భారత రాజకీయ యవనికపై సినీ నటుల ప్రభావం ఎప్పుడూ చర్చనీయాంశమే. అయితే, నాలుగు దశాబ్దాల క్రితం నందమూరి తారకరామారావు (NTR) సృష్టించిన ప్రభంజనం నేటికీ ఒక అందని ద్రాక్షలాగే మిగిలిపోయింది. తాజాగా తమిళనాడులో దళపతి విజయ్ సాధించిన విజయంతో ఎన్టీఆర్ రికార్డులపై మరోసారి ఆసక్తికర చర్చ మొదలైంది. 1982లో తెలుగుదేశం పార్టీని స్థాపించిన విశ్వవిఖ్యాత నటసార్వభౌమ ఎన్టీఆర్, కేవలం 9 నెలల కాలంలోనే అధికార పీఠాన్ని కైవసం చేసుకుని ప్రపంచ రాజకీయాలనే ఆశ్చర్యపరిచారు. 1983లో జరిగిన తొలి ఎన్నికల్లోనే 201 స్థానాల్లో ఘనవిజయం సాధించడమే కాకుండా, 46.3% ఓట్ షేర్ను దక్కించుకుని ఒక అజేయమైన రికార్డును నెలకొల్పారు. ఒక ప్రాంతీయ పార్టీ తన మొదటి అడుగులోనే ఇంతటి భారీ మెజారిటీని, ఓట్ల శాతాన్ని సాధించడం అప్పట్లో ఒక సంచలనం. ఇప్పటివరకు దేశవ్యాప్తంగా ఏ సినీ నటుడు కూడా రాజకీయాల్లోకి వచ్చిన తొలి ప్రయత్నంలో ఎన్టీఆర్ స్థాయి ఫలితాలను అందుకోలేకపోయారు.
విజయ్ ‘ప్రభంజనం’: ఎన్టీఆర్ తర్వాత రెండో స్థానం
తమిళనాడు అసెంబ్లీ ఎన్నికల్లో తమిళగ వెట్రి కళగం (TVK) అధినేత విజయ్ అద్భుతమైన ప్రదర్శన కనబరిచారు. తొలి ఎన్నికల్లోనే 108 సీట్లను గెలుచుకుని, 34.92% ఓట్ షేర్తో సింగిల్ లార్జెస్ట్ పార్టీగా అవతరించడం విజయ్ కెరీర్లో అతిపెద్ద మలుపు. ఈ విజయంతో ఆయన గతంలో రాజకీయాల్లోకి వచ్చిన దిగ్గజాల రికార్డులను అధిగమించారు. చిరంజీవి (ప్రజారాజ్యం – 18 సీట్లు, 16.3% ఓట్లు), పవన్ కళ్యాణ్ (జనసేన), కమల్ హాసన్ (MNM), విజయకాంత్ (DMDK) వంటి ప్రముఖుల కంటే మెరుగైన ఫలితాలు సాధించి, ఓట్ల శాతం మరియు సీట్ల పరంగా ఎన్టీఆర్ తర్వాత రెండో స్థానంలో నిలిచి తన సత్తా చాటారు.
నాడు ఎన్టీఆర్.. నేడు విజయ్
ఎన్టీఆర్ రికార్డును విజయ్ బ్రేక్ చేయలేకపోయినప్పటికీ, ప్రస్తుత రాజకీయ పరిస్థితుల్లో 35% ఓట్లను సాధించడం సామాన్యం కాదని విశ్లేషకులు భావిస్తున్నారు. ఎన్టీఆర్ కాలంలో కాంగ్రెస్కు వ్యతిరేకంగా ‘తెలుగువారి ఆత్మగౌరవం’ అనే నినాదం బలంగా పనిచేసింది. నేడు విజయ్ కూడా ద్రవిడ పార్టీల ఆధిపత్యానికి వ్యతిరేకంగా మూడవ ప్రత్యామ్నాయంగా నిలిచి యువతను ఆకట్టుకోగలిగారు. ఎంజీఆర్ లాంటి దిగ్గజం కూడా తన సొంత పార్టీ (ADMK) పెట్టినప్పుడు సాధించిన గణాంకాల కంటే విజయ్ ఓట్ షేర్ ఎక్కువగా ఉండటం విశేషం. ఎన్టీఆర్ రికార్డు ఇప్పటికీ పదిలంగా ఉన్నా, విజయ్ సాధించిన ఈ ‘రెండో స్థానం’ దక్షిణ భారత రాజకీయాల్లో ఒక కొత్త శకానికి నాంది పలికిందని చెప్పవచ్చు.