ఫాదర్స్ డే కేవలం ఒక వేడుక మాత్రమే కాదు.. తండ్రులకు, తండ్రిలాంటి వ్యక్తులకు గౌరవాన్ని, కృతజ్ఞతను తెలియజేయడానికి ఒక అవకాశం. జీవితంలో మార్గదర్శకులుగా, రక్షకులుగా, స్ఫూర్తికి మూలాలుగా నిలిచే వారందరికీ ఈ రోజు అంకితం చేయబడింది. తండ్రులు తమ పిల్లలకు ఆర్థిక భద్రతను అందించడమే కాకుండా వారికి ముఖ్యమైన విలువలు, క్రమశిక్షణ, ఆత్మవిశ్వాసం, సవాళ్లను ఎదుర్కొనే సామర్థ్యాన్ని కూడా నేర్పిస్తారు. వారి సేవలను గుర్తుచేసుకుని, కృతజ్ఞతలు తెలియజేయడానికి ఈ రోజు ఒక అద్భుతమైన అవకాశంగా నిలుస్తుంది.
నవమాసాలు మోసి, ప్రేమతో మనల్ని కాపాడేది అమ్మ అయితే.. త్యాగాలతో, బాధ్యతలతో జీవితాంతం మనకు అండగా నిలబడేది నాన్న. తండ్రి మన జీవితాలకు బలమైన పునాది. కష్టసుఖాల్లో కుటుంబానికి అండగా నిలబడేది ఒక్క నాన్నే. వారి ప్రేమ, త్యాగం, మార్గదర్శకత్వాన్ని గౌరవించడానికి ప్రతి ఏడాది ఫాదర్స్ డే జరుపుకుంటారు. ఈ రోజును జూన్ నెలలోని మూడో ఆదివారం నాడు జరుపుకుంటారు. అందువల్ల ప్రతి సంవత్సరం ఫాదర్స్ డే తేదీ మారుతుంది. 2026లో ఫాదర్స్ డే జూన్ 21వ తేదీ, ఆదివారం నాడు జరుపుకుంటారు. దీని చరిత్ర, ఆసక్తికరమైన విషయాల గురించి ఇప్పుడు తెలుసుకుందాం.
ప్రతి సంవత్సరం జూన్ నెలలోని మూడో ఆదివారం నాడు భారతదేశం, అమెరికా, యునైటెడ్ కింగ్డమ్, కెనడాతో పాటు ప్రపంచంలోని అనేక దేశాల్లో ఫాదర్స్ డే జరుపుకుంటారు. అయితే, కొన్ని దేశాలు ఈ రోజును వేర్వేరు సమయాల్లో జరుపుకుంటాయి.
ఆస్ట్రేలియా: సెప్టెంబర్ మొదటి ఆదివారం
నార్వే, స్వీడన్, ఫిన్లాండ్: నవంబర్ రెండో ఆదివారం
కొన్ని కేథలిక్ దేశాలు: మార్చి 19 (సెయింట్ జోసెఫ్ డే)
వాషింగ్టన్లోని స్పోకేన్కు చెందిన సోనోరా స్మార్ట్ డాడ్ అనే మహిళను ఫాదర్స్ డే వ్యవస్థాపకురాలిగా పరిగణిస్తారు. సోనోరా తల్లి ఆమె చిన్నతనంలోనే ప్రసవ సమయంలో మరణించింది. దాంతో ఆమె తండ్రి (అతడొక పౌరయుద్ధ వీరుడు) ఒంటరిగానే సోనోరాను, ఆమె ఐదుగురు తోబుట్టువులను ఎంతో ప్రేమగా పెంచి పెద్దచేశారు.
1909లో మదర్స్ డే గురించి చర్చిలో వింటున్నప్పుడు, సోనోరాకు తండ్రుల కోసం కూడా ఒక రోజు ఉండాలనే ఆలోచన వచ్చింది. ఆమె స్థానిక చర్చిలు, YMCA, వ్యాపారులను సంప్రదించి ఫాదర్స్ డే జరపాలని కోరారు. ఆమె ప్రయత్నాల వల్ల 19 జూన్ 1910న వాషింగ్టన్ రాష్ట్రంలో మొట్టమొదటిసారిగా ఫాదర్స్ డే జరుపుకున్నారు.
ఫాదర్స్ డే టైమ్ లైన్
1910: జూన్ 19న స్పోకేన్ నగరంలో మొదటి ఫాదర్స్ డే వేడుక జరిగింది.
1924: అమెరికా అధ్యక్షుడు కాల్వ్ కూలిడ్జ్ జాతీయ ఫాదర్స్ డే ఏర్పాటుకు మద్దతు ఇచ్చారు.
1966: అధ్యక్షుడు లిండన్ బి. జాన్సన్ జూన్ మూడో ఆదివారాన్ని ఫాదర్స్ డేగా ప్రకటిస్తూ అధికారిక ఉత్తర్వులపై సంతకం చేశారు.
1972: అధ్యక్షుడు రిచర్డ్ నిక్సన్ దీనిని చట్టబద్ధం చేసి, అమెరికాలో శాశ్వత జాతీయ సెలవుదినంగా మార్చారు.
- ప్రారంభంలో ఎగతాళి: మదర్స్ డే లాగా కాకుండా, ఫాదర్స్ డే ప్రారంభమైన కొత్తలో ప్రజలు దీనిని ఒక జోక్లా చూశారు. ‘నేషనల్ క్లీన్ యువర్ డెస్క్ డే’ లాంటి పనికిరాని ప్రచారాలకు ఇది దారితీస్తుందని స్థానిక పత్రికలు వ్యంగ్యంగా రాశాయి.
- గ్రీటింగ్ కార్డ్స్ డిమాండ్: ప్రముఖ గ్రీటింగ్ కార్డ్స్ సంస్థ ‘హాల్మార్క్’ ప్రకారం, పండుగల పరంగా మార్కెట్లో కార్డులు ఎక్కువగా అమ్ముడయ్యే రోజుల్లో ఫాదర్స్ డే ఐదో స్థానంలో ఉంది.
- జర్మనీలో వింత ఆచారం: జర్మనీలో ఈ రోజును ‘మేనర్టాగ్’ (పురుషుల దినోత్సవం) అంటారు. అక్కడ పురుషులు బీర్ బండ్లతో రోడ్లపైకి వచ్చి తాగుతూ, తింటూ ఎంజాయ్ చేస్తారు. అందుకే ఆ రోజు అక్కడ పోలీసులు, అత్యవసర సేవల సిబ్బంది హై అలర్ట్లో ఉంటారు.
- థాయిలాండ్ సంప్రదాయం: థాయిలాండ్లో ఫాదర్స్ డేను రాజు పుట్టినరోజున (డిసెంబర్ 5) జరుపుకుంటారు. అక్కడ తండ్రులకు మగతనానికి ప్రతీకగా భావించే ‘క్యానా’ (Canna) పూలను బహుమతిగా ఇస్తారు.
- ఎరుపు, తెలుపు గులాబీల ప్రాముఖ్యత: ఫాదర్స్ డే అధికారిక పువ్వు గులాబీ. ఈ రోజున తండ్రి బతికి ఉంటే కృతజ్ఞతగా ఎరుపు రంగు గులాబీని, ఒకవేళ తండ్రి మరణించి ఉంటే ఆయన జ్ఞాపకార్థం తెలుపు రంగు గులాబీని ధరించడం లేదా బహుమతిగా ఇవ్వడం ఒక ఆచారం.
మన దేశంలో పాశ్చాత్య సంస్కృతి ప్రభావంతో ఈ రోజు ప్రాచుర్యంలోకి వచ్చినప్పటికీ, మన సంస్కృతిలో తండ్రిని “పితృదేవోభవ” అని దైవంతో సమానంగా పూజిస్తాం. మెట్రో నగరాల్లో పిల్లలు తండ్రులకు కేకులు కోసి, బహుమతులు (ఉదాహరణకు: వాచీలు, పర్సులు, బట్టలు) ఇచ్చి సర్ప్రైజ్ చేస్తుంటారు.