CEC – Bill Passed : సీఈసీ, ఈసీ ఎంపికలో ఇక సీజేఐ ఉండరు.. బిల్లుకు లోక్‌సభ ఆమోదం

Election Commission

CEC – Bill Passed : అత్యంత వివాదాస్పదంగా మారిన ‘ప్రధాన ఎన్నికల కమిషనర్‌, ఇద్దరు కేంద్ర ఎన్నికల కమిషనర్ల నియామక షరతులు, పదవీకాలం బిల్లు-2023’ను  గురువారం మధ్యాహ్నం లోక్‌సభ కూడా ఆమోదించింది.  పార్లమెంటు శీతాకాల సెషన్ ప్రారంభమైన వెంటనే ఈ బిల్లుకు రాజ్యసభ ఆమోదం తెలిపింది. ప్రతిపక్షాలు వాకౌట్ చేసినా.. దీన్ని అప్పట్లో రాజ్యసభ అప్రూవ్ చేసింది. భారత ఎన్నికల సంఘం (ఈసీఐ)లోని ముగ్గురు సభ్యుల నియామకానికి సంబంధించిన విధివిధానాలను ఖరారు చేయడం ఈ బిల్లు ప్రధాన లక్ష్యం. ప్రధానమంత్రి, ప్రతిపక్ష నాయకుడు, భారత ప్రధాన న్యాయమూర్తితో కూడిన ప్యానెల్ ఎన్నికల కమిషన్‌‌లోని సభ్యులను ఎంపిక చేయాలంటూ ఈ ఏడాది మార్చిలో సుప్రీంకోర్టు రాజ్యాంగ ధర్మాసనం మార్గదర్శకాలను జారీ చేసింది. వాటికి పూర్తి విరుద్ధంగా ఈ బిల్లులోని నిబంధనలు ఉండటంతో వివాదాస్పదంగా మారింది. అయితే భారత ఎన్నికల సంఘం (ఈసీఐ)లో ప్రధాన ఎన్నికల కమిషనర్, ఇద్దరు కేంద్ర ఎన్నికల కమిషనర్ల  నియామక ప్రక్రియ నుంచి సుప్రీంకోర్టు ప్రధాన న్యాయమూర్తిని తప్పిస్తూ(CEC – Bill Passed) కొత్త బిల్లులో నిబంధనలు చేర్చారు.

We’re now on WhatsApp. Click to Join.

Also Read: CISF – Parliament : పార్ల‌మెంట్ భ‌ద్ర‌త బాధ్యత సీఐఎస్ఎఫ్‌కు

‘‘సీఈసీ, ఇతర కమిషనర్లకు సుప్రీంకోర్టు న్యాయమూర్తులతో సమానంగా వేతనాలు చెల్లించాలి’’ అనే కీలక నిబంధన కూడా కొత్త బిల్లులో ఉంది.  వాస్తవానికి ‘ప్రధాన ఎన్నికల కమిషనర్‌, ఇతర ఎన్నికల కమిషనర్ల నియామక షరతులు, పదవీకాలం బిల్లు-2023’ను  ఈ ఏడాది ఆగస్టులోనే రాజ్యసభలో ప్రవేశపెట్టగా.. అప్పుడు దీనిపై ఎలాంటి చర్చ జరగలేదు. ఆ తర్వాత సెప్టెంబరులో జరిగిన ప్రత్యేక సమావేశాల్లో బిల్లును తీసుకురావాలని భావించినా.. అది సాధ్యపడలేదు. ఎట్టకేలకు ఇప్పటికి రాజ్యసభ, లోక్‌సభల ఆమోదాన్ని ఈ బిల్లు పొందింది.