Ban On Firecrackers:ఈసారి కూడా దీపావళి రోజున ఢిల్లీ ప్రజలు పటాకులు పేల్చలేరు. బాణాసంచా నిషేధాన్ని కొనసాగిస్తూ (Ban On Firecrackers) ప్రభుత్వం నోటిఫికేషన్ జారీ చేసింది. మంత్రి గోపాల్ రాయ్ తన X హ్యాండిల్‌లో నోటిఫికేషన్‌ను పోస్ట్ చేయడం ద్వారా ఆర్డర్ గురించి తెలియజేశారు. చలికాలంలో పెరుగుతున్న కాలుష్యాన్ని దృష్టిలో ఉంచుకుని నేటి నుంచి జనవరి 1, 2025 వరకు పటాకుల తయారీ, నిల్వ, అమ్మకం, కొనుగోలుపై నిషేధం ఈ ఏడాది కూడా అమల్లో ఉంటుందని ఆయన పోస్ట్‌లో రాశారు.
ఢిల్లీ వాసులందరి స‌హ‌కారం కావాల‌ని ఆయన ఎక్స్‌లో పేర్కొన్నారు. జనవరి 1, 2025లోపు బాణాసంచా తయారు చేయడం, నిల్వ చేయడం, అమ్మడం లేదా కొనుగోలు చేయడం వంటి వాటికి పట్టుబడితే వారిపై కఠిన చర్యలు తీసుకుంటారు. అన్ని శాఖలకు నోటిఫికేషన్ పంపామని, అధికారులు కూడా అప్రమత్తంగా ఉండాలని ఆదేశాలు జారీ చేశారు.
Also Read: Muthyalamma Temple Idol : హిందువుల మనోభావాలను దెబ్బతీస్తే సహించేది లేదు – ఈటెల
మంత్రి గోపాల్ రాయ్ నుంచి స్ట్రాంగ్ వార్నింగ్
చలికాలం పెరిగేకొద్దీ ఢిల్లీలో పొగ, వాయు కాలుష్యం కూడా పెరుగుతుందని ఢిల్లీ పర్యావరణ శాఖ మంత్రి గోపాల్ చెప్పారు. ఈసారి పొగమంచు, వాయు కాలుష్యాన్ని నియంత్రించేందుకు ఢిల్లీ ప్రభుత్వం కట్టుబడి ఉందన్నారు. కావున పటాకులు కాల్చడం ద్వారా వాయు కాలుష్యం వ్యాపించవద్దని ప్రజలను హెచ్చరించారు. నిర్మాణ పనుల ద్వారా లేదా ఇతర మార్గాల ద్వారా వాయు కాలుష్యాన్ని వ్యాప్తి చేయవద్దన్నారు. వాయు కాలుష్యాన్ని వ్యాపింపజేసే వారిపై ప్రభుత్వం దుమ్ము వ్యతిరేక ప్రచారాన్ని ముమ్మరం చేస్తుందని, ఎలాంటి అలసత్వం ప్రదర్శించవద్దని ఆదేశాలు జారీచేశారు. ఉత్తర్వులు, నిబంధనలను ఎవరు అతిక్రమించినా కఠిన చర్యలు తీసుకుంటామన్నారు.
కాలుష్య కారకాలపై ఫిర్యాదు చేయండి
ఢిల్లీ వాసులు ప్రభుత్వానికి సహకరించాలని, కాలుష్య కారకాలపై ఫిర్యాదు చేయాలని మంత్రి గోపాల్ రాయ్ అన్నారు. ఢిల్లీ గ్రీన్ యాప్‌లో ఫిర్యాదు చేయండని, మీరు ఫోటోలను కూడా అప్‌లోడ్ చేయవచ్చని ఆయన తెలిపారు. ఎవరైనా దుమ్ము, వాహనాల పొగ, చెత్తను తగులబెట్టడం ద్వారా కాలుష్యాన్ని వ్యాపింపజేస్తున్నట్లు కనిపిస్తే, ఫొటో క్లిక్ చేసి ప్రభుత్వానికి పంపితే వెంటనే చర్యలు తీసుకుంటామన్నారు.
ఢిల్లీ-ఎన్‌సీఆర్‌లో కాలుష్యం పెరగడం మొదలైంది
శీతాకాలం ప్రారంభం కావడంతో ఢిల్లీ-ఎన్‌సీఆర్‌లో కాలుష్యం పెరగడం ప్రారంభించింది. ఎయిర్ క్వాలిటీ ఇండెక్స్ (AQI) 200 కంటే ఎక్కువ నమోదు చేస్తోంది. ఇది ప్రజలకు ప్రమాదకరం.