పశ్చిమాసియాలో మళ్లీ ఉద్రిక్తతలు పెరుగుతున్నాయి. హార్ముజ్ జలసంధిని తెరిచి, మళ్లీ మూసివేసింది ఇరాన్. దీంతో క్రూడ్ ఆయిల్ ధరలు ఒక్కసారిగా పెరిగాయి. ఆ ప్రభావం బంగారం ధరలపై పడింది. ఈ క్రమంలో దేశీయ మార్కెట్లో పసిడి ధరలు ఈరోజు భారీగానే తగ్గాయి. ఈ క్రమంలో ఏప్రిల్ 20వ తేదీన హైదరాబాద్ మార్కెట్లో 22, 24 క్యారెట్ల గోల్డ్ రేట్లు ఎంత మేర తగ్గాయో ఇప్పుడు మనం తెలుసుకుందాం.
బంగారం అంటే భారతీయులకు చాలా ఇష్టం. పండగలు, శుభకార్యాలు, పర్వదినాల్లో బంగారం కొనుగోలు చేస్తే మంచి జరుగుతుందని భావిస్తారు. అలాంటి వాటిల్లో అక్షయ తృతీయ ఒకటి. ప్రస్తుతం దేశంలో అక్షయ తృతీయ కొనుగోళ్లతో జువెలరీ దుకాణాలు కళకళలాడుతున్నాయి. ఇలాంటి తరుణంలో బంగారం ధరలు దిగిరావడం గమనార్హం. ఇది మహిళలకు ఒక శుభవార్తగా చెప్పవచ్చు. పశ్చిమాసియాలో నెలకొన్న ఉద్రిక్తతలతో బంగారం ధరల్లో ఊహించని మార్పులు జరుగుతున్న సంగతి తెలిసిందే. రెండ్రోజుల క్రితం హార్ముజ్ జల సంధిని పూర్తిగా తెరుస్తామని ఇరాన్ ప్రకటించడంతో క్రూడ్ ఆయిల్ ధరలు తగ్గి బంగారం ధరలు పెరిగాయి. అయితే, ఒక్క రోజు వ్యవధిలోనే పరిస్థితులు తారుమారయ్యాయి. హార్ముజ్ జలసంధి గుండా వెళ్లే నౌకలపై కాల్పులు జరిపిన ఇరాన్ ఇప్పుడు దానిని మళ్లీ మూసివేసింది. దీంతో ముడి చమురు ధరలు మళ్లీ భారీగా పెరిగాయి. ఆ ప్రభావం బంగారంపై పడింది. ఈ క్రమంలో పసిడి ధరలు తగ్గాయి. అయితే, గ్లోబల్ మార్కెట్లో పసిడి రేట్లు స్వల్పంగా పెరిగాయి. ఈ క్రమంలో హైదరాబాద్ మార్కెట్లో ఏప్రిల్ 20వ తేదీన బంగారం రేట్లు ఎలా ఉన్నాయో తెలుసుకుందాం.
అంతర్జాతీయ మార్కెట్లో పసిడి ధరలు ఈరోజు స్వల్పంగా పెరిగాయి. స్పాట్ గోల్డ్ రేటు ఔన్సుకు 22 డాలర్లు పెరిగి 4793 డాలర్ల వద్ద ట్రేడవుతోంది. ఇక స్పాట్ సిల్వర్ రేటు ఔన్సుకు 0.78 శాతం మేర పెరిగి 79.89 డాలర్ల వద్ద అమ్ముడవుతోంది. క్రూడ్ ఆయిల్ ధరల ప్రభావం బంగారంపై పడినట్లు బులియన్ మార్కెట్ వర్గాలు చెబుతున్నాయి.
హైదరాబాద్లో తగ్గిన బంగారం ధరలు
హైదరాబాద్ బులియన్ మార్కెట్లో పసిడి ధరలు ఈరోజు తగ్గాయి. అక్షయ తృతీయ పర్వదినం సందర్భంగా ధరలు తగ్గడం భారీ ఊరటగా చెప్పవచ్చు. ఈరోజు 22 క్యారెట్ల బంగారం ధర 10 గ్రాములకు రూ. 450 మేర తగ్గింది. దీంతో తులం గోల్డ్ రేటు రూ. 1,42,350 వద్దకు చేరింది. ఇక 24 క్యారెట్ల బంగారం రేటు 10 గ్రాములపై రూ. 490 మేర తగ్గింది. దీంతో తులం రేటు రూ. 1,55,290 వద్ద అమ్ముడవుతోంది.
స్థిరంగా వెండి ధరలు
బంగారం ధరలు దిగివచ్చినప్పటికీ వెండి ధరలు మాత్రం గరిష్ఠ స్థాయుల్లోనే కొనసాగుతున్నాయి. ఈరోజు వెండి రేట్లలో ఏ మార్పు లేదు. ప్రస్తుతం హైదరాబాద్ మార్కెట్లో కిలో వెండి రేటు ఎలాంటి మార్పు లేకుండా రూ. 2,80,000 మార్క్ వద్ద స్థిరంగా కొనసాగుతోంది. అంతర్జాతీయ ఉద్రిక్తతలు మళ్లీ పెరుగుతున్న క్రమంలో బంగారం, వెండి రేట్లలో మళ్లీ పెరుగుదల ఉంటుందనే అంచనాలు ఉన్నాయి.