Vijay- Rashmika Wedding: టాలీవుడ్ మోస్ట్ పాపులర్ జోడీ విజయ్ దేవరకొండ- రష్మిక మందన్న ఎట్టకేలకు ఒక ఇంటివారు కాబోతున్నారు. సుదీర్ఘకాలం పాటు డేటింగ్లో ఉన్నట్లు వార్తల్లో నిలిచిన ఈ జంట తమ బంధాన్ని అధికారికం చేస్తూ వివాహ బంధంలోకి అడుగుపెడుతున్నారు. అభిమానులు ప్రేమగా ‘విరోష్’ (VIROSH) అని పిలుచుకునే ఈ జంట, తమ పెళ్లి వేడుకల కోసం ఈరోజు ఉదయం రాజస్థాన్లోని ఉదయపూర్ చేరుకున్నారు. వీరి రాకతో అక్కడి విమానాశ్రయం వద్ద కోలాహలం నెలకొంది. మీడియా వర్గాలు వీరిని అనుసరిస్తూ ఫోటోలు, వీడియోలను సోషల్ మీడియాలో షేర్ చేస్తున్నాయి.
వివాహ వేదిక- తేదీ
నివేదికల ప్రకారం.. ఈ వివాహం అత్యంత ప్రైవేట్ వేడుకగా జరగనుంది. ఉదయపూర్లోని అత్యంత విలాసవంతమైన ‘మెమెంటోస్ బై ఐటీసీ హోటల్స్’ (Mementos by ITC Hotels) ఈ ఘనమైన వేడుకకు ఆతిథ్యం ఇవ్వనుంది. పెళ్లి వేడుకలు రేపటి నుండే ప్రారంభమై, వరుసగా మూడు రోజుల పాటు కొనసాగనున్నాయి. ‘గీత గోవిందం’ చిత్రంతో వెండితెరపై మ్యాజిక్ చేసిన ఈ జంట 2026, ఫిబ్రవరి 26న వివాహ బంధంతో ఒకటి కానున్నారు. ప్రకృతి ఒడిలో, రాజస్థానీ రాచరికపు హంగుల మధ్య వీరి పెళ్లి జరగబోతోంది.
Also Read: లివ్-ఇన్ భాగస్వామిపై పైశాచికం.. ప్రాణాలను కాపాడిన మాతృభాష!
అతిథుల జాబితా- నిబంధనలు
ఈ వివాహానికి ఆహ్వానితుల జాబితా చాలా పరిమితంగా ఉన్నట్లు తెలుస్తోంది. కేవలం 100 మంది అత్యంత సన్నిహితులు మాత్రమే ఈ మూడు రోజుల వేడుకకు హాజరవుతారని సమాచారం. ఇందులో ఇరు కుటుంబ సభ్యులతో పాటు, సినీ పరిశ్రమలోని కొద్దిమంది ప్రముఖులు, కొంతమంది రాజకీయ నాయకులు మాత్రమే ఉన్నట్లు నివేదికలు చెబుతున్నాయి. వివాహం ప్రైవేట్గా ఉంచాలనే ఉద్దేశంతోనే ఈ నిర్ణయం తీసుకున్నట్లు సమాచారం.
హైదరాబాద్లో గ్రాండ్ రిసెప్షన్
ఉదయపూర్లో పెళ్లి ముగిసిన తర్వాత సినీ ఇండస్ట్రీ స్నేహితులు, ఇతర ప్రముఖుల కోసం హైదరాబాద్లో ఒక భారీ రిసెప్షన్ నిర్వహించనున్నారు. మార్చి 4న ఈ వేడుకను నిర్వహించాలని ప్లాన్ చేస్తున్నారు. ఈ వేడుకకు టాలీవుడ్తో పాటు ఇతర భాషల సినీ ప్రముఖులు పెద్ద సంఖ్యలో హాజరయ్యే అవకాశం ఉంది. గీత గోవిందం, డియర్ కామ్రేడ్ వంటి చిత్రాల్లో తమ కెమిస్ట్రీతో అలరించిన ఈ జంట నిజ జీవితంలోనూ జంటగా మారడం పట్ల అభిమానులు హర్షం వ్యక్తం చేస్తున్నారు. సోషల్ మీడియా వేదికగా ఈ నూతన వధూవరులకు శుభాకాంక్షలు వెల్లువెత్తుతున్నాయి.