ఆధునిక ఆన్లైన్ రిటైల్ వ్యవస్థలో పెరుగుతున్న అక్రమ వాణిజ్యం, అనైతిక మార్కెట్ విధానాలు దేశవ్యాప్తంగా ఉన్న లక్షలాది మంది చిన్న వ్యాపారుల మనుగడకు ముప్పుగా మారుతున్నాయని ఫెడరేషన్ ఆఫ్ రిటైలర్స్ అసోసియేషన్ ఆఫ్ ఇండియా (FRAI) తీవ్ర ఆందోళన వ్యక్తం చేసింది. హైదరాబాద్లో “ఆధునిక మార్కెట్లలో అక్రమ వ్యాపారాన్ని ఎదుర్కోవడం” అనే అంశంపై నిర్వహించిన సదస్సులో విధాన నిర్ణేతలు, చట్ట అమలు అధికారులు, వ్యాపార సంఘాల ప్రతినిధులు ఒకే వేదికపైకి వచ్చి ఈ సవాలుపై సుదీర్ఘంగా చర్చించారు. కొన్ని క్విక్ కామర్స్, ఈ-కామర్స్ సంస్థలు అవలంబిస్తున్న విపరీతమైన ధరల తగ్గింపు, ఫ్లాష్ సేల్స్, అవాస్తవిక రాయితీలు మార్కెట్ అసమతుల్యతకు కారణమవుతున్నాయని వక్తలు ఎత్తిచూపారు. రోజుకు 14 నుంచి 18 గంటల పాటు శ్రమిస్తూ, పరిమిత లాభాలతో స్థానిక ప్రజలకు జవాబుదారీగా సేవలు అందించే సాంప్రదాయ కిరాణా దుకాణాలు, ఆఫ్లైన్ రిటైలర్లు ఈ అసమాన పోటీని తట్టుకోలేక జీవనోపాధిని కోల్పోయే ప్రమాదం ఉందని, ఇది కేవలం ఆర్థిక సమస్య మాత్రమే కాదని, తీవ్రమైన సామాజిక భద్రతా సమస్య అని ప్రతినిధులు నొక్కిచెప్పారు.
ఆహార ఉత్పత్తులు, పర్సనల్ కేర్ వస్తువుల నుంచి ప్రీమియం మొబైల్ ఫోన్ల వరకు ప్రతిదీ నిమిషాల్లో డెలివరీ చేసే క్విక్ కామర్స్ వ్యవస్థలు వినియోగదారులకు సౌకర్యాన్ని అందిస్తున్నప్పటికీ, అవి నకిలీ మరియు నిషేధిత ఉత్పత్తుల శీఘ్ర వ్యాప్తికి ప్రమాదకరమైన మార్గాలను తెరుస్తున్నాయని సదస్సు హెచ్చరించింది. పర్యవేక్షణ లోపాలను ఆసరాగా చేసుకుని అక్రమ విక్రయదారులు డిజిటల్ ప్లాట్ఫారాల ద్వారా నాసిరకం వస్తువులను మార్కెట్లోకి గుమ్మరిస్తున్నారని, వినియోగదారులు కూడా నాణ్యత కంటే తక్షణ లభ్యత, తక్కువ ధరలకే ఆకర్షితులవుతున్నారని హైదరాబాద్ సెంట్రల్ జోన్ ఏసీపీ శ్రీ ఆర్. సంజయ్ కుమార్ మరియు మైనారిటీ కమిషన్ చైర్మన్ శ్రీ తారిఖ్ అన్సారీ పేర్కొన్నారు. ఈ నేపథ్యంలో, వినియోగదారుల నమ్మకాన్ని, రాష్ట్రవ్యాప్తంగా ఉన్న 2 లక్షలకు పైగా సూక్ష్మ, చిన్న రిటైలర్ల ప్రయోజనాలను కాపాడటానికి ప్రభుత్వం తక్షణమే జోక్యం చేసుకోవాలని ఎఫ్ఆర్ఏఐ డిమాండ్ చేసింది. ఆన్లైన్ రిటైల్ వ్యవస్థలో న్యాయబద్ధమైన పోటీ విధానాలు అమలయ్యేలా, చట్టవిరుద్ధమైన ఉత్పత్తులను పూర్తిగా నిర్మూలించేలా కఠినమైన నియంత్రణ సంస్థల పర్యవేక్షణ ఉండాలని ప్రతినిధులు సమిష్టిగా పిలుపునిచ్చారు.