శ‌ర్వానంద్ బైక‌ర్ మూవీపై స్పందించిన రామ్ చ‌ర‌ణ్‌!

Ram Charan Praises Sharwanand: శర్వానంద్ నటించిన తాజా చిత్రం ‘బైకర్’ (Biker)పై హీరో రామ్ చరణ్ సోషల్ మీడియాలో ప్రశంసలు కురిపించారు. తన స్నేహితుడు శర్వానంద్ సినిమాకు చరణ్ మద్దతు తెలపడం ఈ స్పోర్ట్స్ డ్రామాకు పెద్ద ప్లస్ అయ్యింది. తన X (ట్విట్టర్) ఖాతాలో స్పందిస్తూ.. ‘బైకర్’ సినిమా గురించి చాలా అద్భుతమైన విషయాలు వింటున్నానని, సినిమా మంచి విజయం సాధించడం పట్ల సంతోషంగా ఉందని రామ్ చరణ్ పేర్కొన్నారు. ఒక విభిన్నమైన కథాంశాన్ని ఎక్కడా రాజీ పడకుండా భారీ స్థాయిలో నిర్మించినందుకు యూవీ క్రియేషన్స్ (UV Creations)ను ఆయన అభినందించారు. వారి ప్రయత్నం నిజంగా ప్రశంసనీయమని కొనియాడారు.

తన ప్రియ మిత్రుడు శర్వానంద్‌కు అన్ని వైపుల నుంచి ప్రశంసలు దక్కడం చూస్తుంటే చాలా ఆనందంగా ఉందని చరణ్ అన్నారు. అలాగే ఈ సినిమాలో రాజశేఖర్ పాత్రకు వస్తున్న సానుకూల స్పందనను కూడా ఆయన ప్రస్తావించారు.

Also Read: పచ్చి ఉల్లిపాయను ఎవరు తినకూడదు?

దర్శకుడు అభిలాష్ రెడ్డి కంకర గురించి చెబుతూ.. ఈ చిత్రాన్ని ఒక విభిన్నమైన ప్రయత్నంగా చ‌ర‌ణ్ పేర్కొన్నారు. నిర్మాతలకు (వంశీ, ప్రమోద్, విక్రమ్), చిత్ర బృందానికి శుభాకాంక్షలు తెలిపారు. తాను కూడా త్వరలోనే ఈ సినిమాను చూడాలని ఆసక్తిగా ఎదురుచూస్తున్నట్లు పేర్కొన్నారు. చరణ్ చేసిన ఈ పోస్ట్ సినిమా స్థాయిని మరింత పెంచుతుందని, ఆయన రివ్యూ చిత్రానికి మరింత ఊపునిస్తుందని సినీ విశ్లేష‌కులు భావిస్తున్నారు. ఈ సినిమాలో మాళవిక నాయర్, అతుల్ కుల్కర్ణి, బ్రహ్మాజీ, శశాంక్ కీలక పాత్రలు పోషించగా, జిబ్రాన్ సంగీతం అందించారు.

శర్వానంద్ భావోద్వేగం

‘బైకర్’ సినిమా విజయంతో ఫుల్ జోష్‌లో ఉన్న శర్వానంద్ ఇటీవల హైదరాబాద్‌లోని శ్రీరాములు థియేటర్‌ను సందర్శించి అభిమానులతో కలిసి సంబరాలు చేసుకున్నారు. ఈ సందర్భంగా జరిగిన ఒక సంఘటన అందరినీ ఆశ్చర్యానికి గురి చేయడమే కాకుండా అక్కడి వారందరినీ భావోద్వేగానికి గురిచేసింది.

సినిమా థియేటర్ లోపల పెద్ద స్క్రీన్‌కు గౌరవ సూచికంగా శర్వానంద్ మోకాళ్లపై వంగి, నేలపై సాష్టాంగ నమస్కారం చేశాడు. శ‌ర్వా చేసిన ఈ అరుదైన చర్య అభిమానులను ఆశ్చర్యపరిచింది. వరుస పరాజయాలతో కొంత కాలం ఇబ్బంది పడిన శర్వానంద్.. ఇప్పుడు ‘నారి నారి నడుమ మురారి’, ‘బైకర్’ వంటి ప్రామిసింగ్ సినిమాలతో తిరిగి ఫామ్‌లోకి వచ్చారు.