One Nation One Election : మన దేశంలో జమిలి ఎన్నికల నిర్వహణకు సంబంధించిన ‘వన్ నేషన్ వన్ ఎలక్షన్’ బిల్లులు సోమవారం రోజు(డిసెంబరు 16న) లోక్‌సభ ఎదుటకు రానున్నాయి. వీటిని లోక్‌‌సభలో కేంద్ర న్యాయశాఖ మంత్రి అర్జున్ రామ్ మేఘ్వాల్ ప్రవేశపెట్టనున్నారు. ఇప్పటికే జమిలి ఎన్నికలతో ముడిపడిన రెండు బిల్లుల కాపీలను ఈ సభలో ప్రవేశపెట్టారు. వాటి పేర్లు.. రాజ్యాంగ (129వ సవరణ) బిల్లు-2024, కేంద్రపాలిత ప్రాంతాల చట్టాల (సవరణ) బిల్లు -2024. మాజీ రాష్ట్రపతి రా‌మ్‌నాథ్ కోవింద్ సారథ్యంలోని ఉన్నతస్థాయి కమిటీ సమర్పించిన నివేదిక ఆధారంగా జమిలి ఎన్నికల నిర్వహణకు సమగ్ర ప్రణాళికను తయారు చేశారు. ఈ వివరాలన్నీ కలిపి మూడు ముసాయిదా బిల్లులను తయారు చేయించారు. వీటిలో.. రాజ్యాంగ (129వ సవరణ) బిల్లు-2024, కేంద్రపాలిత ప్రాంతాల చట్టాల (సవరణ) బిల్లు -2024లకు గురువారం రోజే (డిసెంబరు 12న) కేంద్ర క్యాబినెట్ ఆమోదం తెలిపింది. స్థానిక సంస్థల ఎన్నికలను కూడా జమిలి ఎన్నికల ప్రక్రియలో కలిపే రాజ్యాంగ సవరణ బిల్లును(One Nation One Election) మాత్రం పెండింగ్‌లో ఉంచారు.
Also Read :Forbes Powerful Women List: భార‌త్‌లో ముగ్గురు అత్యంత శ‌క్తివంత‌మైన మ‌హిళ‌లు.. కేంద్ర మంత్రికి కూడా చోటు!
రాజ్యాంగ (129వ సవరణ) బిల్లు -2024లో ముఖ్యాంశాలివీ..
- రాజ్యాంగ (129వ సవరణ) బిల్లు-2024లో లోక్‌సభ, అసెంబ్లీ ఎన్నికలను ఒకేసారి నిర్వహించడానికి సంబంధించి పలు కీలక అంశాలను ప్రస్తావించారు.
- 81వ ఆర్టికల్‌లో 82(ఏ)ను చేరుస్తామని ప్రతిపాదించారు. ఇది అపాయింటెడ్ డేట్‌ను నిర్ణయిస్తుంది. ఈ తేదీ నుంచే చట్టసభల ఐదేళ్ల గడువు అనేది మొదలవుతుంది. సార్వత్రిక ఎన్నికలు పూర్తయ్యాక చట్టసభ తొలి సమావేశం నిర్వహించే రోజున రాష్ట్రపతి నోటిఫికేషన్‌ను విడుదల చేసి ఈ మార్పులను అమల్లోకి తెస్తారు.
- ఆర్టికల్ 83, 172లను సవరించనున్నారు. తద్వారా అపాయింటెడ్ డేట్‌ కంటే ముందే ఎన్నికలు జరిగి ఏర్పడిన రాష్ట్రాల అసెంబ్లీలు, ఇంకా పూర్తికాని చట్టసభల గడువు అనేది లోక్‌సభ గడువుతో ముగిసిపోతుంది.
- అయితే లోక్‌సభ గడువు ముగియకముందే కేంద్ర ఎన్నికల సంఘం ఎన్నికలను నిర్వహించాలి.
- లోక్‌సభ ఎన్నికలతో పాటే దేశంలో అసెంబ్లీ ఎన్నికలను నిర్వహించాలి.
- ఒకవేళ దేశంలోని ఏదైనా ఒక అసెంబ్లీకి లోక్‌సభతో పాటే ఎన్నికలు నిర్వహించలేకపోతే.. ఆ అసెంబ్లీకి తదుపరిగా ఎన్నికలు నిర్వహిస్తామని ఆదేశాలు జారీ చేయాలని రాష్ట్రపతికి కేంద్ర ఎన్నికల సంఘం సిఫార్సు చేయాలి.
- అసెంబ్లీ గడువు అనేది లోక్‌సభ గడువుతోనే ముగుస్తుంది.
Also Read :30-30-30 Method : 30-30-30 పద్ధతి అంటే ఏమిటి? పొట్ట కొవ్వును తగ్గించడంలో ఎలా సహాయపడుతుంది..!
- ఆర్టికల్ 83లో క్లాస్ (2)ను చేర్చి కొన్ని సవరణలను చేయనున్నారు. ఒకవేళ లోక్‌సభ గడువు ముందుగా రద్దయితే, ఆ ఐదేళ్లలో మిగిలిన కాలాన్ని అన్ఎక్స్పైర్డ్ కాలంగా పరిగణిస్తారు. ఆ తర్వాత ఎన్నికలు నిర్వహించి కొత్త లోక్‌సభను ఎన్నుకున్నా, ఆ సభ గడువు ఈ అన్ఎక్స్పైర్డ్ కాలం మేరకే నిర్ణయం అవుతుంది.
- 172 ఆర్టికల్‌లో సబ్ క్లాజులను చేర్చి పలు సవరణలు చేయనున్నారు. ఒక వేళ ఏదైనా రాష్ట్ర అసెంబ్లీ ముందుగానే రద్దయితే, మిగిలిపోయిన కాలాన్ని అన్ఎక్స్పైర్డ్ టర్మ్‌గా పరిగణిస్తారు. అసెంబ్లీ రద్దు తర్వాత నిర్వహించిన ఎన్నికల్లో ఏర్పడే కొత్త రాష్ట్ర ప్రభుత్వం ఈ అన్ఎక్స్పైర్డ్ టర్మ్ వరకే పాలనను కొనసాగిస్తుంది.