తమిళనాడు అసెంబ్లీ ఎన్నికల ఫలితాల్లో దళపతి విజయ్ నేతృత్వంలోని ‘తమిళగ వెట్రి కళగం’ (TVK) పార్టీ ప్రభంజనం సృష్టిస్తుండటంతో రాష్ట్రవ్యాప్తంగా పండుగ వాతావరణం నెలకొంది. రాజకీయాల్లో సరికొత్త రికార్డులు లిఖిస్తూ విజయ్ దూసుకెళ్తుండటంతో ఆయన నివాసం వద్ద అభిమానుల కోలాహలం మిన్నంటుతోంది. తమిళనాడు ఎన్నికల కౌంటింగ్లో టీవీకే పార్టీ భారీ ఆధిక్యంలో కొనసాగుతుండటంతో విజయ్ నివాసం వద్ద పండుగ వాతావరణం నెలకొంది. తన కుమారుడు ముఖ్యమంత్రి కావాలని కోరుకుంటూ విజయ్ తండ్రి, ప్రముఖ దర్శకుడు ఎస్.ఎ. చంద్రశేఖర్ ఉదయమే తిరుత్తణి మురుగన్ ఆలయంలో ప్రత్యేక పూజలు నిర్వహించారు. ఫలితాల సరళిని గమనిస్తూ చంద్రశేఖర్ను కుటుంబ సభ్యులు ఆనందంతో హత్తుకున్న వీడియో ప్రస్తుతం సోషల్ మీడియాలో వైరల్ అవుతోంది. దశాబ్దాల రాజకీయ దిగ్గజాలను కాదని, కొడుకు సృష్టించిన ఈ రాజకీయ ప్రభంజనం చూసి ఆయన కళ్లలో ఆనందబాష్పాలు కనిపించాయి.
సినిమాలకు పట్టం కట్టే సంప్రదాయం
తమిళనాడు ఓటర్లు సినిమాల నుంచి వచ్చిన నాయకులను ఆదరించడం ఇదేమీ మొదటిసారి కాదని రాజకీయ విశ్లేషకులు అభిప్రాయపడుతున్నారు. తాజాగా డీఎంకే నేత ఎన్వీఎన్ సోము మాట్లాడుతూ.. “తమిళనాడు ప్రజలకు సినిమాల నుంచి వచ్చిన వారిని ఆదరించే అలవాటు ఉంది, విజయ్కు కూడా విపరీతమైన ఫ్యాన్ ఫాలోయింగ్ ఉంది” అని పేర్కొన్నారు. అయితే డీఎంకే కూడా గౌరవప్రదమైన స్థానాలను గెలుచుకుంటుందని ఆమె ఆశాభావం వ్యక్తం చేశారు. గతంలో ఎంజీఆర్, జయలలిత వంటి స్టార్లను ఆదరించిన విధంగానే, ఇప్పుడు విజయ్ను కూడా ప్రజలు తమ సొంత నాయకుడిగా స్వీకరించినట్లు ప్రారంభ ఫలితాలు స్పష్టం చేస్తున్నాయి.
అభిమానులదే అసలైన విజయం
విజయ్ విజయంలో ఆయన అభిమాన సంఘాలు, యువత కీలక పాత్ర పోషించాయి. కౌంటింగ్ కేంద్రాల వద్దకు భారీగా చేరుకున్న కార్యకర్తలు.. ‘సీఎం విజయ్’ అంటూ నినాదాలు చేస్తూ బాణసంచా కాలుస్తూ సంబరాలు చేసుకుంటున్నారు. కేవలం ఫ్యాన్ ఫాలోయింగ్తోనే కాకుండా, క్షేత్రస్థాయిలో టీవీకే కార్యకర్తలు చేసిన కృషితోనే ఈ మ్యాజిక్ ఫిగర్ సాధ్యమైందని విశ్లేషకులు చెబుతున్నారు. మధ్యాహ్నానికి అధికారిక ఫలితాలు వెలువడితే, తమిళనాడు రాజకీయాల్లో విజయ్ ఒక కొత్త శకానికి నాంది పలికినట్లేనని ఆయన మద్దతుదారులు ధీమా వ్యక్తం చేస్తున్నారు.
