నిన్నటి ప్రాక్టీస్ సెషన్లో గంభీర్ దాదాపు 40 నిమిషాల పాటు అభిషేక్ శర్మతో ఏకాంతంగా చర్చించడం క్రీడా వర్గాల్లో ఆసక్తి రేపుతోంది. టెక్నికల్ లోపాల కంటే మానసిక ధైర్యంపైనే గంభీర్ ఎక్కువగా దృష్టి పెట్టినట్లు తెలుస్తోంది. మరోవైపు, ఓపెనర్ సంజూ శామ్సన్ అద్భుతమైన ఫామ్లో ఉండటం భారత్కు పెద్ద ప్లస్ పాయింట్. ఒకవేళ శామ్సన్కు తోడుగా అభిషేక్ కూడా తొలి 6 ఓవర్లలో తన సహజసిద్ధమైన శైలిలో విరుచుకుపడితే, కివీస్కు భారీ లక్ష్యాన్ని నిర్దేశించడం లేదా ఛేదించడం భారత్కు నల్లేరుపై నడకే అవుతుంది.
న్యూజిలాండ్ బౌలింగ్ అటాక్ ఎప్పుడూ క్రమశిక్షణతో కూడిన వైవిధ్యానికి పెట్టింది పేరు. ఆరంభంలోనే వికెట్లు తీసే ట్రెంట్ బౌల్ట్ లేదా మ్యాట్ హెన్రీ వంటి వారిని ఎదుర్కోవాలంటే అభిషేక్ కాస్త సంయమనంతో ఆడాల్సి ఉంటుంది. అభిమానులు మాత్రం “ఈ ఒక్క మ్యాచ్ ఆడితే చాలు, గత వైఫల్యాలన్నీ మర్చిపోతాం” అంటూ సోషల్ మీడియాలో పోస్ట్లు పెడుతున్నారు. తన బ్యాట్కు పనిచెప్పి, గంభీర్ నమ్మకాన్ని నిలబెట్టుకుంటే అభిషేక్ శర్మ కెరీర్కు ఇదొక టర్నింగ్ పాయింట్ అవుతుంది. మరి ఈ ‘ఫైనల్’ పోరులో మన కుర్రాడు కసితో బ్యాట్ ఝులిపిస్తాడా లేదా అన్నది మరికొద్ది గంటల్లో తేలనుంది.