తమిళనాడు రాజకీయాల్లో తన అదృష్టాన్ని పరీక్షించుకుంటున్న నటుడు విజయ్, నిన్న విడుదల చేసిన TVK మ్యానిఫెస్టో తెలంగాణలో కాంగ్రెస్ పార్టీ అమలు చేసిన ‘ఆరు గ్యారంటీల’ను తలపిస్తోందని విశ్లేషకులు అభిప్రాయపడుతున్నారు. ముఖ్యంగా సామాన్య ప్రజలను ఆకట్టుకునే ఉచిత పథకాలపై విజయ్ భారీగా దృష్టి సారించారు. తెలంగాణలో కాంగ్రెస్ ప్రభుత్వం ప్రవేశపెట్టిన 200 యూనిట్ల ఉచిత విద్యుత్ పథకాన్ని అదే విధంగా విజయ్ తన మ్యానిఫెస్టోలో చేర్చారు. కొత్తగా పార్టీ పెట్టిన విజయ్, ఇప్పటికే పక్క రాష్ట్రాల్లో సక్సెస్ అయిన మోడల్ను అనుసరించడం ద్వారా ఓటర్లలో భరోసా కల్పించాలని చూస్తున్నట్లు స్పష్టమవుతోంది.
మహిళలు మరియు రైతుల కోసం ‘తెలంగాణ’ తరహా గ్యారంటీలు
తెలంగాణ అసెంబ్లీ ఎన్నికల సమయంలో రేవంత్ రెడ్డి నేతృత్వంలోని కాంగ్రెస్ ఇచ్చిన హామీలకు, విజయ్ హామీలకు మధ్య ఆశ్చర్యకరమైన పోలికలు ఉన్నాయి. పెళ్లి కాబోయే యువతులకు తెలంగాణ కాంగ్రెస్ తులం బంగారం ఇస్తామని చెప్పగా, విజయ్ 8 గ్రాముల (తులం) బంగారాన్ని ఆఫర్ చేశారు. అలాగే మహిళలకు నెలకు రూ. 2,500 ఆర్థిక సాయం, రైతులకు రుణమాఫీ వంటి అంశాలు అచ్చం తెలంగాణ మ్యానిఫెస్టోను గుర్తుకు తెస్తున్నాయి. గ్యాస్ సిలిండర్ల విషయంలో రేవంత్ రెడ్డి రూ. 500 కే ఇస్తామని చెప్పగా, విజయ్ ఒక అడుగు ముందుకు వేసి ఏడాదికి 6 సిలిండర్లు ఉచితంగా ఇస్తామని ప్రకటించడం గమనార్హం.
కాపీ ఆరోపణలు – రాజకీయ వ్యూహంపై చర్చ
ఈ పోలికల నేపథ్యంలో సోషల్ మీడియాలో మరియు రాజకీయ వర్గాల్లో “విజయ్ మ్యానిఫెస్టోను కాపీ కొట్టారా?” అనే చర్చ నడుస్తోంది. అయితే, రాజకీయ విశ్లేషకుల ప్రకారం.. ఒక రాష్ట్రంలో విజయవంతమైన సంక్షేమ పథకాలను మరో రాష్ట్రంలో అమలు చేస్తామని చెప్పడం కాపీ కాదని, అది ఒక రాజకీయ వ్యూహం అని భావిస్తున్నారు. ప్రజల కనీస అవసరాలైన విద్యుత్, గ్యాస్, మరియు మహిళా సాధికారతపై దృష్టి పెట్టడం ద్వారా డిఎంకె (DMK), ఏఐఏడీఎంకే (AIADMK) వంటి బలమైన పార్టీలను ఢీకొట్టాలని విజయ్ భావిస్తున్నారు. ఈ ‘కాంగ్రెస్ మార్క్’ హామీలు తమిళనాట విజయ్కు ఎంతవరకు ఓట్లు రాల్చుతాయో వేచి చూడాలి.