Apple : ప్రపంచ ప్రఖ్యాత టెక్నాలజీ దిగ్గజం యాపిల్, భారత్ మార్కెట్పై తన దృష్టిని మరింత గట్టిగా కేంద్రీకరిస్తోంది. ఇప్పటికే ముంబయి, ఢిల్లీ నగరాల్లో రెండు అధికారిక రిటైల్ స్టోర్లు ప్రారంభించిన యాపిల్, తాజాగా బెంగళూరులో తన మూడవ స్టోర్ను ప్రారంభించనున్నట్లు అధికారికంగా ప్రకటించింది. సెప్టెంబర్ 2న ప్రారంభించబోయే ఈ స్టోర్కు ‘యాపిల్ హెబ్బాల్’ అనే పేరు పెట్టారు. ఈ కొత్త స్టోర్ బెంగళూరులోని ఫీనిక్స్ మాల్ ఆఫ్ ఆసియాలో స్థాపించబడుతుంది. ఇది కేవలం ఉత్పత్తుల అమ్మకానికి మాత్రమే కాకుండా వినియోగదారులకు సమగ్ర అనుభవం కలిగించేందుకు రూపొందించబడింది. స్టోర్ యొక్క బయట భాగాన్ని భారత జాతీయ పక్షి నెమలి ఈకల రూపకల్పన ఆధారంగా రూపొందించటం విశేషం. ఇది భారతీయ సంస్కృతికి, సౌందర్యానికి నిదర్శనంగా నిలుస్తోంది.
Read Also: Miyapur Tragedy : అసలేం జరిగింది.. ఒకే కుటుంబానికి చెందిన ఐదుగురు మృతి
స్టోర్ ప్రారంభోత్సవం సందర్భంగా యాపిల్ వినియోగదారుల కోసం ప్రత్యేక కార్యక్రమాలను ప్రకటించింది. ‘యాపిల్ హెబ్బాల్’కు అంకితంగా రూపొందించిన ప్రత్యేక వాల్పేపర్లు వినియోగదారులు ఉచితంగా డౌన్లోడ్ చేసుకోవచ్చు. అదేవిధంగా బెంగళూరులోని శైలికి అనుగుణంగా రూపొందించిన ప్రత్యేక ‘యాపిల్ మ్యూజిక్ ప్లేలిస్ట్’ను వినే అవకాశం కూడా కల్పిస్తున్నారు. ఈ స్టోర్లో యాపిల్ ఉత్పత్తులన్నిటిని ప్రత్యక్షంగా చూసి, నిపుణుల సలహాలు, సూచనలు పొందే అవకాశం వినియోగదారులకు లభించనుంది. అలాగే, ‘టుడే ఎట్ యాపిల్’ పేరిట ఉచిత శిక్షణ సెషన్లను కూడా నిర్వహించనున్నారు. ఫొటోగ్రఫీ, వీడియో ఎడిటింగ్, మ్యూజిక్ ప్రొడక్షన్ వంటి విభాగాల్లో అవగాహన పెంచేలా ఈ సెషన్లు ఉంటాయి.
రిటైల్ రంగంలో ముందడుగులు వేస్తూనే, తయారీ రంగంలోనూ యాపిల్ తన ప్రాధాన్యతను భారత్పై కేంద్రీకరిస్తోంది. తాజా సమాచారం ప్రకారం, రాబోయే ఐఫోన్ 17 సిరీస్లోని అన్ని మోడళ్లను ప్రో వెర్షన్లతో సహా పూర్తిగా భారత్లోనే అసెంబుల్ చేయాలని యాపిల్ నిర్ణయించింది. ఇప్పటివరకు కేవలం కొన్ని మోడళ్లను మాత్రమే భారత్లో తయారు చేస్తూ వచ్చిన యాపిల్, ఇప్పుడు అన్ని వేరియంట్లను భారతీయ ఫ్యాక్టరీలే ఉత్పత్తి చేయనున్నాయి. ఇందుకోసం యాపిల్ ఐదు భారతీయ తయారీ సంస్థలతో భాగస్వామ్యం కుదుర్చుకుంది. వాటిలో రెండు ఫ్యాక్టరీలు ఇప్పటికే కార్యకలాపాలు ప్రారంభించాయి. మిగిలిన మూడు త్వరలో ప్రారంభమయ్యే అవకాశముంది. అయితే ప్రో మోడళ్ల ఉత్పత్తి పరిమిత స్థాయిలో మాత్రమే ఉండే అవకాశం ఉందని పరిశ్రమ వర్గాలు చెబుతున్నాయి. ఈ వేగవంతమైన వ్యాపార వ్యాప్తి ద్వారా యాపిల్ భారత్ను గ్లోబల్ మార్కెట్లో కీలక హబ్గా తీర్చిదిద్దే దిశగా ముందుకు సాగుతోంది. వినియోగదారులకు మెరుగైన అనుభవాన్ని అందించడమే కాక, భారతదేశ ఆర్థిక వ్యాపార రంగాల్లోనూ ఈ టెక్ దిగ్గజం తన ముద్ర వేయాలన్న లక్ష్యంతో పనిచేస్తోంది.