ఏఐ ఆధారిత క్వాలిటీ ఇంజనీరింగ్ సేవలలో ప్రపంచ అగ్రగామిగా ఉన్న క్వాలిజీల్ సంస్థ, హైదరాబాద్ నగరాన్ని తన గ్లోబల్ డెలివరీ కార్యకలాపాలకు గుండెకాయగా తీర్చిదిద్దుకుంది. 2021 నుండి ఏకంగా 71% వార్షిక వృద్ధి రేటు (CAGR) నమోదు చేస్తూ, ప్రస్తుతం మూడు గ్లోబల్ క్యాపబిలిటీ సెంటర్లతో పాటు 850 మందికి పైగా నిపుణులైన ఇంజనీర్లతో ఈ నగరం నుండి కార్యకలాపాలు నిర్వహిస్తోంది. హైదరాబాద్లో పెరుగుతున్న జీసీసీల అవసరాలకు అనుగుణంగా ప్రపంచ స్థాయి నాణ్యతా ప్రమాణాలతో కూడిన ఇంజనీరింగ్ సేవలను అందించడంలో ఈ సంస్థ కీలక పాత్ర పోషిస్తోంది.
ఎవరెస్ట్ గ్రూప్తో కలిసి క్వాలిజీల్ ప్రచురించిన తాజా శ్వేతపత్రం ప్రకారం, మారుతున్న సాంకేతికతతో పాటు సాఫ్ట్వేర్ నాణ్యత విషయంలో సవాళ్లు కూడా పెరుగుతున్నాయి. ముఖ్యంగా జెనరేటివ్ ఏఐ (GenAI), ఏజెంటిక్ ఏఐ వంటి వ్యవస్థలు అభివృద్ధి చెందుతున్న తరుణంలో.. మోడల్ డ్రిఫ్ట్, అనిశ్చిత అవుట్పుట్లు వంటి ప్రమాదాలు పొంచి ఉన్నాయి. భారత దేశ జీసీసీ రంగం 2030 నాటికి 105 బిలియన్ డాలర్ల ఆదాయాన్ని ఆర్జించే దిశగా పయనిస్తున్న నేపథ్యంలో, ఈ సంక్లిష్టతలను అధిగమించడానికి క్వాలిజీల్ వంటి బలమైన క్యూఈ (QE) భాగస్వామి అవసరం ఎంతైనా ఉంది. క్యూమెంటిస్ ఏఐ, క్వాలిసెంట్రల్ వంటి ప్లాట్ఫామ్ల ద్వారా సాఫ్ట్వేర్ టెస్టింగ్లో ఈ సంస్థ కొత్త ఒరవడిని సృష్టిస్తోంది.
హైదరాబాద్లో లభిస్తున్న అంతర్జాతీయ స్థాయి ప్రతిభావంతులు, విస్తరిస్తున్న జీసీసీ ఎకోసిస్టమ్ కారణంగానే ఇక్కడ తమ కార్యకలాపాలను విస్తరిస్తున్నట్లు క్వాలిజీల్ సీఈఓ ప్రదీప్ గోవిందస్వామి వెల్లడించారు. కేవలం సేవలందించడమే కాకుండా, హైదరాబాద్కు అవసరమైన క్వాలిటీ ఇంజనీరింగ్ మౌలిక సదుపాయాలను కల్పించడానికి కట్టుబడి ఉన్నామని ఆయన పేర్కొన్నారు. ఫ్రాస్ట్ అండ్ సుల్లివన్ వంటి అంతర్జాతీయ సంస్థలు కూడా క్వాలిజీల్ అనుసరిస్తున్న స్వతంత్ర క్యూఈ మోడల్ను ప్రశంసించాయి. సాంప్రదాయ పద్ధతుల్లో ఎదురయ్యే సవాళ్లను అధిగమిస్తూ, నెక్స్ట్-జెన్ విధానంతో సాఫ్ట్వేర్ డెలివరీని వేగవంతం చేయడంలో ఈ సంస్థ హైదరాబాద్ను ప్రపంచ పటంలో నిలుపుతోంది.