భోజనం తర్వాత నిద్ర ఎందుకు వస్తుంది?

Sleep After Meal: భోజనం చేసిన తర్వాత చాలా మందికి నిద్ర వస్తుంటుంది. ముఖ్యంగా మధ్యాహ్నం భోజనం తర్వాత ఇది ఎక్కువగా జరుగుతుంది. నిద్రతో పాటు కళ్లు బరువుగా అనిపించడం, ఒకవేళ నిద్రపోకపోతే తలనొప్పి రావడం వంటి సమస్యలు కూడా ఎదురవుతుంటాయి. ఇంట్లో ఉంటే పర్వాలేదు కానీ ఆఫీసులో ఉన్నప్పుడు ఈ సమస్య మరీ ఎక్కువగా ఉంటుంది. సాధారణంగా దీనిని అందరూ మామూలు విషయమే అని అనుకుంటారు. కానీ ఇది మీ పనికి ఆటంకం కలిగిస్తుంటే మాత్రం ఖచ్చితంగా దృష్టి పెట్టాలి. పరిశోధనల ప్రకారం.. భోజనం తర్వాత విపరీతంగా నిద్ర రావడం శరీరంలోని ఏదైనా అనారోగ్యానికి సంకేతం కావచ్చు. నిపుణుల ప్ర‌కారం.. అవసరానికి మించి నిద్ర వస్తోందంటే మీ శరీరం ఏదో ఒక వ్యాధితో పోరాడుతోందని అర్థం.

భోజనం తర్వాత నిద్ర ఎందుకు వస్తుంది?

మనం ఆహారం తీసుకున్న తర్వాత మన పేగులు ఆ ఆహారాన్ని జీర్ణం చేసే పనిలో నిమగ్నమవుతాయి. ఈ సమయంలో శరీరంలోని రక్త ప్రసరణ ఎక్కువగా పొట్ట వైపు మళ్లుతుంది. దీనివల్ల రక్తంలో చక్కెర స్థాయిలు తగ్గుతాయి. ఫలితంగా శరీరం విశ్రాంతి మోడ్‌లోకి వెళ్లి, మెదడు నెమ్మదిస్తుంది. అందుకే మనకు నిద్ర వస్తున్నట్లు అనిపిస్తుంది.

Also Read: పాదయాత్ర పై క్లారిటీ ఇచ్చిన వైఎస్ జగన్

నిద్ర రావడానికి ఇతర కారణాలు

• వేయించిన, నూనె పదార్థాలు ఎక్కువగా తినడం.
• ఆహారంలో కార్బోహైడ్రేట్లు ఎక్కువగా ఉండటం.
• తిన్న వెంటనే పడుకునే అలవాటు ఉండటం.

అతిగా నిద్ర రావడం ఏ వ్యాధులకు సంకేతం?

డయాబెటిస్ (మధుమేహం): తిన్న తర్వాత విపరీతంగా నిద్ర రావడం డయాబెటిస్ లక్షణం కావచ్చు. భోజనం తర్వాత రక్తంలో చక్కెర స్థాయిలు అకస్మాత్తుగా పెరగడం లేదా తగ్గడం వల్ల శరీరం అలసిపోయి నిద్ర వస్తుంది.

థైరాయిడ్: హైపోథైరాయిడిజం ఉన్నవారిలో మెటబాలిజం (జీవక్రియ) మందగిస్తుంది. దీనివల్ల భోజనం తర్వాత నిద్ర రావడం, బరువు పెరగడం, శరీరం చల్లబడటం వంటి లక్షణాలు కనిపిస్తాయి.

లో బ్లడ్ ప్రెజర్ (అల్ప రక్తపోటు): రక్తపోటులో అకస్మాత్తుగా వచ్చే మార్పుల వల్ల నిద్రతో పాటు కళ్లు తిరగడం వంటి సమస్యలు వస్తాయి. ఒకవేళ మీరు బలహీనంగా అనిపిస్తే వైద్యుడిని సంప్రదించాలి.

అనీమియా (రక్తహీనత): శరీరంలో రక్తం తక్కువగా ఉంటే ఆక్సిజన్ సరఫరా తగ్గిపోతుంది. దీనివల్ల మనిషి ఎప్పుడూ అలసిపోయినట్లు, నిద్ర వస్తున్నట్లు అనిపిస్తుంది. ఆయాసం రావడం కూడా దీని మరో లక్షణం.

జీర్ణవ్యవస్థ సమస్యలు: కడుపులో గ్యాస్ లేదా జీర్ణ సమస్యలు ఉన్నప్పుడు శరీరం బద్ధకంగా మారుతుంది. ఇది మెదడును సుస్తుగా చేసి నిద్రపోయేలా చేస్తుంది.

భోజనం తర్వాత నిద్ర రాకుండా ఉండాలంటే ఏం చేయాలి?

తేలికపాటి ఆహారం: భోజనంలో భారీ పదార్థాలకు బదులు తేలికగా జీర్ణమయ్యే ఆహారాన్ని తీసుకోండి.

తీపి పదార్థాలకు దూరం: భోజనం తర్వాత అతిగా తీపి తినడం వల్ల నిద్ర వచ్చే అవకాశం ఉంది.

నడక: తిన్న వెంటనే కుర్చీలో కూర్చుని పని చేయకుండా, కనీసం 10 నిమిషాలు నడవండి.

నీరు: రోజంతా తగినంత నీరు తాగండి. ఇది శరీరాన్ని ఉత్తేజితంగా ఉంచుతుంది.