Electric Road : ప్రపంచంలోనే తొలి ఎలక్ట్రిక్ రోడ్డు.. ఎలా పనిచేస్తుంది ?

ఈ ఏడాదే లాంఛింగ్.. 

స్వీడన్ దేశంలో ఎలక్ట్రిక్ రోడ్డు(Electric Road) రెడీ అవుతోంది. ఈ రకం రోడ్డును నిర్మించడం ప్రపంచంలో ఇదే తొలిసారి. ఈ రోడ్డును ఈ సంవత్సరమే ఓపెన్ చేయబోతున్నారు. తమ దేశంలోని దాదాపు 3000 కిలోమీటర్ల విస్తీర్ణంలో రోడ్లను ఎలక్ట్రిఫై చేయాలని స్వీడన్ ప్రభుత్వం లక్ష్యంగా పెట్టుకుంది. తద్వారా ఎలక్ట్రిక్ వాహనాలను వినియోగించే వారి కోసం బలమైన ఎకోసిస్టమ్‌ను తయారు చేస్తున్నారు.

ఎలక్ట్రిక్ రోడ్డు విశేషాలివీ.. 

• ఎలక్ట్రిక్ రోడ్డుపై ఎలక్ట్రిక్ వాహనం నడుస్తుండగానే ఛార్జింగ్ అయిపోతుంది. ఈ అంశం ఎలక్ట్రిక్ వాహనాల యజమానులకు చాలా ప్రయోజనకరంగా ఉంటుంది.
• రోడ్డుపై వెళ్తుండగా ఎలక్ట్రిక్  వాహనానికి ఛార్జింగ్ చేయాలంటే..  ఆ వాహనానికి ఒక మూవబుల్ ఆర్మ్‌ను అమర్చాలి. దాని ద్వారానే ఆ వాహనం ఛార్జ్ అవుతుంది.
• ఎలక్ట్రిక్ వాహనానికి అమర్చే మూవబుల్ ఆర్మ్ రోడ్డులో అమర్చిన ఎలక్ట్రిక్ పవర్ ట్రాక్‌కు కనెక్ట్ అవుతుంది. దానిపై నుంచి వెళ్తుండగా వాహనం బ్యాటరీ ఛార్జ్ అవుతుంది.
• ఈవిధమైన ఎలక్ట్రిక్ రోడ్డును 1 కిలోమీటరు పరిధిలో నిర్మించాలంటే దాదాపు రూ.10 కోట్లు ఖర్చవుతాయి.
• ఎలక్ట్రిక్ రోడ్డు గురించి పాదచారులు భయపడాల్సిన అవసరం లేదు. దానిపై నుంచి చెప్పులు లేకుండా సైతం నడవొచ్చు. ఎలాంటి షాకూ తగలదు.
• ఎలక్ట్రిక్ కార్లలో లాంగ్ డ్రైవ్‌కు వెళ్లే వారికి ఈ తరహా రోడ్ల వల్ల చాలా ప్రయోజనం దక్కుతుంది.
• ప్రత్యేకించి మన భారతదేశంలోని జాతీయ రహదారులపై కొన్నిచోట్ల ఇలాంటి ఎలక్ట్రిక్ రోడ్లను నిర్మిస్తే.. ఎలక్ట్రిక్ వాహనదారులకు ఛార్జింగ్ బెడద తప్పుతుంది.