సినీ ఇండస్ట్రీలో బయోపిక్స్ మాట వినిపించడం చాలా కామన్. ఇప్పటికే ఎంతోమంది ప్రముఖుల జీవిత కథలు సినిమాగా తెరకెక్కి సూపర్ హిట్స్ కొట్టాయి. కానీ మొదటిసారి మాఫియా క్వీన్, వేశ్య నేపథ్యంలో ‘గంగూబాయి కతియావాడి’ సినిమాగా రూపుదిద్దుకుంది. ఒక వేశ్య నుండి రెడ్ లైట్ ఏరియాకే డాన్గా మారిన ఓ మహిళ కథ ఇది. ఈ కథను బాలీవుడ్ కు మాత్రమే కాకుండా.. అందరికీ చూపించాలనుకున్నాడు సంజయ్ లీలా భన్సాలీ. అన్ని భాషల్లో రిలీజై ప్రేక్షకుల మనసు దోచుకుంది. ఇక ఈ సినిమా ఓటీటీ విడుదల తేదీని చిత్ర బృందం తాజాగా ప్రకటించింది. ఈ చిత్రం ఏప్రిల్ 26నుంచి ‘నెట్ఫ్లిక్స్’లో హిందీతో పాటు తెలుగులోనూ స్ట్రీమింగ్ కానుంది. గంగూబాయి కతియావాడి చిత్రం ఫిబ్రవరి 25న విడుదలై భారీ కలెక్షన్లను సాధించింది. ఈ చిత్రంతో ఆలీయాభట్ 100కోట్ల క్లబ్లో చేరింది. ఇప్పటివరకు ఈ చిత్రం దాదాపు 130 కోట్ల నెట్ కలెక్షన్లు సాధించి రికార్డు సృష్టించింది. ఈ చిత్రంలో బాలీవుడ్ స్టార్ అజయ్ దేవగన్ కీలకపాత్రలో నటించాడు.