తమిళనాడు అసెంబ్లీ ఎన్నికల ఫలితాలు రాజకీయ విశ్లేషకులను సైతం విస్మయానికి గురిచేస్తున్నాయి. పోలింగ్ ముగిసిన తర్వాత వెలువడిన ఎగ్జిట్ పోల్స్ అంచనాలు క్షేత్రస్థాయి ఫలితాలతో పొంతన లేకుండా తలకిందులయ్యాయి. దశాబ్దాల చరిత్ర ఉన్న ద్రావిడ పార్టీల సమీకరణాలను విజయ్ ‘టీవీకే’ పార్టీ పూర్తిగా మార్చేసింది. తమిళనాడు ఓటరు నాడిని పట్టుకోవడంలో దేశంలోని ప్రముఖ సర్వే సంస్థలు దాదాపు విఫలమయ్యాయి. మెజారిటీ ఎగ్జిట్ పోల్స్ అధికార డీఎంకే (DMK) కూటమి మళ్లీ అధికారంలోకి వస్తుందని లేదా అతిపెద్ద పార్టీగా నిలుస్తుందని అంచనా వేశాయి. కానీ, వాస్తవ ఫలితాల్లో డీఎంకే అనూహ్యంగా మూడో స్థానానికి పడిపోవడం అందరినీ ఆశ్చర్యానికి గురిచేస్తోంది. కేవలం యాక్సిస్ మై ఇండియా మాత్రమే విజయ్ నేతృత్వంలోని టీవీకే (TVK) పార్టీకి 98-120 స్థానాలు వస్తాయని అంచనా వేసి కొంతవరకు సక్సెస్ అయ్యింది. అయితే, ఆ సంస్థ కూడా డీఎంకే రెండో స్థానంలో ఉంటుందని చెప్పగా, ప్రస్తుతం అన్నాడీఎంకే రెండో స్థానంలో కొనసాగుతూ విశ్లేషణలను తారుమారు చేసింది.
అన్నాడీఎంకే అనూహ్య పుంజుక
ఈ ఎన్నికల్లో అన్నాడీఎంకే (AIADMK) చాపకింద నీరులా తన బలాన్ని నిరూపించుకుంది. ఎగ్జిట్ పోల్స్ ఈ పార్టీకి అతి తక్కువ సీట్లు వస్తాయని అంచనా వేయగా, ప్రస్తుతం 75కు పైగా స్థానాల్లో ఆధిక్యంలో కొనసాగుతూ రెండో పెద్ద శక్తిగా అవతరించింది. డీఎంకే వ్యతిరేక ఓటు కేవలం విజయ్ వైపు మాత్రమే కాకుండా, గణనీయంగా అన్నాడీఎంకే వైపు కూడా మళ్లినట్లు ట్రెండ్స్ సూచిస్తున్నాయి. ముఖ్యంగా గ్రామీణ నియోజకవర్గాల్లో పళనిస్వామి వర్గం తన పట్టును నిలుపుకోవడమే కాకుండా, పట్టణాల్లో కూడా మెరుగైన ప్రదర్శన కనబరుస్తోంది.
విజయ్ మేజిక్ వర్కౌట్.. ‘దళపతి’ ప్రభంజనం
మొదటి ఎన్నికల్లోనే విజయ్ స్థాపించిన టీవీకే పార్టీ మ్యాజిక్ ఫిగర్ దిశగా దూసుకుపోతుండటం తమిళ రాజకీయాల్లో పెను సంచలనం. “ఎగ్జిట్ పోల్స్ కంటే ఎగ్జాక్ట్ పోల్స్ ముఖ్యం” అని విజయ్ అభిమానులు సామాజిక మాధ్యమాల్లో ట్రెండ్ చేస్తున్నారు. ఎగ్జిట్ పోల్స్ అంచనా వేసిన దానికంటే ఎక్కువగానే విజయ్ ప్రభావం కనిపిస్తోంది. యువత, మహిళా ఓటర్లు కుల మతాలకు అతీతంగా ‘విజిల్’ గుర్తుకు ఓటు వేయడం వల్లనే ఈ చారిత్రాత్మక ఫలితం సాధ్యమైందని విశ్లేషకులు భావిస్తున్నారు. మధ్యాహ్నం నాటికి ఈ అంకెల్లో మరిన్ని మార్పులు వచ్చే అవకాశం ఉన్నప్పటికీ, ఎగ్జిట్ పోల్స్ మాత్రం పూర్తిగా విఫలమయ్యాయని స్పష్టమవుతోంది.