ప్రముఖ వాహన తయారీ సంస్థ ఇసుజు మోటార్స్ ఇండియా ఆంధ్రప్రదేశ్లో తన నెట్వర్క్ను మరింత విస్తరించింది. ప్రకాశం జిల్లా ఒంగోలులో అత్యాధునిక 3S డీలర్షిప్ను ప్రారంభించడం ద్వారా వినియోగదారులకు మరింత చేరువయ్యింది. ఆంధ్రప్రదేశ్లో తన ఉనికిని బలోపేతం చేసే దిశగా ఇసుజు మోటార్స్ ఇండియా, ఒంగోలులో సరికొత్త 3S (సేల్స్, సర్వీస్ మరియు స్పేర్స్) కేంద్రాన్ని ప్రారంభించింది. త్రోవగుంటలోని జీటీ రోడ్డుపై ఏర్పాటు చేసిన ఈ కేంద్రాన్ని ఇసుజు మోటార్స్ ఇండియా డిప్యూటీ మేనేజింగ్ డైరెక్టర్ శ్రీ తకేషి హిరానో ఘనంగా ప్రారంభించారు. ఆర్కేఈ (RKE) ఇసుజు ఆధ్వర్యంలో నడిచే ఈ డీలర్షిప్, ఒంగోలు పరిసర ప్రాంతాల్లోని వినియోగదారులకు వాహనాల విక్రయంతో పాటు, నాణ్యమైన సర్వీసింగ్ మరియు స్పేర్ పార్ట్స్ సదుపాయాలను ఒకే చోట అందించనుంది. ఈ కొత్త టచ్ పాయింట్తో కలిపి ఆంధ్రప్రదేశ్లో ఇసుజు కేంద్రాల సంఖ్య 9కి, దేశవ్యాప్తంగా 108కి చేరింది.
ఒంగోలులోని ఈ కొత్త కేంద్రం సుమారు 1,000 చదరపు అడుగుల సేల్స్ షోరూమ్ను మరియు 4,000 చదరపు అడుగుల విశాలమైన సర్వీస్ వర్క్షాప్ను కలిగి ఉంది. ఇందులో వాహనాల మరమ్మతుల కోసం నాలుగు సర్వీస్ బేలు, టు-పోస్ట్ లిఫ్ట్ మరియు ప్రత్యేకమైన వాషింగ్ బే వంటి ఆధునిక పరికరాలను ఏర్పాటు చేశారు. ఆటోమోటివ్ రంగంలో రెండు దశాబ్దాల అనుభవం ఉన్న ఆర్కే గ్రూప్, ఇప్పటికే తిరుపతి మరియు నెల్లూరులలో ఇసుజు సేవలను అందిస్తోంది. ఇప్పుడు ఒంగోలులో కూడా అడుగుపెట్టడం ద్వారా, రాయలసీమ మరియు కోస్తాంధ్ర ప్రాంతాల్లో ఇసుజు వాహనదారులకు మెరుగైన సేవలందుతాయని డీలర్ ప్రిన్సిపల్ శ్రీ జి. బాలాజి చౌదరి ధీమా వ్యక్తం చేశారు.
ఇసుజు మోటార్స్ ఇండియాకు ఆంధ్రప్రదేశ్ అత్యంత కీలకమైన మార్కెట్. ఈ సందర్భంగా తకేషి హిరానో మాట్లాడుతూ.. వినియోగదారులకు నిరంతర సేవలు మరియు ఉన్నతమైన యాజమాన్య అనుభవాన్ని (Ownership Experience) అందించడమే తమ లక్ష్యమని పేర్కొన్నారు. కేవలం వాహనాలను విక్రయించడమే కాకుండా, విక్రయానంతర సేవల్లోనూ (After-sales service) నాణ్యతను పాటించడం ద్వారా కస్టమర్ల నమ్మకాన్ని చూరగొనాలని సంస్థ భావిస్తోంది. ప్రారంభోత్సవం రోజే పలువురు వినియోగదారులకు కొత్త వాహనాలను అందజేసి కార్యకలాపాలను అధికారికంగా మొదలుపెట్టారు. ఈ విస్తరణ ద్వారా రానున్న రోజుల్లో ఏపీలో ఇసుజు తన మార్కెట్ వాటాను మరింత పెంచుకునే అవకాశం ఉంది.