కేంద్ర ఆర్థిక మంత్రి నిర్మల సీతారామన్ పార్లమెంట్లో బడ్జెట్ ప్రవేశపెట్టే ప్రతిసారీ, ఆమె ధరించే చీర సామాన్యుల నుంచి రాజకీయ విశ్లేషకుల వరకు అందరి దృష్టిని ఆకర్షిస్తుంది. దేశ చరిత్రలో తొలిసారిగా ఒక ఆదివారం (ఫిబ్రవరి 1, 2026) బడ్జెట్ను సమర్పిస్తున్న వేళ, ఆమె తన సొంత రాష్ట్రమైన తమిళనాడుకు చెందిన కాంచీపురం పట్టు చీరలో మెరిశారు. ఊదా రంగు (Purple) నేపథ్యంపై లేత బంగారు గోధుమ రంగు చెక్స్తో ఉన్న ఈ చీర భారతీయ సంప్రదాయానికి ప్రతీకగా నిలిచింది. ముఖ్యంగా ఈ ఏడాది తమిళనాడులో అసెంబ్లీ ఎన్నికలు జరగనున్న నేపథ్యంలో, ఆమె కాంచీపురం చీరను ఎంచుకోవడం వెనుక రాజకీయ ప్రాధాన్యత కూడా ఉందనే చర్చ మొదలైంది.
నిర్మలమ్మ తన బడ్జెట్ ప్రసంగాల ద్వారా దేశంలోని వివిధ రాష్ట్రాల హస్తకళలను, చేనేత రంగాన్ని ప్రపంచానికి పరిచయం చేస్తూ వస్తున్నారు.
2019 & 2020: తెలుగు రాష్ట్రాలకు చెందిన మంగళగిరి చీరలతో తన ప్రస్థానాన్ని ప్రారంభించారు.
2021 & 2022: ఒడిశాకు చెందిన బొమ్కాయ్ మరియు కర్ణాటకకు చెందిన ఇల్కల్ చీరలను ధరించి ‘వోకల్ ఫర్ లోకల్’ నినాదానికి బలం చేకూర్చారు.
2023 & 2024: పశ్చిమ బెంగాల్కు చెందిన కంఠా వర్క్ మరియు పర్యావరణ హితానికి ప్రతీకగా ఆకుపచ్చ-పసుపు మిశ్రమ చీరలను ఎంచుకున్నారు. ఇలా ప్రతి సంవత్సరం ఆమె ఎంచుకునే రంగు మరియు ఆ ప్రాంతపు నేత ఆ సంవత్సరం బడ్జెట్ లక్ష్యాలకు లేదా సామాజిక అంశాలకు ఒక సంకేతంగా నిలుస్తూ వస్తోంది.
Nirmala Sitharaman Saree
కేవలం ఫ్యాషన్ కోసమే కాకుండా, భారతీయ సంస్కృతిని కాపాడుతున్న నేతన్నలకు మద్దతుగా నిలవడమే తన ఉద్దేశమని ఆమె ప్రతిసారీ చాటుతుంటారు. 2026 బడ్జెట్ కోసం ఎంచుకున్న ఈ కాంచీపురం పట్టు దేశ ఆర్థిక వ్యవస్థలోని గాఢతను, స్థిరత్వాన్ని ప్రతిబింబిస్తోందని విశ్లేషకులు అభిప్రాయపడుతున్నారు. గతంలో లెదర్ బ్రీఫ్కేస్కు బదులుగా ‘బహీ ఖాతా’ (ఎరుపు వస్త్రంలో చుట్టిన బడ్జెట్ పత్రాలు) ప్రవేశపెట్టి కొత్త సంప్రదాయానికి తెరలేపిన ఆమె, తన వస్త్రధారణ ద్వారా కూడా భారతీయతను చాటుతున్నారు. ఈ క్రమంలో ఈ ఏడాది ఆమె ధరించిన ఊదా రంగు రాజసానికి మరియు అభివృద్ధికి చిహ్నంగా కనిపిస్తోంది.