National Herald case : నేషనల్ హెరాల్డ్ పత్రికకు సంబంధించిన మనీలాండరింగ్ కేసులో కాంగ్రెస్ కీలక నేతలు సోనియా గాంధీ, రాహుల్ గాంధీపై ఎన్‌ఫోర్స్‌మెంట్ డైరెక్టరేట్ (ఈడీ) తీవ్ర స్థాయిలో ఆరోపణలు చేసింది. ఈ కేసులో వారు దాదాపు రూ.142 కోట్ల నష్టాన్ని ప్రభుత్వానికి కలిగించినట్లు బుధవారం ఢిల్లీలోని ప్రత్యేక కోర్టులో ఈడీ వాదనలు వినిపించింది. ఈడీ తాజా వాదనల ప్రకారం, నేషనల్ హెరాల్డ్ పేరుతో అసోసియేటెడ్ జర్నల్స్ లిమిటెడ్‌ (ఏజేఎల్‌) ద్వారా జరిగిన ఆర్థిక కార్యకలాపాలు అనుమానాస్పదంగా ఉన్నాయని, విదేశీ నిధులను దుర్వినియోగం చేసి కాంగ్రెస్ నాయకులకు ప్రయోజనం చేకూరేలా ఆస్తులను లబ్ధి చేశారని అభియోగాలు వచ్చాయి. ఇదే అంశంపై గతంలో సోనియా గాంధీ, రాహుల్ గాంధీతో పాటు మరికొంతమంది కాంగ్రెస్ నేతలను ఈడీ అనేకసార్లు విచారించిన విషయం తెలిసిందే.
Read Also: What Is Golden Dome : అమెరికా రక్షణకు గోల్డెన్‌ డోమ్‌.. ఎలా పనిచేస్తుంది ?
ఈ కేసు దర్యాప్తులో భాగంగా ఈడీ ఇప్పటికే ఏజేఎల్‌కి చెందిన దాదాపు రూ.661 కోట్ల విలువైన ఆస్తులను జప్తు చేసింది. వీటి కోసం 2023 నవంబరులో ప్రత్యేక నోటీసులు జారీ చేసింది. ఈ ఆస్తులు ఢిల్లీ, ముంబయి, లఖ్నవూ వంటి నగరాల్లో ఉన్నాయని, వాటిపై ‘అక్రమ ఆస్తుల స్వాధీనం’ ప్రక్రియ కొనసాగుతోందని తెలిపింది. అక్రమ ఆస్తుల చెలామణిని నిరోధించే చట్టంలోని సెక్షన్ 5(1) ప్రకారం ఈడీ చర్యలు తీసుకుంటోంది. ప్రస్తుతం ఈ ఆస్తుల్లో నివాసం ఉంటున్నవారు లేదా వ్యాపారం నిర్వహిస్తున్నవారు ఇకపై అద్దెను ఏజెన్సీకి కాకుండా నేరుగా ప్రభుత్వానికి చెల్లించాలని ఆదేశాలు జారీ చేసింది. ఇందుకోసం ఆయా భవనాలపై నోటీసులు అంటించి సమాచారం అందజేసింది.
ఈ వ్యవహారంపై ఈడీ ఇప్పటికే ఛార్జ్‌షీట్‌ను దాఖలు చేసినట్టు సమాచారం. ఇందులో సోనియా గాంధీ, రాహుల్ గాంధీతో పాటు మరికొంతమంది పేర్లు స్పష్టంగా పేర్కొన్నది. దిల్లీ రౌస్ అవెన్యూ కోర్టులో ఈ ఛార్జ్‌షీట్‌ను ప్రాసిక్యూషన్ కంప్లయింట్‌గా దాఖలు చేశారు. తాజాగా ఈ విచారణ కోర్టులో కొనసాగింది. ఈ పరిణామాలతో కాంగ్రెస్ పార్టీకి కొత్త భారం ఏర్పడగా, పార్టీ వర్గాలు దీనిపై రాజకీయంగా సమాధానం ఇవ్వడానికి యత్నిస్తున్నాయి. ఇదిలా ఉంటే, ఈ కేసు విచారణ మరింత ముమ్మరంగా జరగనున్న నేపథ్యంలో త్వరలో మరిన్ని కీలక వివరాలు వెలుగులోకి వచ్చే అవకాశం ఉంది.