Kejriwal Five Questions: ఆప్ జాతీయ కన్వీనర్ అరవింద్ కేజ్రీవాల్ (kejriwal) ఈరోజు ఢిల్లీలోని జంతర్ మంతర్ వద్ద ‘జంతాకీ అదాలత్’ నిర్వహించారు. తీహార్ జైలు నుంచి బయటకు వచ్చిన తర్వాత జంతర్ మంతర్ వేదికగా బీజేపీని ఇరుకున పెట్టారు. ఈ సందర్భంగా కేజ్రీవాల్ రాష్ట్రీయ స్వయంసేవక్ సంఘ్ (RSS) చీఫ్ మోహన్ భగవత్ ను ఐదు ప్రశ్నలు (five questions) అడిగారు. కాగా కేజ్రీవాల్ సంధించిన ప్రశ్నలపై రాజకీయంగా చర్చ జరుగుతుంది.
పార్టీలను విచ్ఛిన్నం చేయడానికి మరియు ప్రతిపక్ష ప్రభుత్వాలను పడగొట్టడానికి మరియు అవినీతి నాయకులను తన గుప్పిట్లోకి చేర్చుకోవడానికి కేంద్ర ఏజెన్సీలను ఉపయోగించుకునే బిజెపి రాజకీయాలను ఆర్ఎస్ఎస్ అంగీకరిస్తుందా అని కేజ్రీవాల్ ప్రధాని నరేంద్ర మోడీపై విరుచుకుపడ్డారు. ఢిల్లీ ముఖ్యమంత్రి పదవికి రాజీనామా చేసిన తర్వాత తన మొదటి ‘జంతా కీ అదాలత్’ బహిరంగ సభలో కేజ్రీవాల్ రాష్ట్రీయ స్వయంసేవక్ సంఘ్ (RSS) చీఫ్ మోహన్ భగవత్‌ను ఐదు ప్రశ్నలు అడిగారు. పదవీ విరమణ వయస్సుపై బిజెపి పాలన కూడా మోడీకి వర్తిస్తుందా? అని ఆయన ప్రశ్నించారు. మేం జాతీయవాదులమని, దేశభక్తులమని ఆర్ఎస్ఎస్ వ్యక్తులు అంటున్నారని, గౌరవంగా మోహన్ భగవత్‌ను ఐదు ప్రశ్నలు అడగాలని కేజ్రీవాల్ అన్నారు. రాజకీయ నాయకులను ‘అవినీతిపరులు’ అని పిలిచి, వారిని తమ గుప్పిట్లోకి చేర్చుకునే బీజేపీ రాజకీయాలతో మీరు ఏకీభవిస్తారా అని భగవత్‌ను ప్రశ్నించారు.
అరవింద్ కేజ్రీవాల్ సంధించిన 5 ప్రశ్నలు:
1. మోడీ జి పార్టీలను విచ్ఛిన్నం చేయడం మరియు ఈడీ లేదా సిబిఐ లతో బెదిరించడం ద్వారా దేశవ్యాప్తంగా ప్రభుత్వాలను పడగొట్టడం సరైనదేనా?
2. అవినీతిపరులని తానే స్వయంగా పిలిచే అవినీతి నేతలను మోదీజీ తన పార్టీలో చేర్చుకున్నారు, ఇలాంటి రాజకీయాలను మీరు అంగీకరిస్తారా?
3. ఆర్ఎస్ఎస్ గర్భం నుంచి బీజేపీ పుట్టింది, బీజేపీ దారితప్పకుండా చూసుకోవాల్సిన బాధ్యత ఆర్‌ఎస్‌ఎస్‌పై ఉంది, మోడీ జీ తప్పుడు పనులు చేయకుండా మీరు ఎప్పుడైనా ఆపారా?
4. జేపీ నడ్డా లోక్‌సభ ఎన్నికల సమయంలో తనకు ఆర్ఎస్ఎస్ అవసరం లేదని అన్నారు. కొడుకు అంతగా ఎదిగిపోయాడా? కొడుకు మాతృసంస్థపై తన అసహనాన్ని ప్రదర్శిస్తున్నాడు. అతను ఇలా చెప్పినప్పుడు నీకు బాధ కలగలేదా?
5. 75 ఏళ్ల తర్వాత నేతలు రిటైర్ అవుతారని మీరు చట్టం చేశారు… మోడీ జీకి ఈ రూల్ వర్తించదని అమిత్ షా చెబుతున్నారు. అద్వానీ జీకి వర్తించేది మోడీ జీకి ఎందుకు వర్తించదు?.
కేజ్రీవాల్ ఇంకా మాట్లాడుతూ.. గత పదేళ్లుగా నిజాయితీగా ప్రభుత్వాన్ని నడుపుతున్నాం, కరెంటు, నీళ్లు ఉచితంగా చేశాం, ప్రజలకు వైద్యం ఉచితంగా చేశాం. విద్యను అద్భుతంగా తీర్చిదిద్దాం. మా నిజాయితీపై దాడి చేసి, ఆపై కేజ్రీవాల్, సిసోడియా మరియు ఆప్ లోని నాయకులను జైలులో పెట్టడానికి కుట్ర పన్నారన్నారు. ఢిల్లీ లిక్కర్ కేసు పదేళ్లపాటు సాగుతుందని లాయర్లు చెప్పారు. ఈ మచ్చతో నేను బతకలేనని.. అందుకే నేను ప్రజల కోర్టుకు వెళ్తానని అనుకున్నాను. నేను నిజాయితీ లేనివాడినైతే మూడు వేల కోట్లు ఎగ్గొట్టి ఉండేవాడినని కేజ్రీవాల్ తెలిపారు. కేజ్రీవాల్ దొంగనా లేదా కేజ్రీవాల్‌ను జైలుకు పంపిన వారు ఎవరు? అని ఆయన సూటిగా ప్రశ్నించారు.
ఎక్సైజ్ పాలసీ కేసులో ఐదు నెలలకు పైగా జైలు జీవితం గడిపిన తర్వాత సెప్టెంబర్ 13న తీహార్ జైలు నుంచి బెయిల్‌పై విడుదలైన కేజ్రీవాల్ దేశానికి సేవ చేసేందుకే రాజకీయాల్లోకి వచ్చానని, అధికారం లేదా పదవి కోసం కాదన్నారు. త్వరలో జరగనున్న ఢిల్లీ అసెంబ్లీ ఎన్నికలు తనకు అగ్ని పరీక్ష అని, తాను నిజాయితీపరుడని భావిస్తే ప్రజలు తనకు ఓటు వేయాలని, లేనిపక్షంలో వేయవద్దని కోరారు
Also Read: YS Jagan : వైఎస్‌ జగన్ పై హైదరాబాద్‌లో కేసు నమోదు