సూర్య క‌రుప్పు.. తెలుగులో ఏ పేరుతో విడుద‌ల‌వుతుందో తెలుసా?

VeeraBhadrudu: కోలీవుడ్ స్టార్ హీరో సూర్య కథానాయకుడిగా నటిస్తున్న ‘కరుప్పు’ (Karuppu) చిత్రం కోసం ప్రేక్షకులు ఎంతో కాలంగా ఎదురుచూస్తున్నారు. ఈ క్రమంలో చిత్ర బృందం ఒక కీలక ప్రకటన చేసింది. ఈ సినిమాను తెలుగులో ‘వీరభద్రుడు’ అనే టైటిల్‌తో విడుదల చేయబోతున్నట్లు మేకర్స్ ప్రకటించారు. ఆర్‌జే బాలాజీ దర్శకత్వంలో తెరకెక్కుతున్న ఈ యాక్షన్ ఎంటర్‌టైనర్ మే 14న థియేటర్లలో విడుదల కానుంది. తెలుగు ప్రేక్షకుల కోసం ప్రత్యేకంగా టైటిల్‌ను ఖరారు చేయడం పట్ల సోషల్ మీడియాలో నెటిజన్లు హర్షం వ్యక్తం చేస్తున్నారు.

వాస్తవానికి ఈ సినిమాను 2026 సంక్రాంతి కానుకగా జనవరిలో విడుదల చేయాలని భావించినప్పటికీ కొన్ని కారణాల వల్ల వాయిదా పడింది. గతేడాది జూలైలో విడుదలైన టీజర్‌లో సూర్య తన అసలు పేరైన ‘శరవణన్’ అనే లాయర్ పాత్రలో కనిపిస్తారని వెల్లడైంది. గ్రామీణ నేపథ్యంలో సాగే ఈ కథలో సూర్య ఒక సామాన్యులకు అండగా నిలిచే ఒక ‘మాస్’ అవతారంలో కనిపించనున్నారు.

ఈ చిత్రంలో త్రిష కథానాయికగా నటిస్తున్నారు. 2005లో వచ్చిన ‘ఆరు’ సినిమా తర్వాత సూర్య-త్రిష జోడీ మళ్లీ ఈ చిత్రంతో వెండితెరపై మెరవనుంది. ఇతర ముఖ్య పాత్రల్లో యోగి బాబు, మలయాళ నటుడు ఇంద్రన్స్, శివద, స్వాసిక, నట్టి, సుప్రీత్ రెడ్డి, అనఘ మాయా రవి నటిస్తున్నారు. దర్శకుడు ఆర్‌జే బాలాజీ కూడా ఒక అతిథి పాత్రలో కనిపించనున్నారు.

Also Read: విదేశీ ఆట‌గాడు అంటూ కామెంట్స్‌.. స్ట్రాంగ్ కౌంట‌ర్ ఇచ్చిన కోహ్లీ!

దర్శకుడు ఆర్‌జే బాలాజీ ఏమన్నారంటే

నేను గతంలో చేసిన ‘మూకుత్తి అమ్మన్’ (2020), ‘వీట్ల విశేషం’ (2022) చిత్రాలతో పోలిస్తే ‘కరుప్పు’ 15 రెట్లు భారీ స్థాయిలో ఉంటుంది. ఇంతటి ప్రతిష్టాత్మక ప్రాజెక్ట్ కోసం నేను నన్ను నేను సిద్ధం చేసుకున్నాను. ఇది అన్ని వర్గాల ప్రేక్షకులను ఆకట్టుకునే ఒక మంచి కమర్షియల్ ఫిల్మ్. ముత్తు (1995), పడయ్యప్ప (1999), గిల్లి (2004) వంటి సినిమాలు చూసినప్పుడు కలిగే అనుభూతిని ఈ సినిమా ఇస్తుంది. గత దశాబ్ద కాలంగా సినిమాల్లో హీరోలు కేవలం రౌడీలు, డాన్లు లేదా పోలీసుల్లాగే కనిపిస్తున్నారు. కానీ నేను పెరిగిన కాలంలో హీరోలు పాలు అమ్మే వ్యక్తిగా, టీ షాపు యజమానిగా, డ్రైవర్ లేదా టీచర్‌గా సాధారణ వృత్తుల్లో కనిపించేవారు. ‘కరుప్పు’లో అటువంటి పాత సినిమాల అంశాలతో పాటు ఒక బలమైన సామాజిక సందేశం కూడా ఉంటుంది అని పేర్కొన్నాడు.

ఈ చిత్రానికి సాయి అభ్యంకర్ సంగీతాన్ని అందిస్తుండగా.. విష్ణు ఎడవన్, అసల్ కోలార్, అరుణ్ శ్రీనివాసన్ సాహిత్యం అందిస్తున్నారు. జి.కె. విష్ణు సినిమాటోగ్రఫీ, ఆర్. కలైవానన్ ఎడిటింగ్ బాధ్యతలు నిర్వహిస్తున్నారు. డ్రీమ్ వారియర్ పిక్చర్స్ బ్యానర్‌పై ఎస్ఆర్ ప్రకాష్ బాబు, ఎస్ఆర్ ప్రభు ఈ చిత్రాన్ని నిర్మిస్తున్నారు. ఈ సినిమా శాటిలైట్ హక్కులను జీ తమిళ్ దక్కించుకుంది.