Vaisshnav Tej: మెగా హీరో వైష్ణవ్ తేజ్ (Vaisshnav Tej) తన సినీ కెరీర్‌పై కీలక నిర్ణయాలు తీసుకునే దిశగా అడుగులు వేస్తున్నారు. ఆయన నటించిన చివరి చిత్రం ఆదికేశవ ఆశించిన విజయాన్ని సాధించకపోవడంతో వైష్ణవ్ తేజ్ తన తదుపరి ప్రాజెక్ట్‌ను ఎంచుకోవడంలో అత్యంత జాగ్రత్తగా వ్యవహరిస్తున్నారు. ప్రస్తుతం ఆయన పలు స్క్రిప్ట్‌లను పరిశీలిస్తున్నారని, కొన్నింటిని తిరస్కరించినట్లుగా సినీ వర్గాల సమాచారం. సరైన కథతో ప్రేక్షకులను మెప్పించాలని భావిస్తున్న వైష్ణవ్ తేజ.. ఈ సారి ఒక ప్రత్యేకమైన దర్శకుడితో జత కట్టేందుకు ఆసక్తి చూపుతున్నారు.
విక్రమ్ కె కుమార్‌తో చర్చలు
తాజా సినీ వర్గాల సమాచారం ప్రకారం.. వైష్ణవ్ తేజ్, విభిన్న కథాంశాలతో చిత్రాలు తెరకెక్కించే దర్శకుడు విక్రమ్ కె కుమార్ మధ్య ఒక కొత్త ప్రాజెక్ట్‌కు సంబంధించిన చర్చలు జరుగుతున్నాయి. విక్రమ్ కె కుమార్.. మనం, 24 వంటి విమర్శకుల ప్రశంసలు పొందిన చిత్రాలతో పాటు సున్నితమైన కథలను అద్భుతంగా తెరకెక్కించగల దర్శకుడిగా గుర్తింపు పొందారు. ప్రస్తుతం ఈ ప్రాజెక్ట్‌కు సంబంధించిన కథ ఇంకా ఖరారు కానప్పటికీ వైష్ణవ్ తేజ్, విక్రమ్ కె కుమార్ ఇద్దరూ కలిసి పనిచేయడానికి తీవ్రమైన ఆసక్తిని కనబరుస్తున్నట్లు తెలుస్తోంది. ఈ కాంబినేషన్ కుదిరితే వైష్ణవ్ తేజ్‌కి ఇది కచ్చితంగా ఒక కొత్త ఇమేజ్‌ను, ఒక మంచి విజయాన్ని అందించే అవకాశం ఉందని సినీ విశ్లేషకులు అభిప్రాయపడుతున్నారు.
Also Read: Eyesight: దృష్టి లోపం, కంటి సమస్యలు.. ఏ విటమిన్ల లోపం కారణమంటే?
మరోవైపు విక్రమ్ కె కుమార్ ప్రణాళికలు
దర్శకుడు విక్రమ్ కె కుమార్‌కు సంబంధించిన మరికొన్ని ప్రణాళికలు కూడా చర్చనీయాంశంగా మారాయి. ఆయన గతంలో హీరో నితిన్‌తో కలిసి ఒక స్పోర్ట్స్ డ్రామా చేయాలని అనుకున్నారు. కానీ ఆ ప్రాజెక్ట్ వివిధ కారణాల వల్ల మధ్యలోనే ఆగిపోయింది. ఇటీవల, విక్రమ్ కె కుమార్- యువ సంచలనం విజయ్ దేవరకొండతో కలిసి పనిచేయబోతున్నారనే ఊహాగానాలు కూడా వినిపించాయి. అయితే ఈ ఊహాగానాల మధ్య ఇప్పుడు ‘ఉప్పెన’ హీరో వైష్ణవ్ తేజ్‌తో ఆయన జతకట్టే అవకాశం ఎక్కువగా ఉందనే వార్తలు సినీ పరిశ్రమలో బలంగా వినిపిస్తున్నాయి.
వైష్ణవ్ తేజ్ తన కెరీర్‌కు మలుపునిచ్చే ఒక విజయవంతమైన ప్రాజెక్ట్‌ను ఎంచుకోవాలని అభిమానులు బలంగా కోరుకుంటున్నారు. మనం లాంటి బ్లాక్‌బస్టర్ చిత్రాన్ని అందించిన విక్రమ్ కె కుమార్‌తో వైష్ణవ్ తేజ్ కలిసి పనిచేస్తే అది మెగా అభిమానులకు ఒక గొప్ప శుభవార్త అవుతుందని చెప్పవచ్చు. ఈ కాంబినేషన్ నిజమవుతుందా లేదా అనే విషయంలో త్వరలోనే అధికారిక ప్రకటన వచ్చే అవకాశం ఉంది.