Ants On Urine: మన శరీరం వివిధ రకాల సంకేతాల ద్వారా మనకు వచ్చే అనారోగ్య సమస్యలను లేదా శరీరానికి జరుగుతున్న హానిని తెలియజేస్తుంది. అటువంటి సంకేతాలలో ఒకటి మూత్రంపై చీమలు పట్టడం. రాత్రిపూట మూత్ర విసర్జన చేసినప్పుడు ఉదయం వెళ్లి చూస్తే టాయిలెట్ సీటుపై లేదా మూత్రం పోసిన చోట చాలా చీమలు కనిపిస్తున్నాయని చాలా మంది ఫిర్యాదు చేస్తుంటారు. మీ విషయంలో కూడా ఇలాగే జరుగుతుంటే మీరు ఒక తీవ్రమైన వ్యాధి బారిన పడి ఉండవచ్చు. ఆ వ్యాధి ఏమిటో ఇప్పుడు తెలుసుకుందాం.
మూత్రానికి చీమలు పట్టడం ఏ వ్యాధికి సంకేతం?
ఈ వ్యాధి పేరు డయాబెటిస్ (మధుమేహం). నేటి కాలంలో డయాబెటిస్ అనేది చాలా సాధారణమైనప్పటికీ ఇది అత్యంత ప్రమాదకరమైన సమస్య. దేశవ్యాప్తంగా, ప్రపంచవ్యాప్తంగా పెద్ద సంఖ్యలో ప్రజలు ఈ వ్యాధి బారిన పడుతున్నారు. శరీరంలో ఇన్సులిన్ లోపం ఏర్పడినప్పుడు డయాబెటిస్ వస్తుందని నిపుణులు చెబుతున్నారు. మన శరీరంలోని క్లోమం నుండి ఇన్సులిన్ అనే హార్మోన్ విడుదలవుతుంది. ఇది రక్తంలోని చక్కెర శాతాన్ని నియంత్రిస్తుంది.
Also Read: అమరావతికి మహర్దశ.. ‘గ్లోబల్ క్వాంటం బయో ఫౌండ్రీ’తో వైద్య రంగంలో సరికొత్త విప్లవం!
ఒకవేళ మీకు ఇలాంటి సంకేతాలు కనిపిస్తే ఏమాత్రం ఆలస్యం చేయకుండా వెంటనే వైద్యుడిని సంప్రదించండి. డాక్టర్ సూచించిన డయాబెటిస్ పరీక్షలు చేయించుకోవడం ద్వారా వ్యాధి తీవ్రతను తెలుసుకోవచ్చు. సరైన మందులు, ఆరోగ్యకరమైన ఆహారం ద్వారా ఈ సమస్యను అదుపులో ఉంచుకోవచ్చు.
ఇలా నివారించండి
డయాబెటిస్ను నియంత్రించడానికి అన్నింటికంటే ముఖ్యమైనది ఆహారపు అలవాట్లు. తీసుకునే ఆహారంపై పూర్తి నిఘా ఉంచాలి. తీపి పదార్థాలు- చక్కెర ఎక్కువగా ఉండే ఆహారాన్ని పరిమితం చేయాలి. డాక్టర్ సూచించిన మందులను క్రమం తప్పకుండా వాడాలి. మధుమేహ వ్యాధిగ్రస్తులు గాయాలు కాకుండా జాగ్రత్త పడాలి. ఎందుకంటే ఈ వ్యాధి ఉన్నవారికి గాయాలు మానడానికి చాలా సమయం పడుతుంది. బ్లడ్ షుగర్ లెవల్స్ను అదుపులో ఉంచుకోవడానికి ప్రతిరోజూ వ్యాయామం చేయడం చాలా అవసరం. ముఖ్యంగా ఉదయం పూట వీలైనంత వరకు వాకింగ్ చేయాలి. దీనివల్ల బరువు అదుపులో ఉండటమే కాకుండా రక్తంలోని చక్కెర స్థాయిలు సమతుల్యంగా ఉంటాయి.