Megastar Chiranjeevi: వరుణ్ తేజ్-లావణ్యలకు శుభాకాంక్షలు తెలిపిన మెగాస్టార్.. మ‌నువ‌డితో చిరంజీవి!

Megastar Chiranjeevi: మెగా కుటుంబంలో కొత్త సందడి నెలకొంది. గ‌తేడాది వివాహ బంధంతో ఒక్కటైన నటుడు వరుణ్ తేజ్, లావణ్య త్రిపాఠిలు తల్లిదండ్రులయ్యారు. వీరికి బుధవారం అబ్బాయి పుట్టినట్లు అధికారికంగా ప్రకటించారు. ఈ సందర్భంగా మెగాస్టార్ చిరంజీవి (Megastar Chiranjeevi).. ఆ చిన్నారికి అలాగే కొత్తగా తల్లిదండ్రులైన వరుణ్-లావణ్యలకు శుభాకాంక్షలు తెలిపారు. చిరంజీవి తన అధికారిక సోషల్ మీడియా వేదికగా ఈ శుభవార్తను పంచుకుంటూ భావోద్వేగపూరితమైన సందేశాన్ని పోస్ట్ చేశారు.

“చిట్టి బాబుకి ఈ లోకంలోకి స్వాగతం!” అంటూ తన సందేశాన్ని ప్రారంభించిన చిరంజీవి “కొణిదెల కుటుంబంలోకి అప్పుడే పుట్టిన ఈ బాబుకి మా హృదయపూర్వక స్వాగతం” అని రాశారు. కొత్తగా తల్లిదండ్రులైన వరుణ్ తేజ్ మరియు లావణ్య త్రిపాఠిలకు మనస్ఫూర్తిగా అభినందనలు తెలిపారు.

Also Read: CM Chandrababu: ఆటో డ్రైవర్లకు శుభవార్త చెప్పిన సీఎం.. ద‌స‌రా రోజు రూ. 15 వేలు!

ముఖ్యంగా తన సోదరుడు నాగబాబు, పద్మజలు తాత, నానమ్మలు అయినందుకు తన సంతోషాన్ని వ్యక్తపరిచారు. “నాగబాబు, పద్మజలు తాత, నానమ్మలు అయినందుకు మా సంతోషాన్ని వ్యక్తపరుస్తున్నాము” అని పేర్కొన్నారు. ఇది వారి కుటుంబంలో మరో ఆనందకరమైన ఘట్టమని చిరంజీవి అన్నారు. చివరిగా ఈ చిన్నారికి మంచి భవిష్యత్తును ఆకాంక్షిస్తూ “ఈ చిన్నారికి ఆనందం, మంచి ఆరోగ్యం, దీవెనలు ఎల్లప్పుడూ లభించాలని కోరుకుంటున్నాము. మీ ప్రేమ, ఆశీస్సులు ఎల్లప్పుడూ మా బిడ్డతో ఉండాలి” అని చిరంజీవి తన సందేశాన్ని ముగించారు.

మెగా ఫ్యామిలీలోని ఇతర సభ్యులు, సినీ ప్రముఖులు, అభిమానులు సోషల్ మీడియాలో వరుణ్, లావణ్యలకు శుభాకాంక్షలు తెలియజేస్తున్నారు. ఈ వార్తతో మెగా అభిమానుల్లో పండుగ వాతావరణం నెలకొంది. అందరూ నవజాత శిశువు, అతని తల్లిదండ్రుల కోసం శుభాన్ని, ఆనందాన్ని కోరుకుంటూ సందేశాలు పెడుతున్నారు. మొత్తం మీద, కొణిదెల కుటుంబంలోకి కొత్త సభ్యుడి రాకతో అపారమైన సంతోషం, ఉత్సాహం నెలకొంది.