RBI Monetary Policy: భారతీయ రిజర్వ్ బ్యాంక్ (RBI) ద్రవ్య విధాన కమిటీ (RBI Monetary Policy) సమావేశంలో దేశ జీడీపీ, ద్రవ్యోల్బణం రేటు అంచనాలను విడుదల చేశారు. RBI అంచనాల ప్రకారం.. భారతదేశ జీడీపీ వృద్ధి రేటు అంచనాను 6.5 శాతం నుంచి 6.8 శాతానికి పెంచింది. భారతీయ రిజర్వ్ బ్యాంక్ ద్రవ్య విధాన కమిటీ (MPC) టారిఫ్లలో (Tariffs) ఉన్న అనిశ్చితిని కారణంగా చూపుతూ వరుసగా రెండోసారి రెపో రేటును 5.5 శాతం వద్ద యథాతథంగా ఉంచింది. RBI గవర్నర్ సంజయ్ మల్హోత్రా MPC ఏకగ్రీవంగా స్వల్పకాలిక రుణ రేటు లేదా రెపో రేటును తటస్థ వైఖరితో 5.5 శాతం వద్ద స్థిరంగా ఉంచాలని నిర్ణయించినట్లు తెలిపారు. జీఎస్టీ (GST) రేటులో సంస్కరణలు వినియోగం, వృద్ధిపై సానుకూల ప్రభావాన్ని చూపుతాయని పేర్కొంటూ RBI 2025-26 ఆర్థిక సంవత్సరానికి తన వృద్ధి అంచనాలను పైకి సవరించింది.
GDP వృద్ధి అంచనా పెంపునకు కారణాలు
రిజర్వ్ బ్యాంక్ గవర్నర్ సంజయ్ మల్హోత్రా బుధవారం మాట్లాడుతూ.. జీఎస్టీ సరళీకరణతో సహా పలు వృద్ధి-సామర్థ్య నిర్మాణ సంస్కరణలను అమలు చేయడం ద్వారా బాహ్య సవాళ్ల వల్ల కలిగే కొన్ని ప్రతికూల ప్రభావాలను తగ్గించవచ్చని ఆశాభావం వ్యక్తం చేశారు. అందుకే RBI 2025-26 ఆర్థిక సంవత్సరానికి భారతదేశ జీడీపీ వృద్ధి రేటు అంచనాను 6.5 శాతం నుండి 6.8 శాతానికి పెంచింది.
Also Read: Onion Prices: ఉల్లి ధరలు ఢమాల్.. కిలో ధర ఎంతంటే?
బలపడుతున్న గ్రామీణ డిమాండ్
భారతదేశ జీడీపీ మొదటి త్రైమాసికంలో (2025-26) 7.8 శాతం బలమైన వృద్ధిని నమోదు చేసిందని, ఇది ప్రైవేట్ వినియోగం (Consumption), స్థిర పెట్టుబడి (Fixed Investment) పెరుగుదల కారణంగా జరిగిందని ఆయన వివరించారు. సరఫరా వైపు చూస్తే స్థూల విలువ జోడింపు (GVA)లో 7.6 శాతం వృద్ధి అనేది తయారీ రంగంలో మెరుగుదల, సేవల రంగంలో నిరంతర విస్తరణ కారణంగా నమోదైంది.
లభ్యమవుతున్న గణాంకాల ప్రకారం.. ఆర్థిక కార్యకలాపాలు ఇంకా బలంగానే ఉన్నాయి. మంచి రుతుపవనాలు, బలమైన వ్యవసాయ కార్యకలాపాల కారణంగా గ్రామీణ డిమాండ్ బలంగా ఉందని, అయితే పట్టణ డిమాండ్ నెమ్మదిగా మెరుగుపడుతోందని RBI గవర్నర్ తెలిపారు. సాధారణం కంటే ఎక్కువ రుతుపవనాలు, ఖరీఫ్ సాగులో మంచి పురోగతి, జలాశయాలలో తగినంత నీటి స్థాయి వ్యవసాయ, గ్రామీణ డిమాండ్ అవకాశాలను మరింత మెరుగుపరిచాయి. సేవా రంగంలో పటిష్టత, స్థిరమైన ఉద్యోగ పరిస్థితులు డిమాండ్ను పెంచుతున్నాయి. వస్తువులు, సేవల పన్ను (GST) రేట్లలో సంస్కరణలు డిమాండ్ను మరింత బలోపేతం చేస్తాయని భావిస్తున్నారు. సామర్థ్య వినియోగంలో పెరుగుదల, అనుకూలమైన ఆర్థిక పరిస్థితులు, దేశీయ డిమాండ్ మెరుగుదల స్థిర పెట్టుబడిని తప్పకుండా ప్రోత్సహిస్తాయని ఆయన అన్నారు.
త్రైమాసిక వృద్ధి అంచనాలు
ఈ అంశాలన్నింటినీ దృష్టిలో ఉంచుకుని, 2025-26 ఆర్థిక సంవత్సరానికి వాస్తవ జీడీపీ వృద్ధి రేటు ఇప్పుడు 6.8 శాతంగా అంచనా వేయబడింది. ఇందులో రెండవ త్రైమాసికంలో 7.0 శాతం, మూడవ త్రైమాసికంలో 6.4 శాతం, నాల్గవ త్రైమాసికంలో 6.2 శాతం వృద్ధి ఉంటుందని అంచనా. 2025లో ప్రపంచ ఆర్థిక వ్యవస్థ పరిస్థితి ఊహించిన దాని కంటే మెరుగ్గా ఉందని, అమెరికా- చైనాలలో బలమైన వృద్ధి కనిపించిందని కూడా ఆయన చెప్పారు.