e-RCT Portal: రైల్వే శాఖ మంత్రి అశ్విని వైష్ణవ్ రైల్వే పరిహారానికి సంబంధించి ఒక పెద్ద ప్రకటన చేశారు. క్లెయిమ్ (పరిహారం) కేసులను వేగంగా, పారదర్శకంగా పరిష్కరించడానికి రైల్వే తన పనితీరులో భారీ మార్పులు చేస్తూ e-RCT (ఎలక్ట్రానిక్ రైల్వే క్లెయిమ్స్ ట్రిబ్యునల్) వ్యవస్థను ప్రారంభించింది. రైలు ప్రమాదాలు, అవాంఛనీయ సంఘటనలు, సరుకుల నష్టం లేదా టికెట్ ధరల వివాదాలకు సంబంధించిన కేసుల పరిష్కారాన్ని ఈ కొత్త డిజిటల్ ప్లాట్ఫారమ్ సులభతరం చేస్తుంది. గతంలో ఈ కేసుల ఫైలింగ్ నుండి విచారణ వరకు అనేక ఫార్మాలిటీలు, సమయం పట్టేది. కానీ ఇప్పుడు పూర్తి వ్యవస్థ ఆన్లైన్ కావడంతో ప్రక్రియ చాలా వేగంగా, సౌకర్యవంతంగా మారింది.
e-RCT అంటే ఏమిటి? ఇది ఎలా పనిచేస్తుంది?
భారతీయ రైల్వేలో పారదర్శకత, ప్రయాణికుల సౌకర్యాల కోసం విప్లవాత్మక అడుగు వేస్తూ ఎలక్ట్రానిక్ రైల్వే క్లెయిమ్స్ ట్రిబ్యునల్ను ప్రారంభించారు. ఇది పూర్తిగా డిజిటల్ మోడ్లో పనిచేస్తుంది. ఎవరైనా, ఎప్పుడైనా, ఎక్కడి నుండైనా తమ క్లెయిమ్ను ఆన్లైన్లో నమోదు చేసుకోవచ్చు అనేది e-RCT సిస్టమ్ అతిపెద్ద ప్రత్యేకత. కేసు నమోదులో చెక్లిస్ట్ ఆధారిత స్క్రీనింగ్, డాక్యుమెంట్ అప్లోడ్, ఆటోమేటిక్ కేస్ అలోకేషన్, నోటీసుల డిజిటల్ కాపీ వంటి సౌకర్యాలు అందుబాటులో ఉన్నాయి. దీనితో పాటు విచారణ కోసం ఈ-హియరింగ్ (e-hearing) సౌకర్యం కూడా కల్పించారు. దీనివల్ల పార్టీలు కోర్టుకు రావాల్సిన అవసరం తగ్గుతుంది.
Also Read: Donald Trump : ట్రంప్ కు మరో ఎదురుదెబ్బ
ఫైలింగ్ నుండి తీర్పు వరకు.. అంతా ఆన్లైన్
ఈ ప్లాట్ఫారమ్లో కేసు పురోగతి అంటే.. ఫైలింగ్ నుండి తీర్పు వచ్చే వరకు ప్రతిదీ ఒకే చోట కనిపిస్తుంది. రైల్వే అధికారుల ప్రకారం.. ఈ వ్యవస్థ సమయాన్ని ఆదా చేయడమే కాకుండా కేసుల పరిష్కారాన్ని పారదర్శకంగా, నమ్మదగినదిగా మారుస్తుంది. e-RCT వ్యవస్థ ద్వారా పెండింగ్లో ఉన్న కేసులు తగ్గుతాయని, సామాన్య ప్రజలకు నిజమైన ఉపశమనం లభిస్తుందని అధికారులు భావిస్తున్నారు.
సోషల్ మీడియా ప్లాట్ఫారమ్లకు కఠిన హెచ్చరిక
దీనికి ముందు రైల్వే మంత్రి అశ్విని వైష్ణవ్ ఇంటర్నెట్, డిజిటల్ భద్రతపై కూడా కీలక ప్రకటన చేశారు. “ప్లాట్ఫారమ్లు ఇకనైనా మేల్కోవాలి. మానవ సమాజం వేల సంవత్సరాలుగా నిర్మించుకున్న సంస్థలపై నమ్మకాన్ని బలోపేతం చేయడం ఎంత ముఖ్యమో అర్థం చేసుకోవాలి. ప్లాట్ఫారమ్లు తమ వద్ద హోస్ట్ అవుతున్న కంటెంట్కు బాధ్యత వహించాలి. పిల్లల ఆన్లైన్ భద్రత, పౌరులందరి డిజిటల్ భద్రత బాధ్యత ఈ ప్లాట్ఫారమ్లదే” అని ఆయన పేర్కొన్నారు.
AI, సింథటిక్ కంటెంట్పై కొత్త నిబంధన
డిజిటల్ ఇండియా మారుతున్న స్వరూపాన్ని దృష్టిలో ఉంచుకుని, ప్లాట్ఫారమ్లు భద్రతా ప్రమాణాలను పాటించకపోతే వాటిని బాధ్యులను చేస్తామని మంత్రి స్పష్టం చేశారు. “ఏ వ్యక్తి అనుమతి లేకుండా వారి ముఖం, స్వరం లేదా వ్యక్తిత్వాన్ని ఉపయోగించి సింథటిక్ కంటెంట్ను సృష్టించకూడదు. ఈ దిశగా పెద్ద మార్పు తీసుకురావాల్సిన సమయం వచ్చింది. సమాజం ఈ ప్రాథమిక అవసరాన్ని అర్థం చేసుకుని సహకరించాలని నేను ప్లాట్ఫారమ్లను కోరుతున్నాను” అని ఆయన అన్నారు.